2 Rĩm-dãmba 19 - WẼNNAAM SEBRE 2014

Sẽn-Ka-Saab fãaga rĩm a Ezekɩyaas

¹ Rĩm a Ezekɩyaas sẽn wʋm gom-kãensã wã, a pãrsa a fut n yeelg boto, n kẽng Sẽn-Ka-Saab roogẽ wã.

² Rĩm a Ezekɩyaas tʋma a Eliyakim sẽn yaa na-yirã zak naabã ne a Sebna sẽn yaa seb-gʋndã, la maan-kʋʋdbã kãsem-dãmbã, a Amots biig a Ezayi sẽn yaa Wẽnnaam no-rɛɛsã nengẽ. La b fãa yeelga bot n kẽnge.

³ Bãmb yeela a Ezayi yaa: «A Ezekɩyaas yeelame: Rũndã daarã yaa sũ-sãang daare, sɩbgre la yãnd daare. Bala, rogem daar taame, la pãng ka be n na n dog ye.

⁴ Daar ninga, Sẽn-Ka-Saab sẽn yaa yãmb Wẽnnaamã na n wʋma goam nins fãa Asiiri rĩmã sõgen-kãsengã b sẽn tʋm t'a wa tʋʋs Wẽnnaam sẽn vɩ wã to-to wã. Tõeeme tɩ Sẽn-Ka-Saab sẽn yaa yãmb Wẽnnaamã na n sɩbg-b-la goam nins yẽnda sẽn gom tɩ bãmb wʋmã yĩnga. Woto wã, bɩ y pʋʋs Wẽnnaam neb nins sẽn ketã yĩnga.»

⁵ Dẽ, rĩm a Ezekɩyaas sẽn tʋm b rãmbã kẽnga Wẽnnaam no-rɛɛs a Ezayi nengẽ.

⁶ La a Ezayi yeela bãmb yaa: «Ad yãmb sẽn na n kẽng n tɩ yeel y soaalã bũmb ninga: ‹Sẽn-Ka-Saab yetame: Da zoe rabeem ne goam nins Asiiri rĩmã tʋmtʋmdbã sẽn gom n paoog maam tɩ fo wʋmã ye.

⁷ Gese, mam na n tʋma sɩɩg yẽnda nengẽ. Yẽnda na n wʋma yell kibare n lebg n leb a tẽngẽ wã, la mam na n kɩtame tɩ b kʋ yẽnda ne zabr sʋʋg a tẽngẽ wã.› »

⁸ Asiiri rĩmã sõgen-kãsengã wʋmame t'a soaalã yii Lakɩɩse, n na n tɩ zab ne Libna tẽngã. La yẽnda kẽng n tɩ paam-a-la beenẽ.

⁹ La Asiiri rĩmã wʋmame tɩ Kuus tẽng rĩm a Tiraka watame n na n wa zab ne yẽnda. Woto, yẽnda leb n tʋma neb rĩm a Ezekɩyaas nengẽ n yeele:

¹⁰ «Kẽng-y n tɩ yeel-y Zʋʋda rĩm a Ezekɩyaas yaa: Ra bas tɩ Wẽnnaam ning fo sẽn teegã belg foom, n yeel tɩ Asiiri rĩmã ka na n tõog n deeg Zeruzalɛm ye.

¹¹ Fo mengã wʋma Asiiri rĩm-dãmb sẽn dag n maan tẽms a taabã fãa bũmb ningã. B sãam-b-la zãnga. Tɩ fo tagsdẽ tɩ foom n na n põse!

¹² Dẽ yĩnga, Goozã ne Haarã la Retsɛf ne Edɛn nebã sẽn be Telasaarã, sẽn yaa buud toay-toay nins mam ba-rãmbã sẽn sãamã wẽnnaam-dãmb tõog n fãag-b lame sɩda?

¹³ Hamat rĩmã ne Arpaad rĩmã la Sefarvayim tẽng rĩmã ne Hena rĩmã la Iva rĩmã bee yɛɛnẽ?

¹⁴ Rĩm a Ezekɩyaas reega sebrã koe-toagsdbã nugẽ n karme, la a yik n kẽng Sẽn-Ka-Saab roogẽ wã n tɩ lak sebrã Sẽn-Ka-Saab taoore.

¹⁵ Rĩm a Ezekɩyaas kẽnga Sẽn-Ka-Saab taoor n pʋʋs n yeel yaa: «Sẽn-Ka-Saab sẽn yaa Israyɛll Wẽnnaam, n zao serubẽ-rãmb zugu, yaa yãmb y yembr bal n yaa dũniyã soolem-dãmbã fãa Wẽnnaam, yaa yãmb n naan yĩngr la tẽnga.

¹⁶ Sẽn-Ka-Saabo, kɩll-y y tʋbr n kelge! Sẽn-Ka-Saabo, puk-y y nin n gese. Kelg-y goam nins a Senakeriib sẽn tʋm sõgen-kãsengã t'a wa tʋʋsd yãmb a Wẽnnaam sẽn vɩ wã!

¹⁷ Sẽn-Ka-Saabo, yaa sɩd tɩ Asiiri rĩm-dãmbã sãama buud toay-toayã, la b wã b tẽmsã.

¹⁸ Bãmb wʋka b wẽnnaam-dãmbã n yõog bugum, n menes-b zãnga. La sɩd-sɩdã, wẽnnaam-bãmb rag n ka wẽnnaam-dãmb sɩd-sɩd ye. Bala, rag n yaa raad ne kug wẽn-naands ninsaalb nus sẽn maane.

