2 Kibayã 20 - WẼNNAAM SEBRE 2014

B wa n zaba ne Zʋʋda tẽngã

¹ Bõn-kãens zugẽ, Moaab nebã, ne Amo nebã, n paas Mao nebã, waame n na zab ne a Zozafate.

² La b wa n togsa a Zozafat n yeel-a yaa: «Neb kʋʋng wʋsg sẽn yi ko-kãsengã rʋʋnde, sẽn sɩng ne Siiri, n wa n na n zab ne yãmba, la b bee Hatsatsõ-Tamaar sẽn dat n togs tɩ ‹Ɛnd-Gedi.› »

³ Dẽ, rabeem wʋsg yõka a Zozafate, t'a yãk yam n na n bao Sẽn-Ka-saabo, yẽnda moona no-loeer Zʋʋda tẽmsã fãa pʋsẽ.

⁴ Zʋʋda nebã tigmame n na n bao Sẽn-Ka-saabo. Nebã yii Zʋʋda tẽmsã fãa pʋsẽ n na n wa bao Sẽn-Ka-Saabo.

⁵ A Zozafat yalsa Zʋʋda ne Zeruzalɛm zãma wã sʋka, bãmb dag n tigma taab Sẽn-Ka-Saab roogã zak pʋg sẽn teesd zag-paalgã noorã.

⁶ La a yeelame yaa: «Sẽn-Ka-Saab sẽn yaa tõnd ba-rãmbã Wẽnnaam, yaa yãmb bal n yaa Wẽnnaam sẽn be saasẽ, la y rɩta naam soolem toay-toayã rĩundã fãa zutu. Yãmb tara pãng la tõogo, la ned ba a yembr ka tõe n yals yãmb taoor ye.

⁷ Tõnd Wẽnnaam, ka yãmb n dig tẽn-kãngã nebã Israyɛll sẽn yaa yãmb nebã taoore, n dɩk b tẽngã n kõ a Abrahaam sẽn yaa y zoa wã yagens sɩda?

⁸ Bãmb kẽe tẽngã n zĩndi, la b mee sɛk roog yãmb yĩnga, la y yʋʋrã yĩnga, n yeele:

⁹ ‹Toog sã n wa paam tõndo: Sã n yaa tẽn-kũum, wall bã-longdem bɩ kom, tɩ tõnd sã n yals yãmb taoor do-kãngã y yʋʋrã sẽn be a pʋgẽ wã taoore, n kelem n bool yãmb d toogã pʋgẽ, yãmb na n leoka tõndo, n fãag-do.› »

¹⁰ «La moasã, ad Amo ne Moaab tẽngã nebã, la Seyɩɩr soolem ning sẽn be tãms sʋkã nebã, sẽn wa n na n zab ne tõndo. Yãmb sẽn wa n yiis Israyɛll kambã Ezɩpt soolmẽ wã, yãmb ka sak tɩ Israyɛll kambã kẽ b tẽmsẽ wã ye. Bala, bãmb gila tẽn-bãmb n loog n ka sãam-b ye.

¹¹ La ade, nin-bãmbã sẽn dond tõnd bũmb ninga, yaa tɩ b wa n na n diga tõnd n yiis yãmb soolem ning y sẽn kõ tõndã pʋgẽ.

¹² Tõnd Wẽnnaam, dẽ yĩnga, yãmb kõn kao bãmb bʋʋd sɩda? Bala, tõnd ka pãng ne zãma-kãngã sẽn wa n na n zab ne tõndã ye. Tõnd ka mi d sẽn na n maan bũmb ninga ye. Tõnd ninã geta yãmb bala.»

Sẽn-Ka-Saab kõo Zʋʋda nebã tõogre

¹³ Zʋʋda nebã fãa rag n yasa Sẽn-Ka-Saabã taoor ne b zagsã rãmb fãa, b pagba, la b kamba.

