2 Rĩm-dãmba 1 - WẼNNAAM SEBRE 2014

A Eli wilgame t'a Akaazɩya beegame

¹ Rĩm a Akaab kũumã zugẽ, Moaab nebã zãgsame tɩ Israyɛll nebã kõn leb n soog-b ye.

² Samaari tẽngã pʋga, rĩm a Akaazɩya yi a na-yirã yĩngr doogã zug n lʋɩ n pogle. Dẽ, yẽnda tʋma neb tɩ b kẽng n tɩ sok Ekrõ nebã Wẽnnaam a Baall-Zebuub n ges yẽnda na n põsa a poglgã pʋgẽ bɩ, bɩ a ka na n põse.

³ La Sẽn-Ka-Saab malɛɛkã yeela Tisbe rao a Eli yaa: «Yik n tɩ seg Samaari rĩmã sẽn tʋm neb ninsã n yeel-b yaa: ‹Yaa Wẽnnaam n ka be Israyɛll bɩ, bɩ yaa bõe tɩ yãmb dabd n na n tɩ sok Ekrõ nebã Wẽnnaam a Baall-Zebuub n gese?›

⁴ Rẽ kɩtame tɩ Sẽn-Ka-Saab yetẽ yaa: ‹Gãag ning zug fo sẽn gãe wã, fo ka na n yik ye, fo na n kii beenẽ.› » A Eli sẽn gom woto n sɛ, a loogame.

⁵ Rĩm a Akaazɩya sẽn tʋm-b rãmbã lebg n leba a Akaazɩya nengẽ, la a sok-b lame tɩ yaa bõe tɩ b lebg n watẽ.

⁶ Dẽ, bãmb leoka yẽnda n yeele: «Rao a yembr n tek n seg tõndo, la a yeela tõnd yaa: Lebg-y n leb-y rĩm ning sẽn tʋm-a yãmbã nengẽ, n tɩ yeel-a tɩ Sẽn-Ka-Saab sokdame yaa: Rẽ yĩnga, yaa Wẽnnaam n ka be Israyɛll bɩ, bɩ yaa bõe tɩ fo tʋm tɩ b tɩ sok Ekrõ nebã Wẽnnaam a Baall-Zebuub n gese? Bõn-kãng yĩnga, fo kõn tol n leb n yik f gãagẽ wã ye. Fo na n kiime.»

⁷ A Akaazɩya sokame yaa: «Rao ning sẽn seg-a yãmb n gom woto wã yaa a wãn-wãna?»

⁸ Bãmb leoka yẽnda yaa: «Yaa rao sẽn yer fuug sẽn wʋg ne pe-kõbdo. La a sẽbga a sɛɛgã ne gãong sẽbdga.» Rĩm a Akaazɩya yeelame: «Yõwã ka ned a to n zʋʋg Tisbe rao a Eli ye!»

Rĩm a Akaazɩya baood n yõka a Eli

⁹ Rĩm a Akaazɩya tʋma tãb-biis pis-nu naab ne a tãb-biis pis-nu wã a Eli nengẽ. Tãb-biis pis-nu naabã kẽnga a Eli nengẽ, n tɩ mik t'a zĩ tãng zugu, la a yeela a Eli yaa: «Wẽnnaam daoa, rĩmã yeelame tɩ y sig n wa!»

¹⁰ La a Eli leoka tãb-biis naabã yaa: «Mam sã n sɩd yaa Wẽnnaam daoa, bɩ bugum yi yĩngr n sig n dɩ foom ne f tãb-biis pis-nu wã!» La bugum yii yĩngr n sig n dɩ bãmb fãa.

¹¹ Rĩm a Akaazɩya leb n tʋma tãb-biis pis-nu naab a to ne a tãb-biis pis-nu. La tãb-biis pis-nu na-kãng me sẽn ta, a yeela a Eli yaa: «Wẽnnaam daoa, rĩmã yeelame tɩ y sig tao-tao n wa!»

¹² A Eli leoka yẽnda yaa: «Mam sã n sɩd yaa Wẽnnaam daoa, bɩ bugum yi yĩngr n sig n dɩ foom ne f tãb-biis pis-nu wã!» La bugum yii yĩngr n sig n dɩ bãmb fãa.

¹³ Rĩm a Akaazɩya leb n tʋma tãb-biis pis-nu naab a to naoor a tãabẽ soaba, la yẽnda me tãb-biis pis-nu wã tũ-a lame. Tãb-biis naab a tãabẽ soabã kẽngame, la yẽnda sẽn ta, a yĩgimda a rũmã zug a Eli taoore, n yõk-a sɛɛg n yeele: «Wẽnnaam daoa, mam kot-y lame tɩ y zoe maam ne neb pis-nu-kãensã nimbãanega, la y ra kʋ-d ye!

¹⁴ Ade, mam bãngame tɩ bugum n yi yĩngr n sig n dɩ pipi tãb-biis pis-nunu nanambs a yiibã ne b tãb-biisã. Rẽ wã, mam kot-y lame tɩ y zoe m nimbãanega, la y fãag m vɩɩmã!»

¹⁵ Dẽ, Sẽn-Ka-Saab malɛɛkã yeela a Eli t'a sig n tũ-a, la a ra zoe rabeem ye. La a Eli sigame n tũ yẽnda n kẽng rĩmã nengẽ.

¹⁶ A Eli sẽn ta, a yeela rĩmã yaa: «Sẽn-Ka-Saab yetame: ‹Fo sẽn tʋm tɩ b kẽng n tɩ sok Ekrõ nebã wẽn-naandg a Baall-Zebuubã, rat n yeelame tɩ yaa Wẽnnaam n ka be Israyɛll tẽngã pʋg tɩ b tõe n sok-b n ges bɩ?› Bõn-kãng yĩnga, fo kõn tol n leb n yik f gãagẽ wã ye. Fo na n kiime!»

¹⁷ Dẽ, rĩm a Akaazɩya kii wa Sẽn-Ka-Saab sẽn kɩt t'a Eli togsã. La a Akaazɩya sẽn dag n ka paam bi-riblã yĩnga, yẽnda yao a Zoram n led yẽnda zĩigẽ n dɩ naamã. Wakat-kãng tɩ yaa Zʋʋda rĩm a Zozafat biig a Zoram sẽn deeg naam tɩ yʋʋm yiiblẽ.

¹⁸ Rĩm a Akaazɩya tʋʋm a taabã ne a sẽn maan bũmb ninsã fãa gʋlsa Israyɛll dĩm-dãmbã kibay sebr pʋga.