2 Korẽnt rãmba 9 - WẼNNAAM SEBRE 2014

¹ Ka tɩlɛ tɩ mam gʋls yãmb sõngr ning sẽn tog n kõ Kiris tẽedbã wɛɛngẽ ye.

² Sɩd me, mam mii yãmb ratem sõngã, la mam pẽga m meng yãmb wɛɛngẽ Masedoan nebã taoor n yeel tɩ Akayi nebã rag n seglame n sɛ hal rɩɩgẽ, la yãmb sẽn modgdã kɩtame tɩ neb wʋsg me rat n maane.

³ Mam tʋmda ba-biisã yãmb nengẽ, tɩ tõnd sẽn pẽg yãmbã kõn yɩ zaalem bõn-kãng wɛɛngẽ ye, la tɩ yãmb na segl n sɛ wa mam sẽn yeelã.

⁴ Mam ka rat tɩ Masedoan nebã yãag maam n wa n mik tɩ yãmb ka segl n sɛ ye, tɩ tõnd sẽn kɩs sɩd ne yãmbã da wa n lebg yãnd ne tõnd ye. La yaa m sẽn ka rat n yeel tɩ yãmb yãnda yĩnga.

⁵ Dẽ, mam tagsdame tɩ yaa neer tɩ m kos ba-biisã tɩ b reng maam taoor n wa yãmb nengẽ, n ges nonglem kũunã yãmb sẽn zoe n kãabã yelle, tɩ y tõe n segl n sɛ, tɩ yɩ yamleoog kũuni, la ra yɩ wa zoe-bõn kũun ye.

⁶ Bãng-y tɩ ned ning sẽn bʋt bilf na n tigsa bilfu, la ned ning sẽn bʋt wʋsg na n tigsa wʋsgo.

⁷ Bɩ ned kam fãa kõ wa sẽn zems a sẽn yãk yam a sũur pʋgẽ, la ra yɩ ne nen-gãneng wall modgr ye. Bala, Wẽnnaam nonga ned ning sẽn kõt ne sũ-noogo.

⁸ La Wẽnnaam tara pãn-tõog tɩ kõ yãmb bark buud fãa tɩ seke. Tɩ yãmb tõe n paam bũmb fãa, daar fãa, sẽn na sõng yãmb y ratmã fãa pʋgẽ n sek n kell tɩ y maan tʋʋm-soamã fãa,

⁹ tɩ yɩ wa gʋls-sõamyã sẽn yeelã: A kɩtame t'a tʋʋm-sõama wã saag zĩig fãa. A kõo naong rãmba. Yẽnda tɩrlem paada wakat sẽn kõn sa.

¹⁰ Soab ning sẽn kõt-a ka-koaad bõn-buudu, la b kõt-a bur t'a rɩtẽ wã na n kõo yãmb bõn-buudu, la b kɩt t'a wom wʋsgo, la b kɩt tɩ yãmb tɩrlmã biis yɩ wʋsgo.

¹¹ Woto, yãmb na paam arzegs bũmb fãa pʋgẽ, n yãk tɩ yɩ nonglem kũuni tɩ neb wʋsg na pʋʋs Wẽnnaam barka, kũunã tõnd sẽn kõ-bã yĩnga.

¹² Bala, ka Wẽnnaam nebã bal la nonglem kũun‑kãngã na n sõng ye. A na n kɩtame tɩ neb wʋsg pʋʋs Wẽnnaam barka.

¹³ Bãmb sã n paam sõng-kãngã, b na n pẽga Wẽnnaam, yãmb sẽn sak n kɩs Kiris koe-noogã kaseto, la yãmb sẽn kõ kũun wʋsg bãmb yĩnga, la nebã fãa yĩngã.

¹⁴ B pʋʋsda yãmb yĩng ne nonglem, Wẽnnaam sẽn sik bark kãseng yãmb zutã yĩnga.

¹⁵ Bark Wẽnnaam, bãmb kũunã noor sẽn ka tõe n togsã yĩnga.