2 Rĩm-dãmba 4 - WẼNNAAM SEBRE 2014

A Eliize pʋʋsame tɩ kaam fɩɩge

¹ Daar a yembre, no-rɛɛsdbã karen-biig a ye pag wa a Eliize nengẽ n kelem n yeel-a yaa: «Mam sɩdã sẽn yaa Wẽnnaam tʋmtʋmdã kiime, la yãmb miime t'a rag n yaa ned sẽn zoet Wẽnnaam. A rag n tara ned a ye samde, la sam-soabã waame n dat n yõg mam kom-dibli a yiibã n tɩ maan yembse.»

² La a Eliize yeela pagã yaa: «Bõe la f rat tɩ m maan n kõ-fo? Wilg maam fo sẽn tar bũmb ning f roogã pʋga.» Pagã leokame: «Mam ka tar bũmb ye. Yaa kaam bilf bal la m tar tɩ be yir ne tʋko.»

³ Woto, a Eliize yeel-a lame: «Kẽng f yagsã fãa nengẽ n tɩ kos rʋg-vɩɩdo, la f sã n na n kose, bɩ f kos rʋgd wʋsgo.

⁴ Fo sã n lebg n ta yiri, bɩ foom ne f kambã kẽ roogẽ, n lebs roogã noor n page. La f rɩk kaamã n kiig rʋgdã fãa pʋse, tɩ sẽn pid-bã, bɩ f lebs bãmb kɛɛnga.»

⁵ Pagã basa a Eliize n looge. La yẽnda ne a kambã kẽng n tɩ kẽe roogẽ wã n page, la kambã rag n dɩgsda rʋgdã n kɩt b ma wã t'a kiigd kaamã.

⁶ Rʋgdã fãa wa n pidame, la pagã yeela a biigã t'a kõ-a rʋk t'a kiig kaamã, la a biigã yeel-a lame tɩ rʋg-vɩʋʋg ka leb n ketẽ ye. Dẽ, kaamã sẽn dag n bundã yalsame.

⁷ Pagã kẽngame n tɩ togs Wẽnnaam daoã bũmb ning sẽn maanã. La Wẽnnaam daoã yeel-a lame t'a kẽng n tɩ koos kaamã n yao a samdã, la a rɩk sẽn kellã tɩ yẽnda ne a kambã rɩtẽ.

A Eliize ne Sunem tẽng paga

⁸ Daar a yembre, a Eliize rag n pɩʋʋgda Sunem tẽngã n loogdẽ, la pag a ye n dag n be tẽn-kãng n yaa nin-kãsenga, la a pẽdga a Eliize t'a wa sig yẽnda yirã t'a kõ-a rɩɩbo. Dẽ, sẽn sɩng ne badaare, a Eliize sã n wa n tũud tẽn-kãng n loogdẽ, a sigda pagã zakẽ n dɩ la a looge.

⁹ La pagã wa n yeela a sɩdã yaa: «Ges-y-yã, ad-y rao ning sẽn sigd-a tõnd yirã wakat fãa wã yaa Wẽnnaam ned sẽn yaa pʋ-peelem soaba.

¹⁰ Dẽ wã, wa-y tɩ d me ro-bil doogã zugu, n ning gãaga, la taable, ne goeele, n paas fɩtl doagendga. Woto, a sã n mi n wa sig tõndo, a tõe n kẽe beenẽ.»

¹¹ Dẽ, daar a yembre, a Eliize wa n siga beenẽ, la yẽnda kẽe yĩngr doogẽ wã n na n vʋʋse.

¹² A Eliize yeela a rakõor a Geyaazi t'a bool Sunem pagã. La a Geyaazi kẽng n tɩ bool-a lame t'a wa.

¹³ La a Eliize yeela a Geyaazi t'a sok pagã yaa: «Fo namsda tõnd yĩng wʋsgo, bõe la fo rat tɩ d maan n kõ-fo? Fo ratame tɩ m kos bũmb rĩmã nengẽ, wall tãb-biis naabã nengẽ, n kõ-f bɩ?» Pagã yeelame: «Ayo! Mam bee ne m nebã, la ka bũmb n paoog-m ye.»

¹⁴ A Eliize soka a Geyaazi yaa: «Bõe la tõnd tõe n maan n kõ pagã?» A Geyaazi yeelame: «Bũmb sẽn be, yaa t'a ka tar biig ye. La a sɩdã me yaool n kʋʋlame.»

