2 Kibayã 25 - WẼNNAAM SEBRE 2014

A Amatsɩya rĩungu

¹ A Amatsɩya sẽn wa n na n lebg rĩmã t'a rag n tara yʋʋm pisi la a nu, la a rɩɩ naamã yʋʋm pisi la a wɛ Zeruzalɛm. La yẽnda ma wã yʋʋr da boondame t'a Zewohadan, n yit Zeruzalɛm.

² A Amatsɩya maana sẽn yaa neer Sẽn-Ka-Saabã nifẽ, la ka yɩ ne-a sũurã fãa ye.

³ La yẽnda naamã sẽn wa n paam pãnga, yẽnda kɩtame tɩ kʋ yẽnda zakã pʋgẽ neb nins sẽn dag n kʋ yẽnda rĩmã sẽn dag n yaa yẽnda ba wã.

⁴ La yẽnda ka kʋ nin-kʋʋdbã kamb ye, yẽnda maana wa sẽn gʋls a Moyiis tõogã sebr pʋgẽ wã. Sẽn-Ka-Saab goma be n yeel yaa: «Ba-rãmb ka tog n ki b kamb beegr yĩng ye. La kambã me ka tog n ki b ba-rãmb beegr yĩng ye. Ned kam fãa na n ki a meng beegr yĩnga.»

⁵ A Amatsɩya tigma Zʋʋda ne Benzame nebã, n yalsg-b roog-roogo, n vigl neb koabg-koabg la neb tusr-tusr nanambse. La a kɩtame tɩ b sõd sẽn dag n tar-b yʋʋm pisi bɩ sẽn yɩɩd rẽndã wã, la b paama neb sẽn ta tus kobs-tã sẽn mi zabr sõama n tõe n zã kãnd la gãong n zabe.

⁶ La Amatsɩya baoo gãndaad tus-koabg Israyɛll pʋgẽ, n yao-b wanzuri talã koabga, n kɩt tɩ b lebg a tãb-biisi.

⁷ La Wẽnnaam dao a yembr n wa yẽnda nengẽ n wa yeel-a yaa: «N'na! Ra bas-y tɩ Israyɛll tãb-biis wa naag yãmb ye. Bala, Sẽn-Ka-Saab ka be ne Israyɛll ne Efrayiim nebã ye!»

⁸ Bãmb tãb-biisã sã n wa naag yãmba, baa ne yãmb pãngã sẽn yaa to-to ningã fãa, Wẽnnaam na n kɩtame tɩ y bɛɛbã tõog-yã. Bala, yaa Wẽnnaam n tar pãng n tõe n kɩt tɩ b tõoge, wall a kɩt tɩ b ra tõog ye.

⁹ Dẽ, a Amatsɩya soka Wẽnnaam daoã yaa: «La m na maana wãn moasã ne wanzuri talã koabgã mam sẽn kõ Israyɛll tãb-biisã?» La Wẽnnaam daoã leoka yẽnda n yeel-a yaa: «Sẽn-Ka-Saab tõe n kõo foom sẽn yɩɩd dẽnda.»

¹⁰ Woto, a Amatsɩya kɩtame tɩ tãb-biis nins sẽn yi Efrayiim n wa wã leb b tẽngẽ. Dẽ, tãb-bi-bãmb sũurã yika wʋsg ne Zʋʋda nebã, la bãmb lebg n kuila ne sũ-yikr wʋsgo.

¹¹ Dẽ, a Amatsɩya paama pãnga, la yẽnda talla a tãb-biisã n kẽng yamsem longẽ wã, n tɩ kʋ Seyɩɩr kambã tus-piiga.

¹² Zʋʋda nebã leb n yõga bãmb neb tus-piig vɩɩse, n tall-b n dʋ pĩig sẽn lug zug n tus-b tɩ b lʋɩ n bedse.

¹³ Baoosgo, Israyɛll ne Efrayiim tãb-biis nins a Amatsɩya sẽn dag n kɩt tɩ b lebg kuil n ka naag yẽnda zabrẽ wã, b lebg n kẽe Zʋʋda tẽmsã pʋs sẽn sɩng ne Samaari, hal n tãag Bɛt-Horon neb sẽn ta tus a tã, la b fã paoong wʋsg n tall n looge.

Israyɛll rĩm a Zoaas tõoga a Amatsɩya

¹⁴ A Amatsɩya sẽn tɩ zab ne Edom nebã n tõog n lebgdẽ wã, yẽnda talla Seyɩɩr kambã wẽn-naands n wa, la a rɩk-b tɩ b lebg yẽnda wẽnnaam-dãmb n wõgemd bãmb taoor n waoog-b la a yõogd wisd n kõt-ba.

