2 Rĩm-dãmba 25 - WẼNNAAM SEBRE 2014

B reega Zeruzalɛm

¹ A Sedesiyaas sẽn deeg a naamã tɩ yʋʋm wɛɛlẽ, kiuug piig soabã rasem piig daare, Babilond dĩm a Nebukatnedzaar yika ne a tãb-biisã fãa n zab ne Zeruzalɛm. Yẽnda tilga a tãb-sikã n gũbg tẽngã, la b tu bok n gilg-a zĩig zãnga.

² Babilond dãmbã gũbga Zeruzalɛm tẽngã n tãag a Sedesiyaas sẽn deeg a naamã tɩ yʋʋm piig la a yembrẽ.

³ Kiuug a naas soabã rasem a wɛ daare, komã wɩnga tẽngã pʋga, hal tɩ tẽngã nebã ka leb n tar dɩɩb baa bilf n na n dɩ ye.

⁴ Dẽ, Babilond nebã pooga võor tẽngã lalgẽ. La rĩm a Sedesiyaas ne a tãb-biisã fãa soosa ne yʋng n tũ tẽngã noor ning sẽn be lals a yiibã sʋk rĩmã zẽedã zĩig sɛɛgẽ wã n yi. Rĩmã rɩka sor n zoe n kẽng Araba tẽn-nabdrã sẽnẽ. La Kalde rãmbã rag n gũbga tẽngã.

⁵ La Kalde rãmbã tãb-biis riga rĩmã n tɩ yõk-a Araba tẽn-nabdrã sẽn be Zeeriko sẽnẽ wã, la rĩm a Sedesiyaas tãb-biisã fãa zoe n sãeeg n bas-a lame.

⁶ Kalde rãmbã yõka rĩmã n tall-a n kẽng Babilond dĩmã nengẽ Ribla tẽnga, la b bʋʋ rĩm a Sedesiyaas bʋʋdo.

⁷ Babilond dĩmã kɩtame tɩ b kood a Sedesiyaas kambã a nifẽ. Dẽ poore, rĩmã kɩtame tɩ b kɩɩd a Sedesiyaas ninã, la b sẽb-a ne zũud bãense, n tall-a n kẽng Babilonde.

B yõga Zʋʋda nebã n tɩ kẽes yembdo

⁸ Babilond dĩm a Nebukatnedzaar sẽn deeg a naamã tɩ yʋʋm piig la a wɛɛlẽ, kiuug a nu soabã rasem a yopoe daare, a Nebuzaradan sẽn dag n yaa Babilond dĩmã gũudb naabã, n yaa Babilond dĩmã sõgen-kãsengã waa Zeruzalɛm.

⁹ Yẽnda ninga Sẽn-Ka-Saab roogã ne rĩmã zakã, la Zeruzalɛm dotã fãa bugum. Yẽnda ninga ro-bɛdã fãa bugum.

¹⁰ Kalde tãb-biisã fãa sẽn dag n be ne gũudbã naabã sãama lals nins sẽn dag n gũbg Zeruzalɛmã.

¹¹ Gũudbã naab a Nebuzaradan talla tẽngã neb nins sẽn kellã, la neb nins sẽn dag n ket tẽngã pʋgẽ wã, ne neb nins sẽn dag n dɩk b mens n kõ Babilond dĩmã, n paas neb-kʋʋngã sʋk neb nins sẽn kellã, n tɩ kẽes yembdo.

¹² La a Nebuzaradan sakame tɩ tẽngã nimbãan-dãmbã pa tẽngã pʋg n get reezẽ tɩɩs pʋtã yelle, la b kooda.

¹³ Kalde rãmbã wãa zũudã ra-lugdsã sẽn dag n be Sẽn-Ka-Saab roogã noorã, ne sĩmsã rogendse, la zũud sĩn-bedrã sẽn dag n be Sẽn-Ka-Saab roogã samand pʋgã, la b wʋk zũudã n kẽng Babilond tẽnga.

¹⁴ Bãmb wʋka tompeglem laasã ne pɛll-dãmbã ne sʋʋsã la wisd laasã, ne zũud teed nins fãa b sẽn dag n tar n maand Sẽn-Ka-Saab roogã tʋʋmã.

¹⁵ Gũudbã naab leb n wʋka wisdã yõogr laas ne bõn-yũudl laasã, n paas teed nins fãa sẽn maan ne sãnem la wanzuri wã.

¹⁶ La sã n yaa sẽn kẽed ne zũud ra-lugds a yiibã, ne zũud sĩn-bedrã la sĩn-bi wã a Salmo sẽn dag n maan n ning Sẽn-Ka-Saab roogẽ wã, ned rag n ka tõe n bãng zũud te-bãmb fãa zɩslmã ye.

