2 Kibayã 6 - WẼNNAAM SEBRE 2014

Sẽn-Ka-Saab roogã bark ningri

¹ Dẽ, rĩm a Salmo zẽka a koɛɛg n yeele: «Sẽn-Ka-Saabo, yãmb yeelame tɩ y rat n zĩnda zĩ-libsgẽ.

² La mam me roog sẽn tar ziir n na n kõ yãmba. Tɩ yãmb tõe n zĩnd be wakat sẽn kõn sa yĩnga.»

A Salmo goma ne zãma wã

³ Israyɛll zãma wã fãa rag n yasa yĩngri, la rĩm a Salmo wẽnemdame n tees-b n ning-b barka.

⁴ Dẽ, rĩm a Salmo yeelame: «Bɩ Sẽn-Ka-Saab sẽn yaa Israyɛll Wẽnnaamã yʋʋr paam waoogre. Bala, bãmb nug n pids kãabg ning bãmb noor sẽn dag n yaag n yeel m ba a Davɩɩd tɩ:

⁵ ‹Hal daar ning mam sẽn yiis Israyɛll sẽn yaa mam nebã Ezɩpt tẽngã tɩ ta rũndã, mam ka yãk tẽng ba a yembr Israyɛll buudã tẽms sʋk n yeel tɩ b me roog tɩ mam yʋʋrã be a pʋgẽ ye. La m ka yãk ned ba a ye t'a yɩ Israyɛll sẽn yaa mam nebã naab ye.

⁶ La yaa Zeruzalɛm la m yãk n na n ning m yʋʋrã a pʋga. La mam yãka a Davɩɩd t'a yɩ Israyɛll sẽn yaa mam nebã naaba.

⁷ La m ba a Davɩɩd dag n data ne b sũur fãa n me roog Sẽn-Ka-Saab sẽn yaa Israyɛll Wẽnnaamã yʋʋr yĩnga,

⁸ la Sẽn-Ka-Saab yeela m ba a Davɩɩd yaa: ‹Fo sẽn tags n dat n me roog mam yʋʋrã yĩngã, fo maana neere.

⁹ La ade, ka na n yɩ foom n na n me roogã ye. Na n yɩɩ biig ning fo sẽn na n dogã n na n me roogã mam yʋʋrã yĩnga.›

¹⁰ Woto, Sẽn-Ka-Saab pidsa b kãabgã. Mam leda m ba a Davɩɩd zĩigẽ, n dɩt naam Israyɛll wa Sẽn-Ka-Saab sẽn dag n yeelã, la mam mee ro-kãngã Sẽn-Ka-Saab sẽn yaa Israyɛll Wẽnnaamã yʋʋr yĩnga.

¹¹ La mam tol n ninga koglg ning kaoolã sẽn be a pʋgẽ wã Sẽn-Ka-Saab roogẽ wã, kaool ning bãmb sẽn dag n maan ne Israyɛll nebã.»

A Salmo pʋʋsgo

¹² Rĩm a Salmo yalsa Sẽn-Ka-Saab tẽn-kugrã taoore, tɩ b nengã tees Israyɛll zãma wã fãa. La b zẽka a nus n tees yĩngr n na n pʋʋse.

¹³ A Salmo ra maana zaoor sẽn yaa zũud n dɩgl zaka tẽn-sʋka. Zaoorã woglem da yaa kãntɩɩg a nu, t'a yalma yaa kãntɩɩg a nu, t'a zãntlmã yaa kãntɩɩg a tãabo. A Salmo rʋʋ zaoorã zug n yĩgimd t'a nengã tees Israyɛll zãma wã fãa. Dẽ, b zẽka b nus yĩngr n

¹⁴ yeele: «Sẽn-Ka-Saab sẽn yaa Israyɛll Wẽnnaam, saasẽ ne tẽng zug ka, Wẽnnaam a to ka be sẽn zem yãmb ye. Yãmb tallda y kaoolã ne y pʋ-peelmã kãenkãe ne neb nins sẽn tũud yãmb ne b sũur fãa wã.

¹⁵ Yãmb pidsa kãabg ning yãmb sẽn dag n kãab m ba a Davɩɩd sẽn yaa yãmb tʋmtʋmdã. N-yẽe! Yãmb noorã sẽn yeel bũmb ninsã, yãmb pids-b-la rũndã ne yãmb mengã nusi.

