2 Rĩm-dãmba 23 - WẼNNAAM SEBRE 2014

A Zoziyaas maana kaool ne Wẽnnaam

¹ Rĩmã tʋma neb tɩ b bool Zʋʋda ne Zeruzalɛm kãsem-dãmbã fãa tɩ b wa tigim yẽnda nengẽ.

² La rĩmã kẽnga Sẽn-Ka-Saab roogẽ wã, yẽnda ne Zʋʋda la Zeruzalɛm nebã fãa, ne maan-kʋʋdbã, ne Wẽnnaam no-rɛɛsdbã, la ne nin-buiidã zãnga, sẽn sɩng ne bãooneg tɩ tãag bɛda. La yẽnda karma kaoolã sebr b sẽn dag n yãnd Sẽn-Ka-Saab roogẽ wã goamã fãa tɩ nebã fãa kelge.

³ Rĩmã yalsa yĩngri, Wẽnd doogã ra-lugdg sɛɛg Sẽn-Ka-Saab taoore, n wẽen n yeele: «Mam na n tũu Sẽn-Ka-Saabo, la m sak bãmb tõodã ne b noyã, la goam nins sẽn gʋls tõodã sebr pʋgẽ wã ne m sũur fãa, la ne m yamã fãa.» La nebã fãa naaga rĩmã n wẽen a woto.

Rĩm a Zoziyaas manega a soolmã

⁴ Rĩmã yeela maan-kʋʋr kãsem a Hilkiiza ne maan-kʋʋdb nins sẽn sõngd yẽnda wã, la roogã noor gũudbã tɩ b yiis teed nins fãa sẽn be Sẽn-Ka-Saab roogẽ wã tɩ b tar n waoogd Baall ne Aseera la yĩngr ãdsã. Bãmb talla te-bãmb n yi Zeruzalɛm tẽngã pʋg n tɩ yõog bugum pʋtã sẽn be Sedrõ longã pʋgã, la b wʋk a tompeglmã n tall n kẽng Betɛlle.

⁵ Rĩm a Zoziyaas yiisa maan-kʋʋdb nins Zʋʋda rĩm-dãmbã sẽn dag n yãk tɩ b yõogd wisd maoong kʋʋb zĩisã Zʋʋda tẽmsã pʋg ne Zeruzalɛm tẽn-kɩremsã, la b yiis neb nins me sẽn dag n yõogd wisd n kõt Baall wẽn-naandgã ne wĩndgã la kiuugã ne yĩngr ãdsã fãa.

⁶ Rĩm a Zoziyaas yiisa wẽn-naandg a Aseera ra-lugdgã sẽn dag n be Sẽn-Ka-Saab roogã pʋgẽ wã, n tall-a n yi Zeruzalɛm n kẽng Sedrõ ko-soogẽ wã n tɩ yõog bugum, t'a lebg tompeglem. La b wʋka tompeglmã n lob nin-talsã yaadẽ.

⁷ Rĩm a Zoziyaas kɩtame tɩ b wã yoaadbã rotã sẽn dag n be Sẽn-Ka-Saab roogã zak pʋgẽ, tɩ pagbã rag n be ro-bãmb pʋs n wʋgd fut n kõt Aseera wẽn-naandgã pʋʋsdbã.

⁸ Dẽ zugẽ, rĩm a Zoziyaas kɩtame tɩ b bool Zʋʋda tẽmsã maan-kʋʋdbã fãa tɩ b wa. La yẽnda sãama maoong kʋʋb zĩisã maan-kʋʋdbã sẽn dag n yõogd wisd b zutã, sẽn sɩng ne Geba hal n tɩ tãag Bɛɛr-Seba. La a sãama maoong kʋʋb zĩisã sẽn dag n be tẽngã rignoyẽ wã. Zĩ-bãmb dag n bee tẽngã naab a Zozoe rignoorẽ wã, n dag n be tẽngã noor goabga.

⁹ La baoosg zãnga, b rag n ka basd maoong kʋʋb zĩisã maan-kʋʋdbã tɩ b kẽng Zeruzalɛm n tɩ maan maoong Sẽn-Ka-Saab tẽn-kugrẽ wã ye. La bãmb dag n naagda b saam-biisã n dɩt bur sẽn ka rã-bɩllã.

¹⁰ Rĩmã sãama Tofɛt sẽn yaa kamb yõogr zĩigã sẽn dag n be Bɛn-Hinom tãn-longẽ wã, sẽn na yɩl tɩ ned da leb n dɩk a bi-ribl bɩ a bi-pugl n maan maoong n yõog bugum n kõ wẽn-naandg a Molɛk ye.

¹¹ Rĩm a Zoziyaas yiisa wiid nins Zʋʋda rĩm-dãmbã sẽn dag n welg toor wĩndgã waoogr yĩngã. Wed-bãmb rag n bee Sẽn-Ka-Saab roogã noore, n pẽ zu-soab a Netan-Melɛk zakã sẽn be na-yirã zak pʋgã. Rĩmã yõoga saar-dãmb nins b sẽn dag n tar n waoogd wĩndgã.