¹⁵ A Eliize yeela a Geyaazi t'a bool pagã t'a wa. La a Geyaazi bool-a lame t'a wa ta n yals roogã noore.

¹⁶ A Eliize yeela pagã yaa: «Vẽer woto wẽnde, tɩ fo bugda bi-ribla.» Dẽ, pagã yeelame: «Sɩd bɩ, m kẽem sõngo? Wẽnnaam neda, da-y belg-y-m ye!»

¹⁷ Sɩd me, pagã wa n dɩka pʋga, la sẽn vẽk yʋʋmde, a roga bi-ribla, wa Wẽnnaam dao a Eliize sẽn dag n yeel-a wã.

Sunem tẽng pagã biig kũum

¹⁸ Biigã bɩɩme. La daar a yembre, a baaba wã sẽn wa n be ne bõn-koaadl tigsdbã, biigã yiime n kẽng a nengẽ.

¹⁹ La biigã yeela a baaba yaa: «M zug wɛɛ! M zug wɛɛ!» A ba wã yeela a rakõorã t'a tall-a n tɩ kɩs-a a ma.

²⁰ Woto, rakõorã talla biigã n tɩ kɩs-a a ma. La biigã pa a ma wã naoẽ hal n tãag wĩnto-sʋka, la a maana kaalem.

²¹ La pagã talla biigã n dʋ yĩngr doogã n gãneg-a Wẽnnaam daoã gãag zugu, la a lebs roogã noor n pag biigã pʋgẽ, la a bas n yi.

²² Pagã boola a sɩdã n yeel-a yaa: «Mam kotame tɩ y yãk rakõapã ned a yembr t'a tall bõn-yãang n wa yãag-m tɩ m zoe n ta Wẽnnaam daoã nengẽ la m lebg n wa.»

²³ A sɩdã sok-a lame: «Yaa noog tɩ f rabd Wẽnnaam daoã nengẽ rũndã? Bala, ka ki-paalga, leb n ka vʋʋsg daar me.» La pagã leok-a lame tɩ yell ka be ye.

²⁴ Dẽ, pagã kɩtame tɩ b ning bõangã yolgo, la a yeel rakõor ning sẽn tog n yãag-a yẽnda wã yaa: «Lʋɩ taoor tɩ d kẽnge, la mam sã n ka yeel foom tɩ f yals bɩ f ra yals ye.»

²⁵ Woto, pagã kẽng n tɩ paama Wẽnnaam daoã Karmell tãngã zugu. Wẽnnaam daoã sẽn yãnd pagã sẽn ket n be yɩɩg n watẽ, a yeela a rakõor a Geyaazi yaa: «Gese, yaa Sunem pagã la sẽn watã.

²⁶ M kos tɩ f yik n wudg n seg-a, n sok-a n ges yaa noogo! La f sok-a n gese, a sɩdã ne a biigã sã n tara laafɩ.» La a Geyaazi sẽn kẽngã, pagã leokame tɩ yell ka be ye.

²⁷ Dẽ, pagã sẽn ta Wẽnnaam daoã nengẽ Karmell tãngã zugu, a wudg n mobga Wẽnnaam daoã nao. La a Geyaazi kolgame n na n tus-a n serge, la Wẽnnaam dao a Eliize yeela a Geyaazi yaa: «Bas-a, bala, a bee sũ-sãan-kãseng pʋga, la Sẽn-Ka-Saab solga maam bõn-kãnga, n ka wilg maam ye.»

²⁸ La pagã yeelame yaa: «M kẽem sõngo, mam dag n kosa yãmb tɩ m data biig sɩda? Mam dag n ka pĩnd n yeel yãmb tɩ y ra belg-m sɩda?»

²⁹ A Eliize yeela a Geyaazi yaa: «Yik n sẽbg f sɛɛga, n deeg mam dasaarã n zoe n kẽnge. Fo sã n seg neda, bɩ f ra pʋʋs-a ye, la ned sã n pʋʋs foom, bɩ f ra reeg a pʋʋsmã ye. Fo sã n ta, bɩ f rɩk mam dasaarã n sɩɩs biigã nenga.»