¹⁶ Moasã, Sẽn-Ka-Saab sẽn yaa Israyɛll Wẽnnaam, bɩ y pids kãabg ning yãmb sẽn dag n kãab m ba a Davɩɩd sẽn yaa yãmb tʋmtʋmdã. Yãmb dag n yeelame: Fo yagensã sã n gũus ne b yel-manesmã, la b tũ maam wa fo sẽn tũ maamã, ned ka na n kong bãmb sʋkã sẽn na n led fo zĩigẽ n dɩ naamã Israyɛll ye.»

¹⁷ Woto yĩngã, Israyɛll Wẽnnaam, bɩ y pids kãabg ning yãmb sẽn dag n kãab a Davɩɩd sẽn yaa yãmb tʋmtʋmdã.

¹⁸ Dẽ yĩnga, Wẽnnaam tõe n zĩnda ninsaalb sʋk dũni zug sɩda? Ade, saasã, ne saasẽ-saasẽ ka tõe n deeg yãmb a Wẽnnaam ye. Dẽ, roog ning mam sẽn me wã na n maana a wãn n tõog n deeg yãmba?

¹⁹ La baoosgo, Sẽn-Ka-Saab sẽn yaa mam Wẽnnaam, bɩ y wʋm mam sẽn yaa yãmb tʋmtʋmdã pʋʋsgo, ne m kosgã, la y kelg mam sẽn yaa yãmb tʋmtʋmdã sẽn kelemd n boond yãmbã.

²⁰ Bɩ y Puk-y y nin wĩndg la yʋng n ges ro-kãngã, bala, yaa zĩig yãmb sẽn yeel tɩ y na n puka y belmã a pʋgẽ! Moasã, bɩ y kelg m pʋʋsgã m sẽn be zĩ-kãngã n pʋʋsd-y wã.

A Salmo pʋʋsda zãma wã yĩnga

²¹ Maam, a Salmo, la Israyɛll sẽn yaa yãmb nebã sã n wẽnemd n tees zĩ-kãngã n kos yãmba, bɩ y kelg-do. Bɩ y zĩnd-y saasẽ y sẽn beẽ wã n kelg tõndo, la y kõ-d sugri.

²² Ned sã n beeg a to, tɩ b yeel a soab t'a wẽene, tɩ wẽenegã tũud ne kãab-wẽnse, nin-kãng sã n wa yãmb doogã pʋga, n yals yãmb tẽn-kugrã taoor n wẽene,

²³ bɩ y zĩnd y zĩigẽ wã saasẽ n kelg la y leoke. La y bʋ y tʋmtʋmdbã bʋʋd n kɩt tɩ sẽn ka tar-a bʋʋmã paam sɩbgre, tɩ b bãng tɩ nin-tɩrgã tara bʋʋm.

²⁴ Israyɛll sẽn yaa yãmb nebã bɛɛb sã n tõog bãmb b sẽn beeg yãmba yĩnga, b sã n tek yam n kos sugri, la b waoog yãmb yʋʋrã, la b pʋʋs yãmb n kos yãmb ro-kãngã pʋgẽ,

²⁵ bɩ y zĩnd y zĩigẽ wã saasẽ n kelg-ba. Bɩ y kõ Israyɛll sẽn yaa yãmb nebã sugr b beegrã yĩnga, la y kɩt tɩ b lebg n wa tẽng ning yãmb sẽn kõ bãmb ne b yaab-rãmbã pʋgẽ.

²⁶ Yĩngrã sã n wa pag tɩ saag ka leb n niida, yãmb nebã sẽn beeg yãmb yĩnga, b sã n wẽnemd n tees zĩ-kãngã n pʋʋse, b sã n waoog yãmb yʋʋrã la b bas b yel-wẽnã, yãmb sẽn sɩbg bãmba yĩnga,

²⁷ bɩ y zĩnd y zĩigẽ wã saasẽ n kelge, la y kõ y tʋmtʋmdbã, ne Israyɛll sẽn yaa yãmb nebã sugri. Woto, yãmb na n zãmsa bãmb tɩ b rɩk so-sõng ning b sẽn tog n tũ wã, la y kɩt tɩ saagã ni yãmb tẽngẽ wã, tẽng ning yãmb sẽn dag n kõ y nebã tɩ yaa b pʋɩɩrã.