¹⁴ Woto, Sẽn-Ka-Saab Sɩɩgã siga Leevi ned a Zakari biig a Azayɛll zug zãma wã sʋka. A Zakari yaa a Benaya biiga, t'a Benaya yaa a Yeyiyɛll biiga, t'a Yeyiyɛll yaa Leevi ned a Mataniya biiga, la bãmb yaa a Azaf yagense.

¹⁵ Dẽ, a Azayɛll yeelame yaa: «Yãmb sẽn yaa Zʋʋda, ne Zeruzalɛm nebã, la yãmb rĩm a Zozafate! Kelg-y neere, ad Sẽn-Ka-Saab sẽn yet yãmba: ‹Da zoe-y rabeem, la y ra yɛɛs-y zãma-kãngã taoor ye. Bala, zab-kãngã ka yãmb zabr ye, yaa Wẽnnaam zabre.›

¹⁶ Beoogo, bɩ y sig n zab ne y bɛɛbã. Ade, bãmb na n tũu Sɩts kunkubrã zug sorã n wa, la yãmb na n yãnda bãmb ko-soogã noor sẽn tees Yeruwɛll we-raoogã.

¹⁷ La bãng-y tɩ ka zabr la y na n zab ye. Kẽng-y be n tɩ yalse, yals-y yĩngr bal n ges fãagr ning Sẽn-Ka-Saab sẽn na n fãag Zʋʋda ne Zeruzalɛm nebã. Da zoe-y rabeem, la ra yɛɛs-y ye! Beoogo, bɩ y yi n seg-ba, la maam a Sẽn-Ka-Saab na n zĩnda ne yãmba.»

¹⁸ A Zozafat sẽn wʋm woto, a wõgemdame n fõgen a neng tẽng Sẽn-Ka-Saab taoore, la Zʋʋda ne Zeruzalɛm nebã fãa me wõgemdame n fõgen b nens tẽng Sẽn-Ka-Saab taoore.

¹⁹ La a Kehat yagensã, ne a Koore yagensã sẽn yaa Leevi buudã nebã yikame n zẽk b koees ne pãnga, n pẽg Sẽn-Ka-Saab sẽn yaa Israyɛll Wẽnnaamã.

²⁰ La vẽkembeoog yibeoog pĩnda, nebã yikame n yi n na n kẽng Tekoa we-raoogẽ wã. Bãmb sẽn wa n loogdẽ wã, a Zozafat yeel-b lame: «Zʋʋda ne Zeruzalɛm nebã, kelg-y maam, teeg-y Sẽn-Ka-Saabo, la bãmb na n tebenda yãmba, kɩs-y b no-rɛɛsdbã sɩda, la yãmb na n tõogame!»

²¹ Woto, a Zozafat yẽsa ne nebã, la a yãk yɩɩn-yɩɩndb Sẽn-Ka-Saab yĩnga, tɩ b na n lʋɩ tãb-biisã taoore, n pẽgd Sẽn-Ka-Saab b sẽn yaa pʋ-peelem soabã yĩng n yetẽ: «Pẽg-y Sẽn-Ka-Saabo! Bala, bãmb nonglmã paada wakat fãa!»

²² La wakat ning bãmb sẽn zẽk b koees n yɩɩnd pẽgr yɩɩlã, Sẽn-Ka-Saab kɩtame tɩ zũnglug zĩnd Amo ne Moaabe, la Seyɩɩr soolem ning sẽn be tãms sʋkã nebã sẽn dag n wa Zʋʋda wã sʋka, tɩ b kʋ taaba.

²³ Amo ne Moaab nebã naaga taab n zab ne neb nins sẽn yit-b Seyɩɩr soolem ning sẽn be tãms sʋkã, n kʋ-b zãnga. Bãmb sẽn kʋ Seyɩɩr nebã zãng n sɛ, bãmb wẽnemdame n kʋ taaba.

