2 Kibayã 5 - WẼNNAAM SEBRE 2014

¹ A Salmo sẽn maan Sẽn-Ka-Saab roogã tʋʋmd fãa n sɛ, a kɩtame tɩ b tall teed nins fãa a ba a Davɩɩd sẽn dag n welg toor Sẽn-Ka-Saab yĩngã, n wa ning Sẽn-Ka-Saab roogã laog bĩngr zĩigẽ. Yaa wanzuri, sãnem, la teed a taabã fãa.

B ninga kãabg koglgã Sẽn-Ka-Saab roogã pʋgẽ

² A Salmo tigma Israyɛll Kãsem-dãmbã, ne Israyɛll buudã fãa nanambse, la zak sob-n-dãmbã fãa Zeruzalɛm, n kos-b tɩ b tɩ tall Sẽn-Ka-Saab kãabg koglgã a Davɩɩd tẽngã sẽn yaa Sɩyõ wã pʋgẽ n wa.

³ Dẽ, Israyɛll zãma wã fãa tigma taab rĩm a Salmo nengẽ Zeruzalɛm, kiuug a yopoe soabã tigr yĩnga.

⁴ Kãsem-dãmbã fãa wa n yãaga Leevi nebã tɩ b tɩ tʋk kaoolã koglgo.

⁵ Bãmb rɩka kaoolã koglgã ne sɛkã fu-roogã, la teed nins fãa sẽn welg toorã sẽn be a pʋgẽ wã n tall n wa.

⁶ Rĩm a Salmo ne Israyɛll nebã b sẽn bool tɩ b wa bãmb nengẽ wã rag n yasa yĩngr kaoolã koglgã taoore. La b maana rũm-bãooneg ne rũm-bɛd maoongo. La rũmsã yɩɩ wʋsg hal tɩ ned ka tõe n sõde, wall bãng b sõor ye.

⁷ Dẽ zugẽ, maan-kʋʋdbã talla Sẽn-Ka-Saab kaoolã koglg n tɩ ning zĩig ning b sẽn dag n maneg a yĩngã. Yaa zĩig sẽn welg toor n yɩɩdã pʋgẽ, serubẽ-rãmb a yiibã pɩgs tẽngre.

⁸ Serubẽ rãmbã rag n tẽega b pɩgsã koglgã sẽn beẽ wã. Bãmb dag n yɛdga b pɩgsã n lud koglgã ne a ra-tuiidsã.

⁹ La a ra-tuiidsã rag n yaa wogdo, tɩ ned sã n be zĩ-sõng n yɩɩdã noore, bɩ a tõe n yãnd-b zutã, la ned ka tõe n zĩnd yɩng n yãnd-b ye. La koglgã keta beenẽ hal tɩ ta rũndã

¹⁰ Bũmb dag n ka be koglgã pʋgẽ, sã n ka kug-wals a yiibã, la yaa a Moyiis n dag n sagl-b beenẽ wakat ning Israyɛll nebã sẽn wa yi Ezɩpt tɩ Sẽn-Ka-Saab maan kaool ne bãmb Orɛɛb tãngã zugã.

¹¹ Dẽ, maan-kʋʋdbã lebg n yii zõngã pʋgẽ. La maan-kʋʋdbã fãa sẽn dag n be-b be wã ra yɩlga b mense.

¹² La Leevi neb nins sẽn yaa yʋʋmbã, a Azafe, a Eman, ne a Yedutun, la b kambã, ne b saam-biisã fãa dag n yera fu-peelse. Bãmb dag n yasa tẽn-kugrã yaang n zãad kɛma, kʋla, la pendse. La maan-kʋʋdb koabg la pisi sẽn mi tãntãad peebg n dag n yeg bãmba.

¹³ Dẽ, tãntãn-pɛɛbdbã ne yɩɩn-yɩɩndbã naaga taab n na n pẽg Sẽn-Ka-Saabo, la b waoog-b n yeele: «Pẽg-y Sẽn-Ka-Saabo, bala, bãmb yaa sõama, la bãmb nonglmã paada wakat fãa.» La tãntãadã ne kɛmã, la yʋʋm teedã fãa rag n naagame n yɩɩndẽ. La wakat-kãng bala, sawad-taok n wa n sig n pid Sẽn-Ka-Saab roogã.

¹⁴ Sawadgã ra pida Sẽn-Ka-Saab roogã tɩ maan-kʋʋdba ra ka leb n tõe n leb n dɩk b tʋʋmã ye. Bala, Sẽn-Ka-Saab ziirã ra pida roogã.