2 Kibayã 32 - WẼNNAAM SEBRE 2014

A Senakeriib wa n zaba ne Zʋʋda soolmã

¹ Bũmb ning fãa sẽn maanã, la tʋʋm ning fãa b sẽn tʋm ne pʋ-peelmã loogr zugẽ, Asiiri rĩm a Senakeriib wa Zʋʋda soolmã pʋgẽ n tilg a tãb-sikã n na n zab ne tẽms nins sẽn me n gũbg ne lals n tar pãngã, n tol n kõ noor tɩ b wã-ba.

² A Ezekɩyaas sẽn yã t'a Senakeriib wat n na zaba ne Zeruzalɛmã,

³ a yẽsa nea nanambsã sẽn na n yɩlẽ n yẽd buls nins sẽn be yɩngã noyã. La bãmb wa n sõng-a lame.

⁴ Dẽ, neb wʋsg n tigim taaba, la bãmb yẽda bulsã fãa, ne ko-zoetem ning sẽn zoeta tẽngã sʋkã soayã, la b yetẽ yaa: «Tõnd ka na n bas tɩ Asiiri rĩm-dãmbã wa mik koom wʋsg ye.»

⁵ Woto, a Ezekɩyaas paama raood n lebs n me lalgã zĩis nins sẽn dag n bisã, la me gãsdo. Yẽnda leb n mee lalg a to yɩngã, la a maneg Milo gãsg ning sẽn be a Davɩɩd tẽngã pʋgã, la a kɩt tɩ b maan kãna, la gãn wʋsgo.

⁶ A Ezekɩyaas yãka tãb-biis nanambs n lʋɩɩs nebã taoore, la a bool nebã n tigm-y-b tẽnga noore n gome n paas-b raood n yeele:

⁷ «Keng-y sũuri, paam-y raoodo! Da zoe-y rabeem ye, da rig-y rabeem Asiiri rĩma ne tãb-bi-kʋʋng ning sẽn pʋgd-a wã taoor ye. Bala, sẽn be-a ne tõndã pãng yɩɩda sẽn be-a ne Asiiri rĩmã.

⁸ Yẽnda teega ninsaalb pãnga, la tõnd teega Sẽn-Ka-Saab sẽn yaa tõnd Wẽnnaamã. Bãmb n na n zab sõng tõndo!» Kʋʋngã sẽn wʋm Zʋʋda rĩm a Ezekɩyaas goamã, b paama raoodo.

A Senakeriib koɛɛg Zeruzalɛm dãmba yĩnga

⁹ Dẽ zugẽ, Asiiri rĩm a Senakeriib sẽn dag n be Lakɩɩs ne a tãb-biisã fãa wã, tʋma a neb a Ezekɩyaas nengẽ, la Zʋʋda neb nins fãa sẽn dag n be Zeruzalɛmã nengẽ, tɩ b tɩ gom ne-b n yeel-b yaa:

¹⁰ «Ad Asiiri rĩm a Senakeriib sẽn yeta: Yaa bõe la yãmb teeg-y-yã, la y sẽn paad Zeruzalɛm sẽn gũbg ne tãbd n gilgã?

¹¹ Dẽ yĩnga, ka a Ezekɩyaas n belgd yãmb tɩ Sẽn-Ka-Saab sẽn yaa yãmb Wẽnnaamã na n fãaga yãmb mam nugẽ, ad-y-yã a belgda yãmba, tɩ y na n ki ne kom la ko-yũudu.

¹² Dẽ yĩnga, ka Ezekɩyaas-kãng la sẽn menes maoong kʋʋb zĩisã ne b tẽn-kugã, la a yeel Zʋʋda ne Zeruzalɛm dãmbã, tɩ ka tẽn-kugr a yembr taoor bal la b tog n wõgemde, la b yõog tɩdarã a zug bal la?

¹³ Yãmb ka bãng maam ne m ba-rãmbã sẽn maan bũmb ninga ne tẽms a taabã fãa nebã la? Rẽ yĩnga, buud a taabã wẽnnaam-dãmb tõog n fãag-b-la mam nugẽ sɩda?

¹⁴ Tẽn-bãmb m ba sẽn da sãama wẽnnaam-dãmbã fãa sʋka, wẽnnaam-bʋg n tõog n fãag a tẽng mam nugẽ, tɩ yãmb Wẽnnaamã na n wa tõog n fãag Zeruzalɛm mam nugẽ?»

¹⁵ La moasã, ra sak-y t'a Ezekɩyaas belg-y la a tudg-y woto ye. Da teeg-y y rĩmã goamã ye. Bala, tẽng ba a ye, bɩ rĩung ba a ye wẽnnaam-dãmb ka tõog n fãag a tẽng mam nugẽ, bɩ m ba-rãmbã me nugẽ ye, woto me yãmb wẽnnaam-dãmbã me ka na n tõog n fãag yãmb mam nugẽ ye.

¹⁶ Asiiri rĩm Senakeriib sẽn tʋm b rãmba ra ket n gomdame n paoogd Sẽn-Ka-Saabã la b tʋmtʋmd a Ezekɩyaas.

A Senakeriib tʋʋsa Sẽn-Ka-Saabo

¹⁷ La Senakeriib gʋlsa sɛb n na n tʋʋs Sẽn-Ka-Saab sẽn yaa Israyɛll Wẽnnaamã. Yẽnda goma sebrã pʋgẽ n yeele: «Tẽms a taabã wẽnnaam-dãmbã sẽn ka tõog fãag b tẽmsã mam nugẽ wã, woto me, a Ezekɩyaas Wẽnnaamã ka na n tõog n fãag a nebã mam nugẽ ye.»

