2 Rĩm-dãmba 24 - WẼNNAAM SEBRE 2014

A Yoyakim rĩungu

¹ Yaa a Yoyakim zamaanẽ la Babilond dĩm a Nebukatnedzaar wa n na n zab ne Zʋʋda nebã. Naab a Nebukatnedzaar sooga a Yoyakim ne a nebã yʋʋm a tãabo, t'a Yoyakim yaool n na n yik n yeel t'a ka sak ye.

² Dẽ, Sẽn-Ka-Saab kɩtame tɩ Kalde ne Siiri la Moaab ne Amo nin-fãadbã na n wa zab ne a Yoyakim. Sẽn-Ka-Saab tʋma bãmb tɩ b kẽng n tɩ zab ne Zʋʋda nebã n sãam b tẽngã wa Sẽn-Ka-Saab sẽn dag n kɩt tɩ bãmb no-rɛɛsdbã togsã.

³ Yaa Sẽn-Ka-Saab n kɩt tɩ bõn-kãng yɩ a woto. Bala, Sẽn-Ka-Saab rag n datame tɩ Zʋʋda nebã zãag ne bãmba, a Manaase sẽn maan yel-wẽn ninsã fãa yĩnga.

⁴ La sẽn paase, yaa rĩm a Manaase sẽn dag n daag bʋʋm dãmbã zɩɩm n pid Zeruzalɛm tẽngã yĩnga. Sẽn-Ka-Saab ka tʋlg n na n kõ-b sugr ye.

⁵ A Yoyakim tʋʋm a taabã ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

⁶ A Yoyakim saka a saam-dãmba, la yẽnda bi-ribl a Yoyakẽ n led yẽnda zĩigẽ n dɩ naamã.

⁷ Ezɩpt rĩmã ka leb n yi a tẽngã pʋgẽ ye. Tɩ bala, Babilond rĩmã rag n deega tẽms nins fãa Ezɩpt rĩmã sẽn dag n so wã zãnga, sẽn sɩng ne Ezɩpt ko-soogã n tall n tɩ tãag Efrat kʋɩlgã.

A Yoyakẽ rɩɩ naam Zʋʋda

⁸ A Yoyakẽ sẽn wa n na n deeg naamã t'a tara yʋʋm piig la a nii. La a rɩɩ naamã Zeruzalɛm kiis a tãab bala. A Yoyakẽ ma a Nehusta yaa Zeruzalɛm dao a Ɛlnatãn bi-pugla.

⁹ A Yoyakẽ maana sẽn yaa wẽng Sẽn-Ka-Saab nifẽ, wa yẽnda ba wã sẽn dag n maan to-to wã bala.

¹⁰ La wakat-kãnga, Babilond rĩm a Nebukatnedzaar nebã kẽnga Zeruzalɛm n na n tɩ zab ne-a, la b gũbg-a lame.

¹¹ Babilond rĩm a Nebukatnedzaar nebã sẽn wa n zabd ne tẽngã wakate, a Nebukatnedzaar meng yi n waa zabrã zĩigẽ Zeruzalɛm tẽngã.

¹² Dẽ, Zʋʋda rĩm a Yoyakẽ yii ne a ma, la a tʋmtʋmdbã ne a kug-zĩidbã la a sõgen-kambã n kõ b mens Babilond rĩmã. Dẽ, Babilond rĩm a Nebukatnedzaar kẽesa yẽnda yembdo, la rẽ tɩ yaa Babilond rĩmã sẽn deeg naam tɩ yʋʋm niinẽ.

¹³ Babilond dĩm a Nebukatnedzaar wʋka Sẽn-Ka-Saab roogã ne na-yirã laogã fãa, la a wã sãnemã teed nins Israyɛll dĩm a Salmo sẽn maan n ning Sẽn-Ka-Saab roogã pʋgẽ, wa Sẽn-Ka-Saab sẽn dag n yeelã.

¹⁴ A Nebukatnedzaar yõga Zeruzalɛm nebã fãa. Yaa kug-zĩidbã ne gãndaadã fãa. La nebã b sẽn yõga fãa sõor yaa neb tus piiga, n paas tʋʋm-mitbã ne sãabã. Yaa tẽngã nimbãan-dãmb bal la a bas yã.

¹⁵ A Nebukatnedzaar talla rĩm a Yoyakẽ ne a ma wã, la a pagbã ne a zu-sob-n-dãmbã, n paas Zeruzalɛm tẽngã nin-kãsemsã, n tɩ kẽes yembd Babilonde.

¹⁶ Bãmb yõga tẽngã pãens rãmb tus a yopoe, la b yõg tʋʋm-mitbã ne sãabã neb tusri, ne zabr gãndaadã. Babilond dĩmã talla bãmb fãa n tɩ kẽes yembd Babilond tẽnga.

¹⁷ Babilond dĩmã yãka a Mataniya sẽn yaa a Zoakim yɛsbã t'a led a Zoakim zĩigẽ n lebg rĩmã, la a teka a Mataniya yʋʋrã tɩ lebg a Sedesiyaase.

A Sedesiyaas rĩungu

¹⁸ A Sedesiyaas sẽn wa n na n lebg rĩmã t'a tara yʋʋm pisi la a yembre, la yẽnda rɩɩ naamã Zeruzalɛm yʋʋm piig la a yembre. A ma yʋʋr dag n yaa a Amutalle, n yaa Libna tẽng ned a Zeremi bi-pugla.

¹⁹ A Sedesiyaas maana sẽn yaa wẽng Sẽn-Ka-Saab nifẽ wa a Yoyakim.

²⁰ Sẽn-Ka-Saab sũ-puugrã yĩng n kɩt tɩ yel-kãngã paam Zeruzalɛm ne Zʋʋda nebã hal tɩ Sẽn-Ka-Saab tol n dig-b n zãag ne b menga. A Sedesiyaas kɩɩsa Babilond dĩmã noore.