2 Kibayã 23 - WẼNNAAM SEBRE 2014

B kõo a Zoaas a ba naam

¹ Yʋʋm a yopoe soabã pʋga, maan-kʋʋd a Zehozada paama pãnga, n maan kaool ne tãb-biis kobs-kobs nanambsã. Yaa a Zeroham biig a Azariya, na a Yohanan biig a Ismayɛlle, la a Obɛɛb biig a Azariya, ne a Adaya biig a Maseya, la a Zikri biig a Elisafate.

² Nin-bãmb yikame n saag Zʋʋda tẽmsã fãa, n tigs Leevi nebã, ne Israyɛll buudã nanambs tɩ b wa Zeruzalɛm.

³ La zãma wã fãa sẽn tigma maana kaool ne rĩmã Sẽn-Ka-Saab roogã pʋga. La a Zehozada yeel-b lame yaa: «Ade, rĩm a Akaazɩya biigã la woto, yẽnda n tog n dɩ naamã wa Sẽn-Ka-Saab sẽn dag n kãab n gom a Davɩɩd kambã wɛɛngẽ wã.

⁴ Dẽ wã, ad yãmb sẽn na n maan bũmb ninga. Maan-kʋʋdbã ne Leevi neb nins sẽn tog n maan b tʋʋmdã vʋʋsg daarã, na n weela taab sull a tãabo, sull a ye wã na n gũ Sẽn-Ka-Saab roogã rignoore,

⁵ tɩ sull a yembrã gũ na-yirã, t'a yembrã zĩnd rignoor ning b sẽn boond tɩ Yesoodã, la nebã fãa sẽn ketã na n zĩnda Sẽn-Ka-Saab wẽnd doogã zak pʋga.

⁶ Ned ba a ye ka tog n kẽ Sẽn-Ka-Saab roogã pʋg tɩ sã n ka maan-kʋʋdbã ne Leevi nebã sẽn tʋmd badaarã ye. Bãmb tõe n kẽeme, bala, b welga bãmb toore. La bɩ nebã fãa sak n maan Sẽn-Ka-Saab sẽn yeel bũmb ningã.

⁷ Leevi nebã na n gũbga rĩma. La bãmb ned kam fãa na n zãada a zab-teedo, la ned sã n kɩɩs n kẽ bɩ b kʋ-a, la bãmb tog n yãaga dĩmã a sẽn dabd zĩig ningã fãa.»

⁸ Leevi nebã ne Zʋʋda nebã fãa maana wa maan-kʋʋd a Zehozada sẽn yeel bãmb bũmb ningã. Dẽ, tãb-biis kobs-kobs nanambsã fãa peega a nebã. Yaa neb nins sẽn da sɩngd-b tʋʋma, la sẽn sigd-b tʋʋmã vʋʋsg raarã, bala, maan-kʋʋd a Zehozada ka bas ned ba a yembr t'a kuil ye.

⁹ Dẽ, maan-kʋʋd a Zehozada wʋka kãna, ne gãn-bɛd la gãn-bãooneg nins sẽn dag n yaa dĩm a Davɩɩd dẽndã sẽn dag n be Wẽnnaam doogã pʋgã, n kõ tãb-biis kobs-kobs nanambsã.

¹⁰ Yẽnda kɩtame tɩ nebã zãad b zab-teedã n yals sẽn sɩng ne Sẽn-Ka-Saab roogã rɩtg kɩrengã, n tɩ tãag a goabg kɩrengã, Sẽn-Ka-Saab roogã tẽn-kugrã sɛɛga, n yegl Sẽn-Ka-Saab roogã n gũbg rĩma.

¹¹ La a Zehozada ne a kambã yiisa rĩma biig n fõgna naamã maanfo, la b kõ-a kãabgã kaset sebr n kõ-a naamã. La bãmb pʋdga yẽnda naam kaam n kelem n yeele: «Wẽnd na kaoos rĩmã.»

¹² A Atali sẽn wʋm nebã sẽn zoet la b kaasdẽ n yetẽ tɩ Wẽnd na kaoos rĩma bʋrgã, yẽnda yikame n bʋʋg nebã Sẽn-Ka-Saab roogã pʋga.

¹³ La yẽnda sẽn gesã, a mikame tɩ rĩma yɛsa Sẽn-Ka-Saab roogã noore. La bar-pɛɛbdbã, ne tãb-biis kobs-kobs nanambsã ra yɛsa rĩma sɛɛgẽ. La tẽngã nebã fãa ra maanda sũ-noogo, la b ra peebda tãntãado, tɩ yʋʋmbã wẽed b yʋʋm teedã tɩ nebã yɩɩndẽ. Woto a Atali kẽesa a futã n kelem n yeele: «B zãmba maam, b zãmba maam!»

¹⁴ Dẽ, maan-kʋʋd a Zehozada kɩtame tɩ tãb-biis kobs-kobs nanambsã sẽn yaa tãb-biisã taoor dãmbã yi, la a yeel-b yaa: «Yiis-y-yã-a nebã sʋka! La ned ning sẽn na n pʋga pʋg-kãngã, bɩ b kʋ a soab ne zabr sʋʋga!» Bala, maan-kʋʋd a Zehozada rag n yeelame tɩ b ra kʋ-a Sẽn-Ka-Saab roogã zak pʋgẽ ye!

¹⁵ Dẽ, bãmb yõka a Atali n tall-a n tees na-yirã sẽnẽ, la bãmb sẽn ta na-yirã wiidi rignoorẽ wã, b kʋ-a lame.

¹⁶ A Zehozada, ne rĩmã, la nin-buiidã maana kaool tɩ bãmb na n yɩɩ Sẽn-Ka-Saabã nebã.

¹⁷ La nin-buiidã fãa tũu taab n kẽng zĩig ning a Baall doogã sẽn be wã, n tɩ tusa n lubi, la b wã a tẽn-kugã ne a wẽn-naandgã, la b kʋ Baall maan-kʋʋd a Matã tẽn-kugã taoore.

¹⁸ Dẽ zugẽ, a Zehozada rɩka Sẽn-Ka-Saab roogã tʋʋmd yell n kõ maan-kʋʋdbã, la ne Leevi nebã. A Davɩɩd da welg-b lame n kõ ned kam fãa ne a tʋʋmd Sẽn-Ka-Saab roogã pʋgã, tɩ wa a Moyiis tõogã sẽn gʋls to-to wã, bɩ b maand maoong sẽn yõogd bugum ne yɩɩl la sũ-noogo.

¹⁹ La Davɩɩd da kɩtame tɩ gũudb gũud Sẽn-Ka-Saab roogã rignoy sẽn na n yɩlẽ tɩ bũmb sẽn yaa rẽgd ra tõog n kẽ be ye.

²⁰ Maan-kʋʋd a Zehozada kɩtame tɩ tãb-biis kobs-kobs nanambsã, la nanambsã, la nin-buiidã taoor dãmbã, la tẽngã nebã fãa peeg rĩmã n yiis Sẽn-Ka-Saab roogã pʋg n tũ yĩngr dignoorã n kẽ na-zakẽ wã, n zaoolg-a a naamã geer zugu.

²¹ Tẽngã nebã fãa rag n maanda sũ-noogo, la b sẽn kʋ a Atali ne zabr sʋʋgã poore, tẽngã gãanda bãane.