¹⁹ Moasã, Sẽn-Ka-Saab sẽn yaa tõnd Wẽnnaam, d kotame tɩ y fãag tõnd a Senakeriib nugẽ, tɩ dũniyã soolem-dãmbã fãa bãng tɩ yaa yãmb a Sẽn-Ka-Saab y yembr bal n yaa Wẽnnaam.»

A Ezayi wilga Wẽnnaam leokrã

²⁰ Dẽ, a Amots biig a Ezayi tʋmame tɩ b tɩ yeel a Ezekɩyaas yaa: «Sẽn-Ka-Saab sẽn yaa Israyɛll Wẽnnaamã yetame: ‹Mam wʋma fo sẽn pʋʋs n kos maam Asiiri rĩm a Senakeriib wɛɛngẽ wã.›»

²¹ Ad sɩbgr gomd Sẽn-Ka-Saab sẽn gom yẽnda wɛɛngẽ n yetẽ: Sɩyõ tẽn-neere, a yaanda foom, la a paoogd foom, Zeruzalɛm tẽn-neere, a bee fo poorẽ n gõmsda a zugu.

²² Yaa ãnda la fo sẽn tʋʋs la f paoogã? Yaa ne ãnda la fo sẽn zẽk f koɛɛgã? Fo zẽka f neng yĩngr ne wuk-m-meng n zabd ne Israyɛll Pʋ-Peelem-Soaba!

²³ Fo tũnuga f sẽn tʋm-b rãmbã n paoog Sẽn-Ka-Saab n yeele: «Mam kẽnga ne m saar-dãmb wʋsgo, mam tõog n dʋʋ tãms sẽn lug zutu, n tõog n ta hal Libã yaangã. Mam kɛɛ yẽnda sɛɛdr tɩ-wogdã, ne a sɩprɛs tɩɩs nins sẽn yaa neeb n yɩɩdã, mam tãaga a yaoolem zĩ-soalgdgã, a tʋg-bɛdã zĩisẽ.

²⁴ Mam tuu buls n yũ sãand weoog koom, mam nao na n kʋɩɩsa Nill kʋɩlgã ko-soayã fãa koom.

²⁵ Fo ka bãng tɩ yaa hal daar zãr la mam segl bõn-kãense, tɩ mam maana bãmb hal kʋdem-wẽndẽ? Moasã, mam kɩtdame tɩ b paamd pidsgu, fo tʋʋmd yaa f kɩt tɩ tẽms nins sẽn tar pãngã lebg raboodo.

²⁶ Tẽn-bãmb nebã ka tar pãng ye, rabeem la yãnd n tar-ba. Bãmb wẽnda wa moog sẽn be weoogẽ, la wa mo-maasa, la wa gãosg zug moogo. Bãmb lebga wa kood sẽn kʋɩ n ka paam n ning biis ye.

²⁷ Gese, mam mii fo zĩndg wakate, la f yiib ne f kõom wakate. Mam leb n mii wakat ning fo sẽn gʋngde, n dat n zab ne maamã.

²⁸ Bala, fo yika f sũur ne maam, la fo wuk-m-men-goamã zẽk n taa mam tʋbẽ, mam na n dɩka m bãngã n sog fo yõorã, la m ning fo noorã salbre, n kɩt tɩ f lebg n tũ sor ning fo sẽn tũ n wa wã n lebe.»

²⁹ Ad bãnd ning mam sẽn kõt foom a Ezekɩyaas: Rõandã, nebã na n dɩɩ ka-yiisdim, la vẽere, b na n dɩɩ ka-yogdo, la yʋʋm-yɩta, b na n bʋdame la b tigsi, b na n sela reezẽ tɩɩs n dɩ b biisi.

³⁰ Neb nins sẽn põs Zʋʋda buudã sʋk n ketẽ wã, na n kɩɩ yẽg tẽn-gãongã pʋga, la b na n woma biis b wilã zutu.

³¹ Bala, Sẽn-Ka-Saab nonglem-kãsengã na n kɩtame tɩ bu-kell yi Zeruzalɛm, la tɩ neb sẽn põs yi Sɩyõ tãngã zugu.

Rĩm a Senakeriib baoosgo

³² Bõn-kãng yĩng kɩtame tɩ Sẽn-Ka-Saab gom Asiiri rĩmã wɛɛngẽ n yetẽ: ‹Yẽnda ka na n kẽ tẽn-kãngã pʋg ye, la a kõn tol n tão peemd ye. Yẽnda kõn tol n zẽk a gãong ye, la a kõn tol n zam tom-dʋr n zab ne-a ye.

³³ Yẽnda sẽn tũ sor ning n wa wã, a na n lebg n tũu so-kãng n lebe, la yẽnda kõn tol n kẽ tẽn-kãngã pʋg ye. Yaa Sẽn-Ka-Saab n yeele.

³⁴ Mam na n kogla tẽn-kãngã n fãag-a, mam mengã yʋʋrã yĩnga, la m tʋmtʋmd a Davɩɩd yĩnga.›»

³⁵ Badaar yʋngo, Sẽn-Ka-Saab malɛɛkã yiime n kẽng Asiiri nebã tãb-sikẽ n tɩ kʋ raop tus koabg la pis nii la a nu. B sẽn yik yibeoogo, b mikame tɩ bãmb fãa yaa kũum n dʋrẽ!

³⁶ Dẽ, Asiiri rĩm a Senakeriib lebg n kẽng n tɩ zĩnda Niniivi.

³⁷ La yẽnda sẽn wa n be a wẽn-naandg a Nisrok pʋʋsg roogẽ wã, yẽnda kambã, a Adarmelɛk ne a Sarɛtsɛɛr kẽng n tɩ kʋ-a-la ne zabr sʋʋg la b bas n zoe n kẽng Araara tẽnga. La a biig Asaradon n led yẽnda zĩigẽ n lebg rĩmã.