¹⁸ A Senakeriib sẽn tʋm b rãmba ra zẽkda b koeesã, n gomd ne Zeruzalɛm nebã sẽn zao-b lalgã zugã ne Zʋʋda-rãmbã goam, n dat n kẽes-b rabeem la yɛɛsgo, sẽn na n yɩlẽ n paam n deeg tẽngã.

¹⁹ B ra gomda Zeruzalɛm Wẽnnaamã yelle wa b sẽn gomd tẽms a taabã sẽn be dũniyã zugã wẽnnaam-dãmbã sẽn yaa ninsaalb nus tʋʋmã yelle.

A Ezekɩyaas pʋʋsgo

²⁰ Yaa rẽ yĩng la dĩm a Ezekɩyaas nea Amots biig Izayi, sẽn yaa Wẽnnaam no-rɛɛsã pʋʋs Wẽnnaam sẽn be saasẽ wã.

²¹ La Sẽn-Ka-Saabã tʋma malɛɛk Asiiri rãmbã tãb-sikẽ, t'a tɩ kʋ tãb-bi-gãndaadã fãa, ne tãnsoben-dãmbã, la nanambsã fãa. Woto, Asiiri rĩm a Sãnkeriib yika ne yãnd n lebg n zoe n kuil a tẽngẽ. La wakat ning yẽnda sẽn wa n kẽ a wẽn-naandgã roogẽ wã n na n pʋʋsã, yẽnda kambã kẽe n kɛɛ yẽnda ne sʋʋg n kʋ.

²² Yaa woto la Sẽn-Ka-Saab fãag dĩm a Ezekɩyaas la Zeruzalɛm dãmba, Asiiri dĩmã a Senakeriib nugẽ, la b bɛɛb a taabã me nugẽ. Sẽn-Ka-Saabã kɩtame t'a Ezekɩyaas paam laafɩ a soolmã kɩrems fãa pʋsẽ.

²³ Neb wʋsg talla kũun n wa Zeruzalɛm n kõ Sẽn-Ka-Saabo, la b kõ Zʋʋda rĩm a Ezekɩyaas me. Bala, yell kãensã poore, yẽnda yʋʋrã ra yiime n lebg kãseng bu-zẽmsã sʋka.

A Ezekɩyaas lʋɩɩ bãaga

²⁴ Wakat-kãnga, rĩm a Ezekɩyaas lʋɩɩ bãag sẽn dat n kʋ-a. La a pʋʋsame tɩ Sẽn-Ka-Saab maag-a, la Sẽn-Ka-Saab leoka a Ezekɩyaas n kõ-a bãnde.

²⁵ A Ezekɩyaas ka maan wa sẽn zems Sẽn-Ka-Saabã sẽn maan n kõ yẽnda wã ye, Yẽnda wuka a meng n kɩt tɩ Sẽn-Ka-Saab sũur puug ne yẽnda, ne Zʋʋda, la ne Zeruzalɛm nebã.

²⁶ La baa ne a Ezekɩyaas sẽn da zẽk a mengã, yẽnda ne Zeruzalɛm nebã lɛɛg n sika b mense. Dẽ kɩtame tɩ Sẽn-Ka-Saab sũurã sig tɩ b ka sɩbg bãmb a Ezekɩyaas vɩɩmã wakat ye.

²⁷ A Ezekɩyaas paama arzegs wʋsg la waoogre. La a bao laog n bĩngi. Yaa wanzuri, sãnem, kug-sõama sẽn yaa neeba, parfẽ-rãmb sẽn tar yũ-noogo, ne gãnã, la te-sõama buud toor-toore.

²⁸ La a me rot a koodã bĩngr yĩnga, la a rãamã ne a kaamã yĩnga. La a mee bãga, la wuba, a rũm-bɛdã, ne a rũm-bãoonegã yĩnga.

²⁹ La yẽnda kɩtame tɩ b me tẽmse, la a paama rũm-bɛda, la rũm-bãooneg wʋsgo, bala, Sẽn-Ka-Saab ra kõ-a-la paoong wʋsgo.

³⁰ Leb n yaa a Ezekɩyaas n pag Giyon kʋɩlgã n gõdga tees a Davɩɩd na-tẽnga, nin-taoorã. A Ezekɩyaas tõoga ne tʋʋmd ning fãa a sẽn da maandã.

³¹ Wakat ning Babilond nanambsã sẽn tʋm koe-taasdbã tɩ b wa n na n sok n ges bõn-bãnd ning sẽn maan Zʋʋda tẽngã pʋgẽ wã yellã, Sẽn-Ka-Saab basa a Ezekɩyaas n na n mak-a n ges n bãng bũmb ning fãa sẽn be a sũurẽ wã.

³² A Ezekɩyaas tʋʋm a taabã, nea tẽebã tʋʋmã fãa gʋlsa bãngd a Ezayi sẽn yaa Amots biigã sebr pʋga, la Zʋʋda ne Israyɛll rĩm-dãmb kibay sebr me pʋga.

³³ A Ezekɩyaas kiime n sak a saam-dãmba, la b mum-a-a Davɩɩd kamba yaadẽ tãngã sɛɛgẽ. Zʋʋda ne Zeruzalɛm dãmbã wa n waoog-a-la a kũumã wakate. La yaa yẽnda bi-ribl a Manaase n led yẽnda zĩigẽ n dɩ naamã.