2 Kibayã 14 - WẼNNAAM SEBRE 2014

A Aaza rĩungu

¹ A Aaza maana sẽn noom Sẽn-Ka-Saab sẽn yaa yẽnda Wẽnnaamã, la sẽn tat bãmb yam.

² Yẽnda sãama bu-zẽms a taabã wẽnnaam-dãmbã tẽn-kuga, maoong kʋʋb zĩisã, la a wã kug-vigindsã, la a kɛ a Aseera ra-lugdsã n lubi.

³ La a yeel Zʋʋda nebã tɩ b bao Sẽn-Ka-Saab sẽn yaa bãmb yaab-rãmba Wẽnnaamã, la b sak bãmb tõodã ne b noyã.

⁴ A Aaza menesa maoong kʋʋb zĩisã sẽn be kunkubã zutã, la wisdã yõogr zĩisã Zʋʋda tẽmsã fãa pʋsẽ, la yẽnda rĩungã wakate, Zʋʋda soolmã zĩnda bãane.

⁵ Yẽnda mee tẽms sẽn gũbg ne lalse. La tẽngã vɩɩmda bãane, la yʋʋm-kãens fãa pʋgẽ, ned ka leb n wa zab ne yẽnda ye. Bala, Sẽn-Ka-Saab kõo yẽnda vʋʋsgo.

⁶ Dẽ, yẽnda yeela Zʋʋda nebã yaa: «Wa-y tɩ d me Zʋʋda tẽmsã n gũbg lals ne gãsdo, n ning kʋɩlems ne pɩgdse, tẽnga fãa sẽn zĩ bãanã yĩnga, bala, tõnd baoo Sẽn-Ka-Saab sẽn yaa tõnd Wẽnnaamã, tõnd baoo bãmb la b kõo tõnd vʋʋsg zĩigã fãa.» Dẽ, bãmb rag n meeme, la bãmb tɩlgame.

⁷ Zʋʋda pʋgẽ, a Aaza rag n tara tãb-biis tus kobs-tã sẽn zãad gãn-bɛd la kãna, la Benzame pʋgẽ yaa tãb-biis tus-kobs-yi la pis-nii sẽn zãad gãn-bi, la sẽn mi tãp tãoob sõama. Bãmb fãa rag n yaa zabr gãndaado.

⁸ Kuus ned a Zeera waa ne tãb-biis tus-kẽema la saar-dãmb kobs-tã n na n zabe, la yẽnda taa Maseera.

⁹ La rĩm a Aaza yiime n na n seg yẽnda, la bãmb sũu tãp ne taab Sefata tãn-longã sẽn pẽ Mareesa wã.

¹⁰ A Aaza kelmame n bool Sẽn-Ka-Saab sẽn yaa yẽnda Wẽnnaamã n yeel yaa: «Sẽn-Ka-Saabo! Yãmb y yembr bal n tõe n zab n sõng ka-pãng soabã, wa yãmb sẽn tõe n zab n sõng pãng soabã. Dẽ wã yĩnga, sõng-y-do Sẽn-Ka-Saab sẽn yaa tõnd Wẽnnaam! Bala, tõnd teega yãmba, la yaa yãmb yʋʋrã yĩng la tõnd wa n na n zab ne kʋʋn-kãngã fãa. Sẽn-Ka-saabo! Yãmb yaa tõnd Wẽnnaam, ra bas-y tɩ ninsaalb tõog yãmb ye.»

¹¹ Woto, Sẽn-Ka-Saab kɩtame t'a Aaza ne Zʋʋda nebã tõog Kuus nebã, la bãmb zoeeme.

¹² A Aaza ne neb nins sẽn dag n be ne yẽnda wã riga Kuus nebã n tãag Geraare, la bãmb ned ba a yembr ka tol n tõog n põs ye. Bala, Sẽn-Ka-Saab ne bãmb tãb-biisã kʋʋ bãmb zãnga. La Zʋʋda nebã wʋka paoong wʋsgo.

¹³ Sẽn-Ka-Saab rabeemã sẽn dag n yõk tẽms nins fãa sẽn dag n gilg Geraar tẽngã yĩng kɩtame tɩ bãmb zab ne tẽn-bãmb fãa n tõog-b n zɛ b paoongã fãa. Bala, b rag n tara paoong wʋsgo.

¹⁴ La bãmb kɛɛ rũmsã yãg n sãame, n yõg rũm-bãoonego, la yʋgma wʋsgo. Dẽ bãmb lebg n leba Zeruzalɛm.