¹² Rĩmã wãa tẽn-kug nins Zʋʋda rĩm-dãmbã sẽn dag n maan n ning a Akaaz gãosgã zugã ne rĩm a Manaase sẽn maan tẽn-kug nins n ning Sẽn-Ka-Saab roogã zags a yiibã pʋsã. Rĩmã sẽn wã bãmb n sɛ, a wʋka b tomã n tɩ lob Sedrõ tãn-longã pʋga.

¹³ Rĩm a Zoziyaas sãama maoong kʋʋb zĩis nins sẽn dag n be oliiv tɩɩs tãngã goabg n teesd Zeruzalɛmã. Yaa rĩm a Salmo n dag n me tẽn-kug-bãmb Sɩdõ nebã wẽn-naan-wẽng a Astarte ne Moaab nebã wẽn-naan-yoog a Kemoos yĩnga, la Amo-rãmbã yel-beed a Milkom yĩnga.

¹⁴ Rĩmã wãa wẽn-naan-kãens kug-vigindsã, la a kɛ Aseera ra-lugdsã n lubi, n yaool n wʋk ninsaalb kõab n ning b zĩisẽ wã.

¹⁵ Rĩm a Zoziyaas kẽnga Betɛll n tɩ pãb tẽn-kugr ning sẽn dag n be beenẽ wã n wã, la a sãam maoong kʋʋb zĩig ning a Nebat biig a Zeroboaam sẽn dag n me n kɩt tɩ Israyɛll nebã kẽ kongr pʋgã. Dẽ, rĩmã sãama tẽn-kugrã ne maoong kʋʋb zĩigã. Yẽnda yõoga maoong kʋʋb zĩigã bugum, n pãb-a t'a lebg tompeglem, la a yõog Aseera ra-lugdgã bugum.

¹⁶ Rĩm a Zoziyaas wẽnemdame n yãnd yaad nins sẽn dag n be tãngã zugã. La yẽnda tʋma neb tɩ b wʋk kõabã yaadẽ wã n wa yõog-b bugum tẽn-kugrã zug n sãam-b wa Sẽn-Ka-Saab sẽn dag n kɩt tɩ b no-rɛɛsã togsã.

¹⁷ Rĩm a Zoziyaas sokame: «Yaa ãnda yaoog kugr la sẽn tondã?» Tẽngã nebã leokame tɩ yaa Wẽnnaam no-rɛɛs ning sẽn yi Zʋʋda n wa wã yaoogo, tɩ yaa no-rɛɛs-kãng n pĩnd n togs rĩmã sẽn maan Betɛll tẽn-kugrã bũmb ning rũndã wã yelle.

¹⁸ Dẽ, rĩmã yeelame: «Bas-y yao-kãngã, la y ra wʋk a kõabã ye!» Dẽ, b basa no-rɛɛs-kãng kõabã, ne Wẽnnaam no-rɛɛs ning sẽn yi Samaari tẽng n wa be wã kõabã.

¹⁹ Rĩm a Zoziyaas kɩtame tɩ b sãam maoong kʋʋb zĩisã pʋʋsg rot nins fãa Israyɛll dĩm-dãmbã sẽn dag n me n kɩt tɩ Sẽn-Ka-Saab sũur yikã. Rĩmã sãama bãmb wa a sẽn sãam Betɛllã.

²⁰ Rĩmã kɩtame tɩ b yõg maoong kʋʋb zĩisẽ maan-kʋʋdbã fãa n maan maoong tẽn-kugã zutu, la a yõog ninsaalb kõab b zutu. Dẽ poore, rĩmã lebg n kuila Zeruzalɛm.

B maana Pak tigrã

²¹ Rĩmã yeela nebã fãa yaa: «Maan-y Pak tigrã tɩ yɩ Sẽn-Ka-Saab sẽn yaa yãmb Wẽnnaamã waoogr yĩnga, wa sẽn gʋls kaoolã seb-kãngã pʋgẽ wã.»

²² Hal sẽn sɩng ne Israyɛll bʋ-kaoodbã wakate, n tɩ ta Israyɛll ne Zʋʋda rĩm-dãmbã wakate, b rag n nan zɩ n maan Pak tigr a woto buud ye.

²³ Yaa rĩm a Zoziyaas sẽn deeg a naamã tɩ yʋʋm piig la a niinẽ, la b maan Pak tig-kãng Zeruzalɛm Sẽn-Ka-Saab waoogr yĩnga.

A Zoziyaas yaoolem tʋʋmã

²⁴ Sẽn paas rẽ, rĩm a Zoziyaas kɩtame tɩ b menes neb nins fãa sẽn boond kɩɩmse, ne bag-bʋgdbã, la tɩtã ne wẽn-naandsã, la bõn-wẽns buudã fãa sẽn dag n be Zʋʋda ne Zeruzalɛm soolmã pʋgẽ wã. Bãmb maana woto n na n sak goam nins sẽn gʋls tõodã sebr ning maan-kʋʋd a Hilkiiza sẽn yã Sẽn-Ka-Saab roogã pʋg n dɩkã.