²⁴ Zʋʋda nebã sẽn ta kunkubr ning zug b sẽn dʋʋd n get we-raoogã, bãmb wẽnemdame n ges kʋʋngã sẽn beẽ wã sẽnẽ, la b mikame tɩ yaa kũum bal n dʋre, ned ba a yembr ka põs ye.

²⁵ Woto, a Zozafat ne a nebã kẽngame n tɩ zɛ b paoongã, la b yãnda rũms wʋsgo, la arzegse, ne kũum wʋsgo, la te-sõama buud toor-toore. Ned kam fãa wʋkame hal n ka tõe n tʋk ye. La yaa rasem a tãab la bãmb sẽn dɩk n zɛ teedã, bala, teedã rag n yaa wʋsgo.

²⁶ La rasem a naasã daare, bãmb tigma taab Beraka tãn-longẽ wã n pʋʋs Sẽn-Ka-Saabã barka, yaa rẽ n kɩt tɩ b boond zĩ-kãng tɩ Beraka hal tɩ ta rũndã.

²⁷ Dẽ, a Zozafat lʋɩɩ Zʋʋda ne Zeruzalɛm nebã fãa taoore, tɩ b lebg n leb Zeruzalɛm ne sũ-noogo, Sẽn-Ka-Saab sẽn fãag bãmb b bɛɛbã nusẽ wã yĩnga.

²⁸ Bãmb wẽe kʋla, la b wãag ruudsi, la b peebd tãntãad n kẽ Zeruzalɛm hal n ta Sẽn-Ka-Saab roogẽ wã.

²⁹ Soolem-dãmb a taabã sẽn wʋm tɩ Sẽn-Ka-Saab sõnga Israyɛll n zab ne b bɛɛbã, Wẽnnaam dabeem zoees yõka bãmba.

³⁰ Woto, a Zozafat soolmã zĩnda bãane, la yẽnda Wẽnnaamã kõ-a-la vʋʋsg tẽngã todsã fãa pʋsẽ.

A Zozafat naamã baoosgo

³¹ A Zozafat rɩɩ naam Zʋʋda soolmã pʋga. Yẽnda sẽn wa n na n deeg naamã t'a tara yʋʋm pis-tã la a nu, la yẽnda zĩnda Zeruzalɛm n dɩ naamã yʋʋm pisi la a nu, a ma wã yʋʋr la a Azuba, n yaa a Sɩlki biiga.

³² A Zozafat tũ a ba a Aaza naoor n ka tol n bʋdg ye. Yẽnda maana sẽn yaa neer Sẽn-Ka-Saab nifẽ.

³³ La baoosgo, b kell n ka menes maoong kʋʋb zĩisã ye. Bala, nebã rag n nan ka loe b sũyã zãng fasɩ ne Wẽnnaam ning sẽn yaa bãmb yaab-rãmbã wẽnnaamã ye.

³⁴ A Zozafat tʋʋm a taabã a sẽn maanã sɩngr n tɩ tãag a baoosg fãa gʋlsa a Hanani biig a Zehu sebrã pʋgẽ, la yaa seb-kãng la b tall n gʋls Israyɛll rĩm-dãmbã sebre.

³⁵ Dẽ zugẽ, Zʋʋda rĩm a Zozafat tɩ maana lageng ne Israyɛll dĩm a Akaazɩya, la a Akaazɩya yaool n dag n maanda wẽnga.

³⁶ Bãmb lagma taab n na n maan koom kogond sẽn na n kẽnd Tarsɩɩse. Bãmb maana koom kogendã Esɩyõ Gebɛɛr tẽngã.

³⁷ La Maresa tẽng rao a Dodawayu biig a Eliyezɛɛr togsa a Zozafat pĩnd-n-bãngr goam n yeel-a yaa: «Fo sẽn tɩ naag f meng ne a Akaazɩya wã yĩnga, Sẽn-Ka-Saab na n sãama fo tʋʋma.» La koom kogendã sãamame n ka tol n tõog n kẽng Tarsɩɩs ye.