2 Kibayã 11 - WẼNNAAM SEBRE 2014

¹ A Roboaam sẽn lebg n ta Zeruzalɛmã, a tigma Zʋʋda ne Benzame buudã tãb-biis tus koabg la pis-nii sẽn mi zabr sõama wã, tɩ b na n tɩ zab ne Israyɛll buud a taabã neb n deeg rĩungã n lebs yẽnda a Roboaam.

² La Sẽn-Ka-Saab goma ne Wẽnnaam dao a Semaya n yeel-a yaa:

³ «Yeel a Salmo biig a Roboaam sẽn yaa Zʋʋda rĩma ne Israyɛll neb nins fãa sẽn be Zʋʋda wã ne Benzame buudã fãa ne neb a taabã sẽn ketã,

⁴ tɩ maam a Sẽn-Ka-Saab yetame: Bɩ y ra kẽng n tɩ zab ne y saam-biisã sẽn yaa Israyɛll nebã ye! Bɩ ned kam fãa lebg n kuil a yiri. Bala, yaa maam n kɩt tɩ yellã yɩɩ a woto.» Dẽ, bãmb saka Sẽn-Ka-Saab koɛɛgã n maan wa b sẽn yeelã, n lebg n kuili, n ka tɩ zab ne a Zeroboaam ye.

A Roboaam rĩungu

⁵ A Roboaam zĩnda Zeruzalɛm. La yẽnda kɩtame tɩ b me lals sẽn tar pãng n gũbg Zʋʋda tẽmsã.

⁶ Yaa Betlehɛm, Etam, Tekoa,

⁷ la Bɛt-Sʋʋre, ne Soko, la Adulam,

⁸ ne Gate, la Maresa, ne Zɩfe,

⁹ la Adorayim, ne Lakɩɩs la Azeka,

¹⁰ ne Soreya, la Ayalõ, ne Ebrõ. Tẽn-bãmb fãa bee Zʋʋda ne Benzame soolmã pʋsẽ. Bãmb yaa tẽms sẽn tar pãnga.

¹¹ A Roboaam kɩtame tɩ b maneg n me lalsã sẽn tar pãng n gũbg tẽn-bãmb n ning kombɛɛmba, la a kɩt tɩ b bĩng a koodã ne a kaamã, la a reezẽ rãamã bãmb pʋsẽ.

¹² La tẽn-kãens fãa pʋsẽ, b ra bĩnga gãnd sẽn yaa bɛda, la kãna. Yẽnda kɩtame tɩ tẽn-bãmb tall pãngã. La Zʋʋda ne Benzame tẽmsã kell n yɩɩ yẽnda soolem.

Maan-kʋʋdbã kẽe a Roboaam

¹³ Maan-kʋʋdbã ne Leevi nebã sẽn dag n be Israyɛll tẽmsã fãa pʋsẽ wã, yii b tẽmsẽ fãa pʋs n wa naag a Roboaam.

¹⁴ Leevi nebã rag n yiime n bas b zagsã, ne b pʋ-weesã, n kẽng n tɩ kẽed Zʋʋda soolem ne Zeruzalɛm tẽngã pʋga. Bala, a Zeroboaam ne a kambã rag n gɩdgda bãmb tɩ b ka tõe n maan b maan-kʋʋrã tʋʋmd Sẽn-Ka-Saab yĩngã.

¹⁵ La a Zeroboaam mengã rag n baoo neb tɩ b tõe n yɩ maan-kʋʋdba, boeesã ne nag-bi wẽn-naands nins yẽnda sẽn dag n dõog n ning maoong kʋʋb zĩisẽ wã yĩnga.

¹⁶ La Israyɛll buud toor-toorã pʋgẽ neb nins fãa, sẽn dag n dat-b n waoog Sẽn-Ka-Saab sẽn yaa Israyɛll Wẽnnaamã, pʋgla Leevi nebã n kẽng Zeruzalɛm, sẽn na n yɩl n tõog n maan maoong n kõ Sẽn-Ka-Saab sẽn yaa b yaab-rãmbã Wẽnnaamã.

¹⁷ Nin-bãmb paasa Zʋʋda soolmã pãnga, la b paas a Salmo biig a Roboaam raood yʋʋm a tãabo. Bala, yʋʋm a tãab-kãens pʋgẽ, bãmb tũu a Davɩɩd ne a Salmo naoore.

A Roboaam zak kibare

¹⁸ A Roboaam peega a Yerimot bi-pugl a Mahalat n maan a paga. A Yerimot ba la a Davɩɩd t'a ma wã la a Abigayɩlle. A Abigayɩlle, dag n yaa a Zeese biig a Eliyaab bi-pugla.

¹⁹ A Mahalat doga a Roboaam kom-dibli: yaa a Yewusi, a Semariya, ne a Zaham.

²⁰ Dẽ poore, a Roboaam leb n kẽe kãadem ne a Absalom biig a Maaka, la a roga a Roboaam kom-dibli: yaa a Abiya, a Atayi, a Zɩɩza, ne a Selomiti.

²¹ A Roboaam rag n nonga a Absalom biig a Maaka, n yɩɩd a pagb a taabã ne a pʋg-rɩkdsã fãa. A Roboaam rag n tara pagb piig la a nii, la pʋg-rɩkds pis-yoobe. La yẽnda roga kom-dibli pisi la a nii, la kom-pugli pis-yoobe.

²² A Roboaam rɩka kãsengã n kõ a Maaka biig a Abiya, n lʋɩɩs yẽnda a ba-biisã taoore. Bala, yẽnda rag n datame t'a wa lebg rĩma.

²³ Rĩm a Roboaam maana yam n sãeeg a kom-dibli wã fãa, n ning Zʋʋda ne Benzame tẽms nins fãa b sẽn me lals n gũbgã pʋsẽ, n kõt-b rɩɩb tɩ sekd-ba, la a kos pagb wʋsg n kõ-ba.