2 Rĩm-dãmba 20 - WẼNNAAM SEBRE 2014

A Ezekɩyaas lʋɩɩ bãaga

¹ Wakat-kãnga, rĩm a Ezekɩyaas lʋɩɩ bãag sẽn dat n kʋ-a. La a Amots biig a Ezayi sẽn yaa Wẽnnaam no-rɛɛsã waa yẽnda nengẽ n yeel-a yaa: «Ade, Sẽn-Ka-Saab yetame: Maneg f zakã yɛla. Bala, fo ka na n leb n vɩɩmd ye. Fo na n kiime.»

² Rĩm a Ezekɩyaas wẽnemda a neng n tees roogã lalgã, n pʋʋs Sẽn-Ka-Saab n yeele:

³ «Sẽn-Ka-Saabo, m kotame tɩ y tẽeg m yelle, m kotame tɩ y tẽeg tɩ mam dag n tũuda yãmb ne sɩda la ne m sũur fãa, la mam maana sẽn noom yãmba!» La a Ezekɩyaas yãba nintãm wʋsgo.

⁴ Wẽnnaam no-rɛɛs a Ezayi sẽn yi n nan ket n be zag-bedrã pʋga, Sẽn-Ka-Saab goma ne yẽnda n yeele:

⁵ «Lebg n kẽng n tɩ yeel mam nebã naab a Ezekɩyaas yaa: ‹Sẽn-Ka-Saab sẽn yaa fo yaab a Davɩɩd Wẽnnaamã yetame: Mam wʋma fo pʋʋsgã, mam yãnda fo nintãmã. Ade, mam na n maaga f bãagã, tɩ ka ne rasem a tãabo, bɩ f kẽng Sẽn-Ka-Saab roogẽ wã.

⁶ Mam na n paasa fo vɩɩmã woglem yʋʋm piig la a nu. Mam na n fãaga foom ne tẽn-kãngã Asiiri rĩmã nugẽ. Mam mengã yʋʋr yĩnga, la a Davɩɩd sẽn yaa mam tʋmtʋmdã zug maasem yĩnga, mam na n kogla Zeruzalɛm tẽngã.› »

⁷ Dẽ zugẽ, Wẽnnaam no-rɛɛs a Ezayi kɩtame tɩ b bao kankam n to n bɛ nodrã, la a Ezekɩyaas põsame n ka ki ye.

⁸ A Ezekɩyaas rag n soka a Ezayi yaa: «Yaa ne bõe bãnd la mam na n bãng tɩ Sẽn-Ka-Saab na n maaga maam, tɩ ka ne rasem bɩ mam kẽng Sẽn-Ka-Saab roogẽ wã?»

⁹ A Ezayi yeela yẽnda: «Ad bãnd ning Sẽn-Ka-Saab sẽn kõt foom n wilgdẽ tɩ bãmb na n pidsa b sẽn yeelã: Fo ratame tɩ b kɩt tɩ maasmã kẽng taoor nao-yakem piig bɩ? Bɩ f ratame t'a leb poorẽ nao-yakem piiga?»

¹⁰ Rĩm a Ezekɩyaas leokame: «Maasmã sẽn na n kẽng taoor nao-yakem piigã n yaa naana. Dẽ wã, mam datame t'a leb poorẽ nao-yakem piiga!»

¹¹ Woto, Wẽnnaam no-rɛɛs a Ezayi pʋʋsa Sẽn-Ka-Saabo, la Sẽn-Ka-Saab kɩtame tɩ maasmã targ n leb poorẽ nao-yakem piiga, a Akaaz rʋʋdgã zugu.

Babilond dĩmã tʋma neb a Ezekɩyaas nengẽ

¹² Wakat-kãng bala, a Baladan biig a Merodak-Baladan sẽn yaa Babilond dĩmã tʋma neb tɩ b zã sebr ne kũun n tɩ kõ rĩm a Ezekɩyaas, bala, yẽnda rag n wʋmame t'a Ezekɩyaas lʋɩɩ bãaga.

¹³ A Ezekɩyaas reega b sẽn tʋm-b rãmbã, la a wilga bãmb yẽnda arzɛkã bĩngr zĩisã fãa, wanzuri wã ne sãnemã, la parfẽ-rãmb sẽn tar yũ-noogã, ne kaam toay-toayã, la ne a zab-teedã bĩngr zĩiga, ne teed nins fãa sẽn be yẽnda laogã bĩngr zĩigẽ wã. Bũmb ka be a Ezekɩyaas zakẽ wã ne a soolmẽ wã, t'a ka wilg neb nins Babilond dĩmã sẽn tʋmã ye.

¹⁴ Dẽ, Wẽnnaam no-rɛɛs a Ezayi waa rĩm a Ezekɩyaas nengẽ n wa yeel-a yaa: «Nin-bãmbã wa n yeelame tɩ bõe? La b yii yɛɛnẽ?» A Ezekɩyaas leokame yaa: «Bãmb yii tẽn-zãrga, b yii Babilond soolmẽ wã.»

¹⁵ A Ezayi leb n sokame yaa: «Bãmb yãnda bõe fo zakẽ wã?» La a Ezekɩyaas leokame: «Bãmb yãnda bũmb ning fãa sẽn be mam zakẽ wã. Bũmb ka be mam laogã bĩngr zĩigẽ mam sẽn ka wilg-b ye.»

¹⁶ Woto, a Ezayi yeela a Ezekɩyaas yaa: «Kelg Sẽn-Ka-Saab koɛɛga.

¹⁷ ‹Daar n wate, tɩ b na n wʋk bũmb ning fãa sẽn be fo zakẽ wã, ne fo yaab-rãmbã sẽn dag n bĩng bũmb ning hal tɩ ta rũndã wã n tall n kẽng Babilonde. Bũmb kõn tol n kell ye.› Yaa Sẽn-Ka-Saab n yeele.

¹⁸ B na n yõga kom-dibli nins sẽn yaa yãmb meng kom-dogdsã n tall n loog tɩ b tɩ lebg zu-soben-dãmb Babilond dĩmã na-yir pʋga.› »

¹⁹ A Ezekɩyaas leoka a Ezayi yaa: «Sẽn-Ka-Saab koɛɛg ning fo sẽn togsã yaa sõama.» A leb n yeelame: Mam sẽn ket n vɩ wã wakate, vɩ-bãan la laafɩ we n zĩndi.

²⁰ A Ezekɩyaas tʋʋm a taabã, ne a gãndaalmã tʋʋmã fãa, ne bãkã la ko-sorã yẽnda sẽn tu n kɩt tɩ koom kẽ tẽngã pʋgẽ wã gʋlsa Zʋʋda rĩm-dãmbã kibay sebr pʋga.

²¹ A Ezekɩyaas saka a saam-dãmba, la yẽnda bi-ribl a Manaase n led yẽnda zĩigẽ n dɩ naamã.