³⁰ Biigã ma yeelame: «Mam wẽenda ne Sẽn-Ka-Saabo, la ne yãmb sẽn vɩ wã, tɩ mam kõn tol n serg n bas yãmb ye.» Dẽ, a Eliize yikame n tũ pagã n looge.

³¹ A Geyaazi rag n denga bãmb taoore, n ta n dɩk rasaarã n sɩɩs biigã nenga, la biigã ka tol n maan rãamde, wall a yẽrg ye. La Geyaazi lebg n sega a Eliize n yeel-a yaa: «Biigã ka nek ye.»

³² A Eliize sẽn ta, a mikame tɩ biigã kiime n gãe yẽnda gãagã zugu.

³³ La a kẽeme, n lebs roogã noor n page, tɩ yaa yẽnda ne biigã bal n be pʋgẽ, n na n pʋʋs Sẽn-Ka-Saabo.

³⁴ La a Eliize gãandame n vãbend n tẽeg a meng biigã zugu, n dɩk a noorã n tugl biigã noore, t'a ninã me tees biigã ninã, n dɩk a nusã n ning biigã nusẽ. A Eliize sẽn vãbend biigã zugu, biigã yĩngã leb n lebga tʋʋlga.

³⁵ La a Eliize yikame n kẽnd n gilgd roogã pʋga. La yẽnda lebg n leb n tɩ gãandame, n vãbend biigã zug yɛsa, la biigã tĩsa naoor a yopoe, n puk a ninã n getẽ.

³⁶ Dẽ, a Eliize boola a Geyaazi n yeel-a yaa: «Bool Sunem pagã t'a wa.» La a Geyaazi boola pagã, la a wa a Eliize nengẽ, t'a yeel-a yaa: «Rɩk f biigã.»

³⁷ Pagã wudgame n tɩ yĩgimd a Eliize taoore, n wõgemd n fõgen a neng tẽnga, n yik n dɩk a biigã n yi.

A Eliize rɩka zom n kiis rɩɩb zẽnem

³⁸ A Eliize lebg n waa Gilgalle. Rẽ tɩ kom-kãseng n dag n kẽ tẽngã. Wakat-kãnga, no-rɛɛsdbã karen-biis rag n wa n bee ne a Eliize, la yẽnda yeela a rakõorã t'a rɩk rʋg-bedrã n dʋgl n maan dɩɩb n kõ no-rɛɛsdbã karen-biisi.

³⁹ Dẽ, bãmb sʋkã ned a yembr yiime n kẽng we-kɛɛng n na n tɩ bao zẽedo. La yẽnda yãnda niri n wʋk n pids a fuugu. Yẽnda sẽn ta yiri, a bog-b lame n ning rʋkã pʋga. Ned ba a yembr dag n ka mi niir bãmbã ye.

⁴⁰ Bãmb yãka niri wã sẽn dʋgã n kõ nebã. La bãmb sẽn zĩnd n sɩng rɩɩb bal yee, la b sẽn kelem n yeele: «Wẽnnaam daoa, yaa kũum n be rʋkẽ wã!» Dẽ, bãmb ka tõog n dɩ-a ye.

⁴¹ Woto, a Eliize yeelame: «Ka yell ye. Tall-y zom n wa kõ-ma!» A Eliize reega zomã n ning rʋkã pʋga, la a yeel tɩ b vaag rɩɩbã n kõ nebã tɩ b rɩ. Nebã mikame tɩ rɩɩbã lebga sõama n ka leb n yaa toog ye.

⁴² Rao a yembr n yi Baall-Salisa n tall Oorz zom-paalg bur pisi, ne bɩle dẽenem biis a sẽn sui a korgẽ n zã n wa kõ Wẽnnaam dao a Eliize. La a Eliize yeelame tɩ b rɩk n kõ nebã tɩ b rɩ.

⁴³ A Eliize rakõorã yeelame yaa: «Mam na n maana a wãn n tõog tɩ yõwã sek neb koabg rɩlgre?» Dẽ, a Eliize yeel-a lame: «Rɩk n kõ nebã tɩ b rɩ. Bala, Sẽn-Ka-Saab yetame: ‹Yãmb na n dɩ n tɩgame tɩ kelle.› »

⁴⁴ Dẽ, b rɩka burã n kõ nebã, la b rɩ n tɩgame tɩ kell wa Sẽn-Ka-Saab sẽn dag n yeelã.