²⁵ Sẽn deng rĩm a Zoziyaase, rĩm a to ka zĩnd sẽn sak n tũ Sẽn-Ka-Saab ne a sũur fãa, la ne a yamã fãa, la a pãngã fãa wa a Moyiis tõogã sẽn yeelã ye. La a Zoziyaas loogr poore, rĩm a to sẽn wẽnd yẽnda ka tol n zĩnd ye.

²⁶ La baoosgo, Sẽn-Ka-Saab sũur dag n ket n nan ka sig ne Zʋʋda nebã, a Manaase tʋʋm-wẽnsã yĩng ye.

²⁷ Sẽn-Ka-Saab yeelame yaa: «Mam na n diga Zʋʋda nebã tɩ b yi mam taoore, wa mam sẽn dig Israyɛll nebã. Mam na n basa Zeruzalɛm tẽngã mam sẽn dag n yãkã, ne roog ning mam sẽn dag n yeel tɩ m na n kɩtame tɩ m yʋʋrã zĩnd a pʋgẽ wã.»

Rĩm a Zoziyaas kũum

²⁸ Rĩm a Zoziyaas tʋʋm a taabã ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

²⁹ Yaa rĩm a Zoziyaas zaamanẽ la Ezɩpt rĩm a Faarõ Neko yi n kẽng Efrat kʋɩlgã sẽnẽ n tɩ zab ne Asiiri rĩmã. Wakat-kãnga, rĩm a Zoziyaas yiime n na n seg-a n zab ne-a. La Ezɩpt rĩm a Faarõ Neko sẽn yã yẽnda sẽn watã, a kɩtame tɩ b seg rĩm a Zoziyaas Megido n kʋ.

³⁰ Rĩm a Zoziyaas tʋmtʋmdbã rɩka yẽnda kũumã n sagl saar pʋg n tall n yi Megido n kẽng Zeruzalɛm n tɩ mum-a a meng yaoog pʋga. Woto, tẽngã neb yãka a Zoziyaas biig a Zoakaaz n pʋdg a zug kaam t'a led a ba zĩigẽ n lebg rĩmã.

A Zoakaaz lebga Zʋʋda rĩmã

³¹ A Zoakaaz sẽn wa n na n lebg rĩmã t'a tara yʋʋm pisi la a tãabo. La a rɩɩ naam kiis a tãab Zeruzalɛm. A Zoakaaz ma yʋʋr la a Hamutalle, n yaa Libna tẽng rao a Zeremi bi-pugla.

³² Rĩm a Zoakaaz maana sẽn yaa wẽng Sẽn-Ka-Saab nifẽ, wa a yaab-rãmbã sẽn dag n maanã.

³³ Ezɩpt rĩm a Faarõ Neko yõka a Zoakaaz n balg bãens Ribla sẽn be Hamat-rãmbã tẽng pʋgã tɩ yẽnda ka leb n yaa Zeruzalɛm naab ye. La a yaoolga tẽngã yaoodo, n yeel tɩ b yao wanzuri kɩlo tus a tã, ne sãnem kɩlo pis-tã.

A Yoyakim lebga Zʋʋda rĩmã

³⁴ Ezɩpt rĩm a Faarõ Neko kɩtame t'a Zoziyaas biig a Eliyakim lebg rĩm n deeg a ba a Zoziyaas zĩiga. La yẽnda teka a Eliyakim yʋʋrã n pʋd-a t'a Zoakim. La yẽnda kẽesa a Zoakaaz yembd n tall-a n kẽng Ezɩpt tẽnga, la yẽnda paa be n ki.

³⁵ A Zoakim kõo rĩm a Faarõ wanzuri ne sãnem, la a Zoakim kɩtame tɩ tẽngã nebã yao yaood ning Ezɩpt rĩmã sẽn dag n yeel tɩ b yao wã. Yẽnda modga tẽngã nebã, n kɩt tɩ ned kam fãa kõ wa sẽn zems a paoongo. Dẽ, nebã kõo wanzuri ne sãnem, t'a Zoakim tall n tɩ kɩs Ezɩpt rĩm a Faarõ Neko.

³⁶ A Zoakim sẽn wa n na n deeg naamã t'a tara yʋʋm pisi la a nu. Yẽnda rɩɩ naam Zeruzalɛm yʋʋm piig la a yembre. A Zoakim ma yʋʋr la a Zebuda, n yaa Ruma tẽng rao a Peya bi-pugla.

³⁷ A Zoakim maana sẽn yaa wẽng Sẽn-Ka-Saab nifẽ, wa yẽnda yaab-rãmbã sẽn dag n maanã.