2 Kibayã 1 - WẼNNAAM SEBRE 2014

A Salmo ne Israyɛll nebã kẽnga Gabawõ

¹ A Davɩɩd biig a Salmo naamã paama pãng hal wʋsgo. Bala, Sẽn-Ka-Saab sẽn yaa yẽnda Wẽnnaamã rag n bee ne yẽnda, n kɩt t'a lebg kãsenga.

² A Salmo goma ne Israyɛll zãmã wã fãa, la neb tusr-tusri, ne neb koabg-koabg nanambsã, la bʋ-kaoodbã, ne Israyɛll kombɛɛmbã fãa, la zak soben-dãmbã.

³ A Salmo ne Israyɛll zãma wã kẽnga pʋʋsgã zĩig sẽn be Gabawõ wã, bala, yaa beenẽ la b ra tilg fu-roog ning Wẽnnaam tʋmtʋmd a Moyiis sẽn dag n maan we-raoogẽ wã.

⁴ La kãabg koglgã rag n ka be beenẽ ye. Bala, a Davɩɩd rag n yiis-a-la Kiryat Yeyarim n kẽng n tɩ ning-a fu-roog ning yẽnda sẽn da tilg Zeruzalɛmã pʋga.

⁵ La sã n yaa ne zũud tẽn-kugr ninga a Ʋʋr biig a Uuri biig a Bɛtsalɛll sẽn dag n maanã, b rag n ning-a-la Sẽn-Ka-Saab fu-roogã sẽn be Gabawõ wã noore. Yaa be la a Salmo ne zãmã nins sẽn be ne-a wã, wa n na waoog Sẽn-Ka-Saabo.

A Salmo kosa Wẽnnaam yam

⁶ La a Salmo kẽnga zũud tẽn-kugrã sẽn be Sẽn-Ka-Saab fu-roogã noorã, n kʋ maand sẽn yõogd bugum tusri.

⁷ La badaar yʋngo, Wẽnnaam vẽnega b meng ne a Salmo n yeel-a: «Kos maam bũmb ning fãa fo sẽn date, tɩ m na maaname n kõ-fo.»

⁸ La a Salmo yeela Wẽnnaam yaa: «Yãmb wilga nonglem kãseng ne m ba a Davɩɩde, la yãmb kɩtame tɩ mam deeg bãmb zĩig n dɩt naamã.

⁹ La moasã, Wẽnnaam Sẽn-Ka-Saabo, bɩ gomd ning yãmb sẽn da gom ne m ba a Davɩɩdã paam pidsgu, bala, yãmb yãka maam tɩ m na n dɩ naam buud sẽn yaa wʋsg wa tẽng tom zugu.

¹⁰ Dẽ wã yĩnga, bɩ y kõ maam yam, la bãngre, tɩ m tõog n lʋɩ y zãmã taoor n zã-ba! Bala, ãnda soab n tõe n zã y zãmã sẽn yaa wʋsg woto fãa wã?»

¹¹ Dẽ, Wẽnnaam yeela a Salmo yaa: «Fo ratmã sẽn yaa woto, tɩ fo ka kos arzegs bɩ paoongo, wa waoogr bɩ f bɛɛbã kũumã, la f ka kos maam baa ne yõ-wokã, la f kot maam yam, la bãngr n na n tõog n zã mam nebã m sẽn kɩt tɩ f rɩt naam b zugã yĩnga,

¹² mam na n kõ foom yam, la bãngre. La sẽn paase, m na n kõ-f-la arzegs ne paoong la waoogre, wa rĩm-dãmb nins sẽn deng foomã n zĩndã sẽn zɩ n paame, la sẽn na n wa zĩnd-b fo loogr poorã sẽn kõ tol n paame.»

¹³ Dẽ poore, a Salmo yii sɛkã roog zĩig sẽn be Gabawõ wã n leb Zeruzalɛm. La yẽnda dɩɩ naam Israyɛlle.

A Salmo arzegs la pãnga

¹⁴ Rĩm a Salmo tigma saar-dãmb ne wed-moos wʋsgo. Yẽnda rag n tara saar-dãmb tusr la kobs-naase, la wed-rʋʋdb tus piig la a yiibu. Rĩm a Salmo yãka tẽms tɩ yaa a saar-dãmbã ne wiidã bĩngr zĩiga, la a ning kẽer Zeruzalɛm pʋgẽ n pẽneg a menga.

¹⁵ Rĩmã kɩtame tɩ wanzuri wã lebg wʋsg wa kug Zeruzalɛm pʋgẽ, la a kɩt tɩ sɛɛdr tɩɩsã raad lebg wʋsg wa wom-seesã sẽn be kunkubã zutã.

¹⁶ Rĩm a Salmo rag n tara toandb tɩ b tũud taab sull-sull n kẽnd Ezɩpte, ne Keeve tẽng n daad wed-moos n watẽ. Rĩmã toandbã rag n daad-b-la Keeve tẽng wa b ligdã sẽn zem to-to wã.

¹⁷ Saar a yembr ligd yaa wanzuri kɩlo a nu la pʋɩ-sʋka, la weef a yembr ligd yaa wanzuri kɩlo a yiib la pʋɩ-sʋka. Rĩmã toandb rag n wata ne wed-moos me, n koosd ne Hɛt la Siiri rĩm-dãmbã.

¹⁸ A Salmo yeelame tɩ b me roog Sẽn-Ka-Saab yĩnga, la b me na-yir yẽnda mengã yĩnga.