2 Kibayã 33 - WẼNNAAM SEBRE 2014

A Manaase rĩungu

¹ A Manaase sẽn wa n na n deeg naamã t'a tara yʋʋm piig la yiibu. Yẽnda rɩɩ naam n kaoos yʋʋm pis-nu la a nu Zeruzalɛm tẽngã pʋga.

² A Manaase maana sẽn yaa wẽng Sẽn-Ka-Saab nifẽ. Bala, yẽnda maana yel-beed wa buud a taab nins Sẽn-Ka-Saabã sẽn dag n kɩt tɩ Israyɛll nebã rigã.

³ Yẽnda lebs n mee maoong kʋʋb zĩis nins sẽn be kunkubã zut a ba Ezekɩyaas sẽn dag n pãb n wã wã, la a me tẽn-kugr a Baall yĩnga, n lugl a Aseera ra-lugdsi, la a wõgemd n waoog yĩngr ãdse.

⁴ A Manaase mee tẽn-kug Sẽn-Ka-Saab roogã pʋga, la Sẽn-Ka-Saab yaool n dag n goma ro-kãng yell n yeele: «Yaa Zeruzalɛm la m na n kɩt tɩ m yʋʋrã zĩnd wakat sẽn kõn sa yĩnga.»

⁵ A Manaase mee tẽn-kug yĩngr ãdsã fãa yʋʋr yĩng n ning Sẽn-Ka-Saab roogã zags a yiibã pʋse.

⁶ La yẽnda mengã tol n dɩka a kamb n maan maoong n yõog bugum Bɛn-Hinom longẽ wã. Yẽnda ra sokd n na n bãnga beoog yelle, la a bʋgd bagre, la a maand sõodo. Yẽnda yãka neb tɩ yaa kinkir-bagba, la neb sẽn boond kɩɩmse. A Manaase kell n kẽnga taoor n maand sẽn yaa wẽng Sẽn-Ka-Saab nifẽ, n kɩt tɩ Sẽn-Ka-Saab sũurã yiki.

⁷ A Manaase ninga wẽn-naandg Wẽnnaam doogã pʋga, a mengã sẽn dag n kɩt tɩ b naane. La Wẽnnaam yaool n dag n goma ne a Davɩɩd ne a biig a Salmo n yeele: «Yaa ro-kãngã pʋga, ne Zeruzalɛm tẽnga pʋga, la mam yãk Israyɛll buudã fãa sʋka, n na n kɩt tɩ m yʋʋrã zĩnd be wakat sẽn kõn sa yĩnga.»

⁸ La Israyɛll nebã sã n sak mam noyã, la b maan wa mam sẽn yeel-bã, tɩ fãa zems zãng wa tõog ning mam tʋmtʋmd a Moyiis sẽn kõ bãmbã, mam ka na n leb n kɩt tɩ Israyɛll nebã yi n bas-b yaab-rãmbã tẽng n saad n yeebdẽ ye.

⁹ La Manaase kẽesa Zʋʋda ne Zeruzalɛm nebã weoogo, n kɩt tɩ b maan wẽng n yɩɩd buud nins Sẽn-Ka-Saabã sẽn kɩt tɩ Israyɛll nebã sãamã sẽn dag n maandã.

¹⁰ Sẽn-Ka-Saab goma ne a Manaase la ne a nebã, la bãmb ka kelg ye.

¹¹ Dẽ, Sẽn-Ka-Saab kɩtame tɩ Asiiri tẽngã tãb-biis nanambsã wa zab ne bãmb n yõk a Manaase, n gaag a lemdã ne leoose, n balg-a ne bãens n tall-a n kẽng Babilonde.

¹² La a Manaase sẽn wa n be toogã pʋgã, a baoome tɩ sigs Sẽn-Ka-Saab sẽn yaa yẽnda Wẽnnaamã sũuri. Dẽ, yẽnda sika a mengã wʋsg a ba-rãmbã Wẽnnaam taoore,

¹³ n bõs Sẽn-Ka-Saabo, la bãmb sika b sũurã n leok a pʋʋsgã, n kɩt t'a lebg n wa Zeruzalɛm n dɩ naamã. Woto, a Manaase bãngame tɩ Sẽn-Ka-Saab sɩd yaa Wẽnnaam.

