2 Korẽnt rãmba 2 - WẼNNAAM SEBRE 2014

¹ Dẽ, mam yãka yam m sũurẽ n ka rat n leb n wa yãmb nengẽ ye. Sẽn na yɩl n da wa sãam yãmb sũyã ye.

² Bala, mam sã n sãam yãmb sũyã, ãndã n tõe n kõ maam sũ-noogo, sã n ka mam sẽn sãam neb nins sũyã bala?

³ Mam gʋlsa wa mam sẽn da gʋlsã, tɩ mam sã n wa wa, bɩ m da paam sũ-sãang ne neb nins sẽn da tog n kõ maam sũ-noogã ye. La mam sũur keema ne yãmb fãa, bala, mam sũ-noog yaa yãmb fãa sũ-noogo.

⁴ Yaa yel-pak-kãseng pʋga, la sũ-sãang ne nintãm pʋg la mam dag n gʋls yãmba. A ka sẽn na n sãam yãmb sũy ye, la yaa tɩ yãmb na bãng nonglem kãseng ning mam sẽn tar yãmb yĩngã.

Kõ-y ned ning sẽn beegã sugri

⁵ Ned sã n yɩ sabaab tɩ sũ-sãang wa, ka maam bal sũur la a sãam ye, yaa yãmb fãa, la bas-y tɩ m yeel tɩ yãmb neb kẽere, n da wa yag zĩrẽ ye.

⁶ Sɩbgr ning yãmb neb wʋsg sẽn sɩbg nin-kãngã soabã sek-a lame.

⁷ La sẽn yaa neer n yɩɩd moasã, yaa tɩ yãmb tog n kõ-a-la sugri, la y bels-a tɩ Sũ-sãoon-kãseng da wa yõk-a, n kẽes-a pãn-komsem pʋg ye.

⁸ Dẽ, mam sagenda yãmb tɩ y maan bũmb sẽn wilgd tɩ y nong-a lame.

⁹ Bala, mam sẽn da gʋls yãmba me, da yaa sẽn na n mak yãmb n bãng y sã n yaa sakdb bũmb fãa pʋgẽ.

¹⁰ La yãmb sẽn kõt ned ning sugr a beegr yĩngã, mam me kõt-a-la sugri. La ne maam, mam sẽn maan sugrã, sã n yaa tɩ bũmb n be m sẽn tog n kõ sugri, yaa yãmb yĩng la m maan bõn-kãng Kiris nifẽ,

¹¹ sẽn na yɩl tɩ sʋtãanã ra wa tõog tõnd ye. Bala, tõnd mii a Sʋtãan sɩlmã.

A Poll maanda yɩɩr Torwaas

¹² La mam sẽn ta Torwaas n na n moon Kiris koe-noogã, baa ne Zu-soabã sẽn pak sor be n kõ maamã,

¹³ mam sɩɩgã da ka gãe ye, mam sẽn ka yãnd m ba-biig a Titã yĩnga. Dẽ, mam basa bãmb n kẽng Masedoan.

Tõogre, Kiris maasem yĩnga

¹⁴ Bark Wẽnnaam sẽn kɩtd tɩ tõnd paamd tõogr daar fãa Kirisã tũudum pʋgẽ wã, la b kɩtdẽ tɩ ne tõndo, nebã bãngd Kiris zĩiga fãa, wa yũ-noog sẽn saagd to-to wã.

¹⁵ Sɩd me, tõnd yaa wa wisd sẽn tar yũ-noog Kiris sẽn dɩk n kõ Wẽnnaam, tɩ tõnd be neb nins sẽn paam fãagrã, la neb nins sẽn na n sãamã sʋka.

¹⁶ Ne neb kẽere, tõnd yaa kũum yũug sẽn wat ne kũum, la ne neb a taaba, tõnd yaa vɩɩm yũug sẽn wat ne vɩɩm. Ãnda n tar pãng n tõe n maan bõn-kãensã?

¹⁷ Bala, tõnd ka wẽnd wa neb wʋsg sẽn dɩkd Wẽnnaam koɛɛgã n leebd n baood yõodã ye. Ayo, tõnd sẽn gomdã yaa ne pʋ-peelem, la goamã yita Wẽnnaam nengẽ, la tõnd gomda Wẽnnaam taoore, la Kiris tũudmã pʋgẽ.