²⁸ Kom sã n kẽ tẽngã, walla bã-loangdg ka rẽ bɩ wãoong ne gãnem, wall sʋy bɩ kalwaar sã n kẽ tẽngã, wall b bɛɛbã n wa n gũbg tẽngã, baa sẽn yaa yel-beed la bãag ning fãa,

²⁹ Sẽn yaa bũmb ning fãa yĩng la b pʋʋsd bɩ b kot yãmba, a sã n yaa nin-yɛnga, bɩ Israyɛll tõrã fãa sẽn yaa yãmb nebã n kote, ned kam fãa sũur sẽn sãam ne toog ning sẽn paama wã, n zẽk a nus n tees ro-kãngã,

³⁰ bɩ y zĩnd y zĩigẽ wã saasẽ n kelg-ba, la y kõ-b b yel-wẽnã sugri, la y keo ned kam fãa wa sẽn zems a tʋʋmã. Bala, yãmb n mi a sũurã tagsgo, sɩdã, yaa yãmb y yembr bal n mi ninsaalbã fãa sũyã tagsgo.

³¹ Woto b na zoee yãmba, la b sak yãmb b vɩɩm fãa tɛk tẽng ning yãmb sẽn kõ-d ba-rãmba pʋgẽ.

³² Woto me, sãan sẽn ka Israyɛll buudã sẽn yaa yãmb nebã sã n yi zĩ-zãrgẽ n wa yãmb yʋʋrã yĩnga, la y nug pãngã, ne y tʋʋm kãsemsã yĩnga, n wa ro-kãngã pʋg n pʋʋs yãmba,

³³ bɩ y zĩnd y zĩigẽ saasẽ n kelg-a, la y maan wa sãanã sẽn kot yãmb bũmb ningã n kõ-a, tɩ buud nins fãa sẽn be dũniyã zugã tõe n bãng yãmb yʋʋrã, la b zoe yãmb wa Israyɛll nebã sẽn yaa yãmb nebã sẽn zoet yãmbã. La b bãng tɩ y yʋʋrã bee ro-kãngã mam sẽn me wã pʋga.

³⁴ Yãmb nebã sã n yi n na n tɩ zab ne b bɛɛbã n sak n tũ sor ning yãmb sẽn wilg-bã, bãmb sã n wẽnemd n tees tẽng ning yãmb sẽn yãkã, la roog ning mam sẽn me yãmb yʋʋrã yĩngã n pʋʋs yãmba,

³⁵ bɩ y zĩnd y zĩigẽ wã saasẽ n kelg b pʋʋsgã ne b kosgã, la y sõng-ba.

³⁶ Sẽn-Ka-Saabo, ned ka be n ka beegdẽ ye, la yãmb nebã sã n beeg yãmba, tɩ yãmb sũurã yik ne-ba, tɩ yãmb bas tɩ bɛɛbã tõog-ba, n yõg-b n kẽes yembd tẽn-zãrgẽ wall tẽng sẽn pẽ pʋga,

³⁷ bãmb sã n zĩnd b yembdã tẽng pʋgẽ, n tags n tek yam n kos sugri, n yõk yãmb sɛɛg n yeele: «Tõnd beegame, tõnd maana sẽn ka zemse, tõnd yaa bɛɛgdba!»

³⁸ Bãmb sã n zĩnd b yembdã tẽng pʋg n wẽnemd n bao yãmb ne b sũyã fãa, ne b yamã fãa, la b sã n wẽnemd n tees soolem ning yãmb sẽn kõ b yaab-rãmbã, la tẽng ninga, la roog ning mam sẽn me yãmb yʋʋrã yĩngã n pʋʋse,

³⁹ bɩ y zĩnd y zĩigẽ wã saasẽ n kelg b pʋʋsgã ne b kosgã, la y leok-ba, la y kõ y nebã sẽn beeg yãmbã sugri.

⁴⁰ La moasã mam Wẽnnaam, puk-y y nin, la y yok y tʋb n kelg sẽn pʋʋsd-b yãmb do-kãngã pʋgã.

⁴¹ Moasã, Wẽnnaam Sẽn-Ka-Saabo, yik-y-yã, wa-y y vʋʋsgã zĩigẽ, yãmb ne y pãngã sẽn pukd kaoolã koglg ningã pʋgã! Sẽn-Ka-Saabo, bɩ y maan-kʋʋdbã pid ne yãmb fãagrã, la sẽn tũud yãmb ne sɩdã kɩdem ne sũ-noogo

⁴² Wẽnnaam Sẽn-Ka-Saabo, da bas-y y nin-tũusdgã ye, tẽeg-y yãmb tʋmtʋmd a Davɩɩd maan-sɩdã yelle.