2 Kibayã 15 - WẼNNAAM SEBRE 2014

A Aaza manega a soolmã

¹ Wẽnnaam Sɩɩgã waa a Odɛɛd biig a Azariya zugu,

² la yẽnda kẽnga rĩm a Aaza nengẽ n tɩ yeele: «Aaza, la yãmb fãa Zʋʋda ne Benzame nebã, kelg-y-yã! Yãmb sã n pa ne Sẽn-Ka-Saabo, bãmb me na n paa ne yãmba. Yãmb sã n bao bãmba, bãmb na n basame tɩ y yãnd-ba. La yãmb sã n bas bãmba, bãmb me na n basa yãmba.

³ Hal pĩnda, Israyɛll dag n kaoosame n ka leb n tar Wẽnnaam sɩd-sɩdã, la b ka tar maan-kʋʋd sẽn kõt zãmsgo, la b ka tar tõog ye. La b ra ka tar maan-kʋʋdb sẽn zãmsd bãmb ye, la b ra ka leb n tar Wẽnnaam tõodã me ye.

⁴ La b toogã pʋgẽ, b lebgame n bao Sẽn-Ka-Saab sẽn yaa Israyɛll Wẽnnaamã, la Sẽn-Ka-Saab basame tɩ b yãnd-ba.

⁵ Wakat-kãng tɩ ned ba a ye rag n ka tõe n yi la a lebg n kẽ ne bãan ye, rag n yaa toog tẽmsã fãa yĩnga.

⁶ Soolem-dãmbã rag n zabda ne taaba, la tẽmsã me ra zabda ne taaba. Bala, Wẽnnaam dag n rãmbda bãmb ne toog buud toor-toore.

⁷ La sã n yaa yãmba, keng-y y sũuri, la y ra boog y raood ye. Bala, tʋʋm ninsã fãa yãmb sẽn maandã na n paama keoore.»

⁸ A Aaza sẽn wʋm a Odɛɛd biig a Azariya bãngr goamã, a paama raood n menes bõn-naandsã fãa sẽn be Zʋʋda ne Benzame soolmã pʋse, la ne tẽms nins yẽnda sẽn zab n dees Efrayiim tãmsẽ wã fãa pʋsẽ me. Yẽnda lebs n mee tẽn-kugr ning sẽn dag n be Sẽn-Ka-Saab zãongã noorã.

⁹ A Aaza tigma Zʋʋda ne Benzame nebã, la neb nins sẽn dag n yi Efrayiim ne Manaase, la Sɩmyõ tẽmsã n be ne yẽnda a soolmã pʋgẽ. Bala, Israyɛll neb wʋsg rag n basa b tẽmsã wa n be yẽnda soolmã pʋgẽ, bãmb sẽn yãnd tɩ Sẽn-Ka-Saab sẽn yaa yẽnda Wẽnnaamã bee ne yẽnda wã yĩnga.

¹⁰ La yaa a Aaza sẽn deeg a naamã tɩ yʋʋm naaslẽ, kiuug a tãabẽ soabã la bãmb tigim taab Zeruzalɛm.

¹¹ La badaare, bãmb yãka bũmb ningã b sẽn tɩ paam zabrã zĩigẽ wã n maan maoong n kõ Sẽn-Ka-Saabo. Yaa niig kobs-yopoe, la rũm-bãooneg tus a yopoe.

¹² Dẽ, bãmb maana kaoola, n dɩk sard tɩ b na n baoo Sẽn-Ka-Saab sẽn yaa b yaab-rãmbã Wẽnnaamã ne b sũur fãa, la ne b yamã fãa.

¹³ La ned sẽn yaa bi-bɩɩg bɩ kãsmã, bɩ paga wall raoa, sã n ka bao Sẽn-Ka-Saab sẽn yaa Israyɛll Wẽnnaamã, bɩ b kʋ-a a soaba.

¹⁴ Dẽ, bãmb wẽena ne Sẽn-Ka-Saab n zẽk b koeesã n kaase, la b wẽ nug poak n peeb bard ne tãntãado,

¹⁵ la Zʋʋda nebã fãa maana sũ-noog ne wẽen-kãnga. La bãmb wẽenegã sẽn dag n yaa ne b sũur fãa, la tɩ b baood Sẽn-Ka-Saab ne b sũur fãa wã yĩng kɩtame tɩ Sẽn-Ka-Saab bas tɩ b yãnd bãmba, la Sẽn-Ka-Saab kɩtame tɩ b paam vɩ-bãan ne b yagsã fãa.

¹⁶ La rĩm a Aaza kɩtame tɩ b ka leb n boond a ma a Maaka tɩ rĩmã ma ye. Bala, rĩmã ma rag n maana wẽn-naan-yoog a Aseera bõn-naandga. A Aaza kɩtame tɩ b lub wẽn-naan-yoog-kãng n pãba n wã n yõog-a bugum Sedrõ kʋɩlgã long pʋgẽ.

¹⁷ La yẽnda yaool n ka menes maoong kʋʋb zĩisã Israyɛll soolmã pʋgẽ ye. La ne rẽ fãa, yẽnda kell n maana sẽn yaa tɩrg a vɩɩmã fãa tɛka.

¹⁸ Yẽnda talla wanzuri wã ne sãnemã yẽnda ne a ba wã sẽn dag n kõ Sẽn-Ka-Saabã n wa bĩng Wẽnnaam doogã pʋgẽ.

¹⁹ La hal n tɩ tãag a Aaza naamã reegr tɩ yʋʋm pis-tã la a nu yʋʋmdã, zabr ka tol n zĩnd ye.