1 Zã 4 - WẼNNAAM SEBRE 2014

Wẽnnaam Sɩɩga ne Kiris kɩɩsdã sɩɩga

¹ Mam zo-nongdse, ra tẽ-y sɩɩsã fãa ye, mak-y-b n ges n bãng b sã n yita Wẽnnaam nengẽ. Bala, belgr no-rɛɛsdb wʋsg n wa dũniyã pʋga.

² Ad bũmb ning sẽn na n kɩt tɩ yãmb bãng tɩ yaa Wẽnnaam Sɩɩgã: Sɩɩg ning fãa sẽn yet t'a Zeezi Kiris waa ne yĩnga, Sɩ-kãng yii Wẽnnaam nengẽ.

³ La sɩɩg ning fãa sẽn ka kɩt-a kaset‑kãng ka yit Wẽnnaam nengẽ ye, a yaa Kiris kɩɩsdã sɩɩga. Sɩɩg ning yãmb sẽn dag n wʋm t'a watame wã, la moasã, a zoe n bee dũniyã pʋgẽ.

⁴ Ne yãmba, mam kom-bãoonego, yãmb yaa Wẽnnaam kamba, la y tõoga belgr no-rɛɛsdbã, bala, soab ning sẽn be yãmb pʋgẽ wã yɩɩda sẽn be-a dũniyã pʋgẽ wã.

⁵ Bãmb yaa dũniyã rẽnda, yaa rẽ yĩng la b goamã sẽn yit dũni nengẽ wã, la dũniyã kelgd-b lame.

⁶ La ne tõndo, tõnd yaa Wẽnnaam dẽnda. Ned ning sẽn mi Wẽnnaam kelgda tõndo, la ned ning sẽn ka mi Wẽnnaam ka kelgd tõnd ye. Yaa woto la tõnd na n bãng sɩd Sɩɩgã ne tudgr sɩɩgã n bake.

Wẽnnaam yaa nonglem

⁷ M zo-nongdse, d nong taaba, bala, nonglem yita Wẽnnaam nengẽ, la ned ning fãa sẽn nong a taab yaa Wẽnnaam biiga, la a mii Wẽnnaam.

⁸ Ned ning sẽn ka nong a taab ka bãng Wẽnnaam ye, bala Wẽnnaam yaa nonglem.

⁹ Ad Wẽnnaam sẽn puk b nonglmã to-to tõnd yĩnga: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm bãmb maasem yĩnga.

¹⁰ Nonglem‑kãng ka tõnd sẽn nong Wẽnnaam yĩng ye, yaa bãmb sẽn nong tõndo, n tʋm b Bi-riblã tɩ b yɩ maoong tõnd yel-wẽnã sugr kũun yĩnga.

¹¹ Mam zo-nongdse, Wẽnnaam sã n nong tõnd hal wʋsg a woto, tõnd me tog n nonga taaba.

¹² Ned baa a yembr zɩ n yãnd Wẽnnaam ye. Tõnd sã n nong taaba, Wẽnnaam bee tõnd pʋgẽ, la bãmb nonglmã zemsa zãng tõnd pʋgẽ.

¹³ Ad bũmb ning sẽn kɩtd tɩ tõnd bãng tɩ d bee Wẽnnaam pʋgẽ, la tɩ bãmb bee tõnd pʋgẽ: Yaa tɩ bãmb kõo tõnd b Sɩɩgã.

¹⁴ La tõnd yãame la d kɩt kaset tɩ d ba wã tʋma b Bi-riblã tɩ b yɩ dũni fãagda.

¹⁵ Ned ning sẽn yet t'a Zeezi yaa Wẽnnaam Bi-ribla, Wẽnnaam bee a soab pʋgẽ, la a soab bee Wẽnnaam pʋgẽ.

¹⁶ La ne tõndo, tõnd bãnga nonglem ning Wẽnnaam sẽn tar tõnd yĩngã, la tõnd tẽe nonglem‑kãnga. Wẽnnaam yaa nonglem. Ned ning sẽn be nonglem pʋgẽ, a bee Wẽnnaam pʋgẽ, la Wẽnnaam bee yẽnda soab pʋgẽ.

¹⁷ Nonglmã sã n zems zãng tõnd pʋsẽ, dẽ, bʋʋda kaoob daare tõnd pɛlg na n yɩɩ kãenkãe, bala, Kiris sẽn yaa to-to wã, tõnd me vɩɩmã yaa a woto dũni kãngã pʋga.

¹⁸ Rabeem ka be nonglem pʋgẽ ye, la nonglem sẽn zems zãng yiisda rabeem. Bala, rabeem wilgdame tɩ sɩbgr n be, la ned ning sẽn zoet rabeem, nonglmã ka zems zãng yẽ pʋgẽ ye.

¹⁹ Ne tõndo, tõnd tara nonglem, Wẽnnaam sẽn deng n nong tõndã yĩnga.

²⁰ Ned sã n yet t'a nonga Wẽnnaam n yaool n kis a ba-biiga, yẽnda soab yaa zĩrẽ yagda. Bala, ned ning sẽn ka nong a ba-biig a sẽn ne wã, a ka tõe n nong Wẽnnaam yẽ sẽn ka ne wã ye.

²¹ Dẽ, ad tõog ninga Kiris sẽn kõ tõndã: Ned ning sẽn nong Wẽnnaam, tog n nonga a ba-biig me.