¹⁷ Zũud ra-lugdg a yembrã zãntlem dag n yaa kãntɩɩg piig la a nii. B rag n maana zũud pugl zãntlem sẽn ta kãntɩɩg a tãabo, n dogl ra-lugdg-kãng zugu. La b maana zũud gãmbr n ning zũud gernaad biisi, n gilg-a zãnga. La b kell n maana a woto me ne ra-lugdg a to wã.

¹⁸ Gũudbã naab a Nebuzaradan yõga maan-kʋʋr kãsem a Seraya ne a Sofoni sẽn yaa kãsem-pʋgdgã, la a yõg Sẽn-Ka-Saab roogã noor gũudb a tãabã.

¹⁹ Yẽnda leb n yõka zu-soben-kãseng ning sẽn dag n get tãb-biisã yellã, la a yõg rĩmã kug-zĩidb a nu ne tãb-biis naabã seb-gʋndã sẽn dag n get-a tãb-biisã yãkr yellã, la a yõg Zʋʋda tẽngã neb pis-yoob sẽn dag n be Zeruzalɛm tẽngã pʋga.

²⁰ Gũudbã naab a Nebuzaradan talla bãmb n kẽng Babilond dĩmã sẽn be Ribla tẽngã nengẽ.

²¹ Babilond rĩmã kɩtame tɩ b kʋ bãmb Ribla sẽn be Hamat soolmã pʋga. Yɩɩ woto la b tall Zʋʋda nebã n zãag ne b soolmã.

A Gedaliya lebga Zʋʋda kombere

²² Babilond dĩm a Nebukatnedzaar dag n kɩtame tɩ neb pa Zʋʋda tẽngã pʋga. Nin-bãmb sʋka, b yãka a Safãn biig a Ayikam biig a Gedaliya n kɩt t'a lebg bãmb naaba.

²³ Tãb-bi-sul nanambsã fãa ne b nebã sẽn wa n wʋm tɩ Babilond dĩm a Nebukatnedzaar yãka a Gedaliya t'a lebg naabã, bãmb kẽnga a Gedaliya nengẽ Mispa. Neb nins sẽn kẽngã yaa a Netaniya biig a Ismayɛlle, ne a Kareya biig a Zoaana, ne Netofa rao a Tanumet biig a Seraya, ne Maakat rao a Zazaniyahu. Yaa bãmb ne b nebã.

²⁴ A Gedaliya wẽena ne bãmb ne b nebã n yeele: «Da zoe-y Kalde nebã ye. Kell-y n pa-y tẽngã pʋga, n sak Babilond dĩmã tɩ y na n vɩɩmda bãane.»

²⁵ Kiuug a yopoe soabã sẽn ta, a Netaniya biig a Ismayɛll sẽn yaa a Elisama yagengã, n yaa na-biigã ne a neb piig tũu taab n kẽng Mispa n tɩ kʋ a Gedaliya ne Zʋʋda nebã, la Kalde neb nins sẽn dag n be ne yẽnda Mispa wã.

²⁶ Rẽnda kɩtame tɩ nebã fãa, sẽn sɩng ne nin-bãooneg tɩ tãag nin-bɛda, ne tãb-biisã nanambsã fãa yik n zoe n kẽnga Ezɩpt tẽnga, bala, bãmb dag n zoeta Kalde rãmbã.

B yiisa a Zoakim bi-bees roogo

²⁷ B sẽn tall Zʋʋda rĩm a Yoyakẽ n tɩ kẽes yembdã tɩ yʋʋm pis-tã la a yopoɛɛlẽ, kiuug piig la a yiib soabã rasem pisi la a yopoe daare, Babilond dĩm a Evɩll-Merodak yiisa yẽnda bi-bees roogo. La yaa yʋʋmd ning yẽnda sẽn deeg a naamã pʋgẽ bala, la a yiis Zʋʋda rĩm a Yoyakẽ bi-bees roogã.

²⁸ A Evɩll-Merodak goma gom-nood ne a Yoyakẽ, n maan-a neere, n kõ-a naam t'a yɩɩd nanambs nins fãa sẽn dag n be ne yẽnda Babilond tẽngã.

²⁹ Woto, Babilond dĩm a Evɩll-Merodak kɩtame t'a Yoyakẽ yees a bi-be-futã n toeem futu, la a rag n naagda yẽnda n dɩt daar fãa hal n tãag a yõor tɛka.

³⁰ Dẽ, yɩɩ Babilond dĩmã n ges a Zoakim yell daar fãa hal n tãag a Yoyakẽ yõor tɛka.