2 Kibayã 27 - WẼNNAAM SEBRE 2014

A Yotam rĩungu

¹ A Yotam sẽn wa n na n lebg rĩmã, t'a tara yʋʋm pisi la a nu, la yẽnda rɩɩ naamã yʋʋm piig la a yoob Zeruzalɛm. Yẽnda ma wã yʋʋr la a Yeruusa n yaa a Sadok bi-pugla.

² A Yotam maana sẽn yaa neer Sẽn-Ka-Saabã nifẽ, wa yẽnda ba a Oozɩyaase, la yẽnda ka sak n kẽ Sẽn-Ka-Saab roogã pʋg ye. La nebã rag n ket n maanda tʋʋm-beedo.

³ Yaa yẽnda n me Sẽn-Ka-Saab roogã no-kãsengã, la a me meeb a taab wʋsg Ofɛll lalgã zugu.

⁴ A leb n mee tẽms Zʋʋda tãmsã zutu, la a ning tãnsoben-dot la gãsd pʋtã noyã.

⁵ Yẽnda zaba ne Amo rĩmã n tõog-a. La yʋʋm-kãnga Amo nebã kõ-a Yotam wanzuri talã koabga, la bɩle pet tus-piiga, ne Oorz pet tus-piiga. Yaa woto n yɩ Amo nebã yaoodo, yʋʋm-kãnga, la yʋʋm a yiibẽ soabã ne a tãabẽ soabã me.

⁶ A Yotam paama pãng wʋsgo, bala, yẽnda rag n kẽnda ne Sẽn-Ka-Saabo.

⁷ A Yotam tʋʋmã a taabã fãa, la a zabã, ne a sẽn maan bũmb ning fãa wã gʋlsa Israyɛll ne Zʋʋda rĩm-dãmb sebr pʋga.

⁸ A Yotam sẽn wa n na n lebg rĩmã, t'a tara yʋʋm pisi la a nu, la yẽnda rɩɩ naamã yʋʋm piig la a yoob Zeruzalɛm.

⁹ A Yotam kiime n bʋʋg a saam-dãmba, la b muma yẽnda a Davɩɩd tẽnga pʋga. La a biig a Akaaz leda yẽnda zĩigẽ n dɩ naamã.