¹⁵ Woto kɩtame tɩ Sẽn-Ka-Saab sũur puug ne a Amatsɩya, la bãmb tʋma b no-rɛɛs t'a wa yeel-a yaa: «Bõe tɩ f waoog wẽnnaam-dãmbã sẽn ka tõog n fãag b neb fo meng nugẽ?»

¹⁶ No-rɛɛsã sẽn wa n gomdã wakate, a Amatsɩya leokame yaa: «Ãnda soab n yãk foom tɩ f sagend rĩmã? Bas f goamã woto, tɩ b ra wa kʋ-f ye.» Dẽ, no-rɛɛsã baasa a pĩnd-n-bãngr goamã n yeel-a yaa: «Moasã, mam miime tɩ Wẽnnaam yãka yam n na sãam foom, fo sẽn ka kelg mam saglsã yĩngã.»

¹⁷ Dẽ zugẽ, Zʋʋda rĩm a Amatsɩya zĩnda ne a nebã n yẽse, a kɩtame tɩ b tɩ yeel Israyɛll rĩm a Zehu biig a Yohakaaz biig a Zoaas yaa: «Wa-y tɩ d zab taaba.»

¹⁸ La Israyɛll dĩm a Zoaas tʋmame tɩ b tɩ yeel Zʋʋda rĩm a Amatsɩya yaa: «Libã gõaag n tʋm tɩ b tɩ yeel Libã sɛɛdr tɩɩgã yaa: ‹Rɩk f bi-puglã n kõ-m biigã t'a maan a paga›, la Libã we-rũng a yembr n wa n pɩʋʋg n tab gõaagã.

¹⁹ Ade, fo yetame: ‹mam tõoga Edom nebã.› La fo sũurã yaa noogo, tɩ f waoogd f menga. La pĩnd n pa f zĩigẽ. Bõe yĩng tɩ f baood n na n wã f meng la f naag Zʋʋda nebã fãa me wã?»

²⁰ La a Amatsɩya ka kelg ye. Bõn-kãng rag n yita Wẽnnaam nengẽ. Bala, bãmb dag n datame tɩ Israyɛll nebã tõog-ba. Bãmb sẽn waoog Edom nebã wẽn-naandsã yĩnga.

²¹ Woto, Israyɛll dĩmã a Zoaas kẽngame tɩ yẽnda ne Zʋʋda rĩm a Amatsɩya seg taab Zʋʋda tẽng a yembr sẽn boond tɩ Bɛtsemees n na n zabe.

²² La Israyɛll nebã tõoga Zʋʋda nebã, la bãmb ned kam fãa zoe n kuila a yiri.

²³ Israyɛll rĩm a Zoaas yõka Zʋʋda rĩm a Amatsɩya Bɛtsemees n talla n kẽng Zeruzalɛm. La yẽnda luba Zeruzalɛm lalgã sẽn tat kãntɩɩg kobs-naase, sẽn sɩng ne Efrayiim noore, n tall n ta lalgã gõdrẽ.

²⁴ La yẽnda wʋka sãnemã la wanzuri wã, la teed nins fãa sẽn dag n be Wẽnnaam doogã pʋgẽ a Obɛɛd Edom nengẽ wã. La a wʋk na-yirã arzegsã fãa, la a yõg yembs n tall n leb Samaari.

A Amatsɩya naam baoosgo

²⁵ Zʋʋda rĩm a Zoaas biig a Amatsɩya kell n vɩɩmda yʋʋm piig la a nu, Israyɛll dĩm a Yohakaaz biig a Zoaas kũumã zugẽ.

²⁶ A Amatsɩya tʋʋmã a taabã a sẽn maanã sɩngr n tɩ tãag baoosg fãa gʋlsa Israyɛll ne Zʋʋda rĩm-dãmbã kibayã sebr pʋga.

²⁷ Sẽn sɩng ne wakat ning a Amatsɩya sẽn bas Sẽn-Ka-Saabã tũubã, neb n sed ne taab Zeruzalɛm n dat n kʋ-a, la a Amatsɩya zoeeme n kẽng Lakɩɩse. La b tʋma neb tɩ b pʋgla n kẽng Lakɩɩs tẽng n tɩ kʋ.

²⁸ La b tall-a-la ne wiidi n wa mum-a Zʋʋda tẽngã pʋgẽ n naag a saam-dãmbã.