2 Korẽnt rãmba 3 - WẼNNAAM SEBRE 2014

Kãab paalgã tʋmtʋmdba

¹ Dẽ wã, dat n yeelame tɩ tõnd leb n sɩngame n na n pẽg d mens bɩ? Wall tõnd da rata kaset sɛb n wilg yãmb wa neb a taabã sẽn maandã, wall d rata yãmb kaset sɛb n wilg neb a taabã?

² Yãmb yaa tõnd sebr sẽn gʋls tõnd sũyã pʋse, nebã fãa sẽn mi la b karemdẽ.

³ Yaa vẽeneg tɩ yãmb yaa Kiris sebre, tõnd sẽn gʋls n tʋme. Ka sẽn gʋls ne gʋls-koom ye, la yaa sẽn gʋls ne Wẽnnaam sẽn vɩ wã sɩɩga. Ka sẽn gʋls kug-wals zut ye, la yaa sẽn gʋls yãmb sũyã pʋse.

⁴ Yaa tẽeb pidsg-gũudum‑kãng la tõnd tar Wẽnnaam nengẽ, Kiris maasem yĩnga.

⁵ Ka rat n yeel tɩ tõnd mens tara pãng n tõe n maan bõn‑kãng ne d mens pãng ye, la yaa tɩ tõnd pãngã yita Wẽnnaam nengẽ.

⁶ Wẽnnaam kɩtame tɩ d tõe n yɩ bãmb tʋmtʋmdb kãab-paalgã maasem yĩnga. Ka ne tõog sẽn gʋlsã ye, la yaa ne Sɩɩg-sõngo. Bala, tõog sẽn gʋlsã kʋʋdame, la Sɩɩg-sõng kõta vɩɩm.

⁷ La sã n yaa tɩ tõog ning sẽn wat-a ne kũumã, b sẽn gʋls-a kug-wals zutã, a sã n da tar ziir hal tɩ Israyɛll kambã rag n ka tõe n ges a Moyiis nengã, yẽ nengã sẽn yãgd ne ziirã yĩnga, tɩ yaool n yaa ziir sẽn na n wa n loogã,

⁸ rẽ wã, Sɩɩgã sẽn maand tʋʋmd ningã kõn tall ziir n yɩɩd sɩda.

⁹ Tʋʋmd ning sẽn wat ne sɩbgrã sã n da tar ziiri, yaa tʋʋmd ning sẽn wat ne tɩrlmã n tar ziir n yɩɩda.

¹⁰ La b sã n na n mak-b ne taaba, bũmb ning sẽn yaa wa a talla ziirã ka yɩ ziir ye, ziir ning sẽn yaa kãseng n yɩɩdã yĩnga.

¹¹ Rẽnda wã yĩnga, sã n yaa tɩ bũmb ning sẽn dag n loogdã paama a ziiri, dẽnd bũmb ning sẽn ka loogdã n tar ziir n yɩɩda.

¹² Dẽ, tõnd sẽn tar tẽeb-pidsg gũudum‑kãngã wã, tõnd tara raood wʋsgo.

¹³ La tõnd ka maand wa a Moyiis sẽn da lut a nengã ne peende, tɩ Israyɛll kambã da yã ziir‑kãng sẽn ya bõn-loaagdgã sɛɛbã ye.

¹⁴ La bãmb yamã pagame, bala, hal tɩ ta moasã, bãmb sã n karemd kãab kʋdgã, peen-kãng ket n beeme. Peen-kãng ka tõe n pilg tɩ sã n ka ne a Kiris ye.

¹⁵ Hal tɩ ta moasã, b sã n karemd a Moyiis sebrã, peendã ket n luda b yamã.

¹⁶ La b sã n wẽnemd n tek yam n tẽ ‹Zu-soabã›, peendã pilgdame.

¹⁷ La b sẽn yet tɩ ‹Zu-soabã›, rat n yeelame tɩ Sɩɩga, la Zu-soabã Sɩɩg sẽn be zĩig ninga, lohorem bee be.

¹⁸ Tõnd fãa nensã pilgame tɩ nebã ne Zu-soabã ziir kãng beenẽ wa nen-gɛtgẽ, la Zu-soabã, sẽn yaa-a Sɩɩgã, tedga tõnd tɩ d wẽneg bãmba, n paamd ziir n paasdẽ.