2 Kibayã 31 - WẼNNAAM SEBRE 2014

A Ezekɩyaas lebsa maan-kʋʋdbã b tʋʋmdẽ

¹ Tigrã poore, Israyɛll kamba fãa sẽn dag n tigim Zeruzalɛmã kẽe Zʋʋda tẽmsã fãa pʋsẽ, n wã kug-vigindsã, la b kɛ a Aseera ra-lugdsã, n wã b maoong kʋʋb zĩisã ne b tẽn-kugã fãa n menes-b zãnga, Zʋʋda, ne Benzame, la Efrayiim ne Manaase soolmã fãa pʋsẽ, dẽ, Israyɛll nebã fãa lebg n leba b tẽmsẽ, tɩ ned kam fãa kuil a yiri.

² A Ezekɩyaas leb n pʋɩɩ maan-kʋʋdbã ne Leevi nebã sags-sagse, n kõ sak fãa ne a tʋʋmde. Dẽ, maan-kʋʋdbã, ne Leevi nebã n so maoong sẽn yõogd bugmã, ne lagem-n-taar maoongã tʋʋmde, la roogã tʋʋm a taabã, ne bark pʋʋsgã ne pẽgr yɩɩlã, Sẽn-Ka-Saab sik zĩigã rignoyẽ wã.

³ Rĩmã rag n yãka pʋɩɩr a paoongã pʋg n kõ tɩ b na n maand yibeoog ne zaabr maoong sẽn yõogd bugmã, ne vʋʋsg rayã maandã, la ki-paalã maandã b sẽn maand wa sẽn zems Sẽn-Ka-Saabã tõogã sẽn gʋlsã.

⁴ La rĩmã yeela Zeruzalɛm nebã tɩ b ges maan-kʋʋdbã ne Leevi nebã yell n kõb-b pʋɩɩre, tɩ b tõe n paam daood Sẽn-Ka-Saab tõogã sakr pʋgẽ.

⁵ Rĩmã koɛɛgã sẽn saagã kɩtame tɩ Israyɛll kambã wa kõ bɩle wã, la reezẽ rãamã, kaamã, la sɩɩdã, ne bõn-koaadlã fãa dẽenem biisã. La bãmb talla bõn-bãmbã fãa piig pʋɩɩr me n wa.

⁶ Woto me, Israyɛll kambã ne Zʋʋda neb nins sẽn be-b Zʋʋda tẽngã pʋgẽ wã, waa ne rũm-bɛdã la rũm-bãoonegã piig pʋɩɩre, la b wa ne kũun nins sẽn welg toor Sẽn-Ka-Saab yĩngã n lagem n sam-b rʋy toay-toaya.

⁷ La bãmb sɩnga koodã samb rʋy-rʋy kiuug a tãab soabã n wa tɩ basa kiuug a yopoe soabã.

⁸ Rĩm a Ezekɩyaas ne a nanambsã wa n gesa kũunã sẽn sam rʋy-rʋyã, la bãmb pʋʋs Sẽn-Ka-Saab barka, la b ning nebã barka.

⁹ A Ezekɩyaas soka maan-kʋʋdba ne Leevi nebã kũunã yell sẽn na n yɩ to-to.

¹⁰ La maan-kʋʋd kãsem a Azariya sẽn yaa a Sadok buudã nedã leoka yẽnda n yeele: Nebã sẽn sɩng n wat ne b kũunã Sẽn-Ka-Saab roogẽ wã tɛka, tõnd dɩtame n tɩgda, la baoosgo, keta wʋsgo. Bala, Sẽn-Ka-Saab ninga b nebã barka, la yaa sẽn ketã la sẽn sam rʋy-rʋyã.

¹¹ La rĩm a Ezekɩyaas yeelame tɩ b maneg rot Sẽn-Ka-Saab roogã zak pʋga, la b manegame.

¹² Woto, b ra tallda dẽenem biisã ne piig pʋɩɩrã, la nonglem kũunã n watẽ. La yaa Leevi ned a Konaniya nea yao Sɩme n dag n yaa teedã bĩngr taoor dãmba.

¹³ Rĩm a Ezekɩyaas ne maan-kʋʋd a Azariya yãka a Yeyiyɛlle, ne a Azaziya, la a Nahate, ne a Azayɛlle, la a Yerimote, ne a Zozabaade, la a Eliyɛlle, ne a Ismakiya, la Mahate, ne a Benaya, tɩ b na n yɩ yel-gɛtb n sõngd a Koniya ne a yao a Sime.

¹⁴ Leevi ned a Imna biig a Koore sẽn yaa yaang rignoorã gũudã, n dag n yaa nonglem kũunã nebã sẽn kõt Sẽn-Ka-Saabã gũuda. La yaa yẽnda n dag n welgd dẽenem biisã ne kũun sẽn welg toor n yɩɩdã n pʋɩta.

¹⁵ Maan-kʋʋdbã tẽms pʋse, yaa a Edɛn, a Miniyamin, a Yesuwa, a Semaya, a Amariya ne a Sekaniya n dag n sõngd yẽnda n pʋɩt b saam-biisã rɩɩbã, wa sẽn zems b sagse. La b rag n ka welgd kãsem ne yao n bak ye.

¹⁶ La sẽn leb n paas raop nins sẽn tar yʋʋm a tãab la sẽn yɩɩd dẽ wã yʋy sẽn gʋls tɩ b reegdb pʋɩɩrã toog sẽn ka be, b rãmb nins fãa sẽn dag n kẽed Sẽn-Ka-Saab roogã pʋgẽ n maand tʋʋmdã daar fãa wã, rag n reegda bãmb tʋʋmd ning b sẽn maandã yĩnga, wa sẽn zems a sagse.

¹⁷ B rag n gʋlsda maan-kʋʋdbã wa sẽn zems b roto, la sã n yaa ne Leevi nebã, b rag n gʋlsda bãmb wa sẽn zems b tʋʋmdã sulli, la b sagse, la yaa sẽn sɩng ne yʋʋm pisi, la sẽn yɩɩd dẽndã.

¹⁸ B rag n naagda b zaka rãmb fãa n gʋlsdẽ: Yaa b pagbã, b kom-dibli wã, la b kom-pugli wã, bala, b fãa rag n yɩlga b mense.

¹⁹ La sã n yaa ne maan-kʋʋdb nins sẽn yaa Aarõ yagensã sẽn be-b tẽmsẽ wã, b rag n yãkã neb tɩ b pʋɩt maan-kʋʋdbã sʋk neb nins sẽn yaa raopã, la Leevi neb nins fãa yʋy b sẽn gʋlsã b pʋɩɩre.

²⁰ A Ezekɩyaas maana woto Zʋʋda soolmã fãa pʋgẽ. Yẽnda maana sẽn yaa sõama, la tɩrga, la sẽn zems Sẽn-Ka-Saab sẽn yaa yẽnda Wẽnnaamã nifẽ.

²¹ La tʋʋmd ning fãa yẽnda sẽn maan Sẽn-Ka-Saab roogã yĩngã, ne tõogã yẽnda sẽn sakã pʋgẽ, yɩɩ a Wẽnnaamã la a rag n baood nea sũur fãa, la a paama tõogre.