¹⁴ Dẽ poore, a Manaase mee lalg a Davɩɩd tẽngã yɩnga. Lalgã sɩnga Giyon bulgã nin-taoorã, Sedrõ ko-soogẽ wã, hal n tɩ ta dignoor ning b sẽn boond tɩ zĩm dignoorã. Lalgã ra gũbga Ofɛll tãngã, la a ra n mea lame n zẽke. N ning tãnsoben-dãmba Zʋʋda tẽms nins fãa sẽn me n gũbg lalsã pʋsẽ.

¹⁵ La yẽnda yiisa bu-zẽmsã wẽnnaam-dãmbã, ne bõn-naandgã sẽn da be Sẽn-Ka-Saab roogã pʋgẽ wã, la a yiis tẽn-kug nins yẽnda sẽn da me n ning Sẽn-Ka-Saab roogã tãng zugã, la Zeruzalɛm pʋgẽ wã, n wʋk-b n yi tẽnga kɩreng n lob-ba.

¹⁶ Yẽnda mee Sẽn-Ka-Saab tẽn-kugrã, la a kʋ lagem-n-taar maando, la bark pʋʋsg maando. La a wilg Zʋʋda rãmbã tɩ b waoog Sẽn-Ka-Saab sẽn yaa Israyɛll Wẽnnaamã.

¹⁷ La baoosgo, nebã rag n ket n kẽnda maoong kʋʋb zĩisẽ wã, la ra yaa Sẽn-Ka-Saab sẽn yaa yẽnda Wẽnnaamã bal la b rag n waoogda.

¹⁸ A Manaase tʋʋm a taabã fãa a sẽn pʋʋs Sẽn-Ka-Saabã, la bãngdbã sẽn gomd ne yẽnda ne Sẽn-Ka-Saab sẽn yaa Israyɛll Wẽnnaamã yʋʋrã yĩngã fãa gʋlsa Israyɛll rĩm-dãmbã sebr pʋgẽ.

¹⁹ A Manaase pʋʋsgã, ne Wẽnnaam sẽn leok-a to-to wã, la yẽnda yel-wẽnã ne a sẽn maanã sẽn ka zems ne Wẽnnaamã, la a sẽn me maoong kʋʋb zĩisã, la a lugl a Aseera ra-lugdsã, la bõn-naandgã n yaool n na n sik a mengã fãa gʋlsa a Hozayi sebrã pʋgẽ.

²⁰ A Manaase kiime n sak a saam-dãmba la b mum-a-la a zakẽ. La a biig a Amo n led yẽnda zĩigẽ n dɩ naamã.

A Amo rĩungu

²¹ Rĩm a Amo sẽn wa n na n deeg naamã t'a tara yʋʋm pisi la a yiibu, la a rɩɩ naam Zeruzalɛm yʋʋm a yiibu.

²² Rĩm a Amo maana sẽn yaa wẽng n beeg Sẽn-Ka-Saab wa yẽnda ba a Manaase sẽn dag n maanã. Yẽnda maana maoong n kõ wẽn-naands nins yẽnda ba wã sẽn dag n maanã, n wõgemd n waoog-ba.

²³ Yẽnda ka sik a meng Sẽn-Ka-Saab taoor wa a ba a Manaase sẽn dag n maanã ye. Yẽnda maneg n maana yel-wẽnã n yɩɩd pĩnda.

²⁴ Rĩm a Amo tʋmtʋmdbã zemsa taab noor a yembr n zãmb-a n kʋ-a na-yirã pʋga.

²⁵ La tẽngã nebã kʋʋ neb nins fãa sẽn zãmb rĩm a Amo n kʋ wã. Dẽ, tẽngã rãmb yãka a Amo bi-ribl a Zoziyaas t'a led a ba zĩigẽ n lebg rĩma.