1 Zã 3 - WẼNNAAM SEBRE 2014

Wẽnnaam kamba

¹ Ges-y nonglem ninga d ba wã sẽn nong tõndã, bala b boonda tõnd tɩ Wẽnnaam kamba. La tõnd sɩd yaa bãmb kamba. Ad bũmb ning sẽn kɩt tɩ dũni wã ka mi tõndã: Yaa t'a ka bãng d ba wã ye.

² Mam zo-nongdse, tõnd yaa Wẽnnaam kamb moasã, la tõnd sẽn na n yɩ bũmb ningã nan ka puk nand ye. La tõnd miime tɩ Kiris sã n wa n puki, tõnd na n yɩɩ wa bãmba, bala, tõnd na n yãnda bãmb sẽn yaa a soabã.

³ Ned ning fãa sẽn tẽed Kirisã yel-kãngã pidsg yĩnga, a yɩlgda a meng n lebg yɩlemd wa a Zeezi Kiris sẽn yaa yɩlemdã.

⁴ Ned ning fãa sẽn maand yel-wẽnde, a kɩɩsda tõogã me. Yel-wẽna yaa tõogã kɩɩsgo.

⁵ La yãmb miime t'a Zeezi waame n na n yiis yel-wẽnã, la yel-wẽnd ka tol n be bãmb pʋgẽ ye.

⁶ Ned ning fãa sẽn be Kiris pʋgẽ ka maand yel-wẽn ye. Ned ning fãa sẽn maand yel-wẽn ka yã bãmba, la a ka bãng-b ye.

⁷ Kom-bãoonego, bɩ y ra sak tɩ ned ba a yembr belg yãmb ye. Ned ning sẽn maand tɩrlem yaa tɩrg wala a Zeezi Kiris sẽn yaa tɩrgã.

⁸ Ned ning sẽn maand yel-wẽn yaa sʋtãanã neda, bala sʋtãanã sɩng n maanda yel-wẽn hal sɩngr wẽndẽ. Wẽnnaam Bi-riblã waame n na n sãam sʋtãanã tʋʋmã.

⁹ Wẽnnaam sẽn dog ned ning fãa ka maand yel-wẽn ye, Wẽnnaam yalẽ wã sẽn be yẽnda pʋgẽ wã yĩnga. La sẽn ya Wẽnnaam n dog-a wã yĩnga, a ka tõe n ket n maand yel-wẽn ye.

¹⁰ Yaa woto la b bãngd sẽn ya-b Wẽnnaam kambã la sẽn ya-b sʋtãanã kamb n bake. Ned ning fãa sẽn ka maand tɩrga la sẽn ka nong a ba-biig ka Wẽnnaam biig ye.

¹¹ Ad koɛɛg ning yãmb sẽn wʋm hal sɩngrẽ wã: Bɩ d nong taaba.

¹² Bɩ d ra maan wala a Kayẽ sẽn dag n yaa wẽng soabã rẽndã, la sẽn kʋ a ba-biigã ye. La bõe yĩng n kɩt t'a kʋ-a? Yaa yẽnda tʋʋmã sẽn dag n yaa wẽns t'a ba-biigã tʋʋmã zemsã yĩnga.

¹³ M ba-biisi, dũniyã nebã sã n kis yãmba, bɩ y ra yɛɛs ye.

¹⁴ Tõnd sẽn nong d ba-biisã yĩnga, tõnd miime tɩ d yii kũum zĩigẽ n kẽ vɩɩm zĩigẽ. Ned ning sẽn ka tar nonglem bee kũum pʋgẽ.

¹⁵ Ned ning fãa sẽn kis a ba-biig yaa nin-kʋʋda, la yãmb miime tɩ nin-kʋʋd ba a yembr ka tar vɩɩm sẽn kõn sa wã tɩ bee a pʋgẽ ye.

¹⁶ Ne bõn-kãnga, tõnd bãnga nonglem sẽn yaa bũmb ninga: Yaa t'a Zeezi Kiris kõo bãmb vɩɩmã tõnd yĩnga. Tõnd me tog n kõo d vɩɩmã d ba-biisã yĩnga.

¹⁷ Ned sã n tar dũni arzegse, n neẽ t'a ba-biig rat sõngre, tɩ yẽnda ka zoe a nimbãaneg n sõng-a, yẽnda na n yɩɩ a wãn yeel t'a nonga Wẽnnaam?

¹⁸ Kom-bãoonego, bɩ tõnd nonglem ra yɩ noor goamã, wall no-noom ye. Bɩ a yɩ ne tʋʋmã la ne sɩda.

¹⁹ Rẽ na n kɩtame tɩ tõnd bãng tɩ d yaa sɩd-dãmba, la tõnd na n paama sũur laafɩ Wẽnnaam taoore,

²⁰ baa ne tõnd sũyã sẽn mongd tõnd bʋʋm to-to. Bala, Wẽnnaam yɩɩda tõnd sũyã, la b mii bũmb fãa.

²¹ Mam zo-nongdse, tõnd sũurã sã n ka mongd tõnd bʋʋm, tõnd pɛlg yaa kɛgeng Wẽnnaam taoore,

²² tõnd sẽn kot bũmb ning fãa, bãmb kõta tõndo, tõnd sẽn sakd bãmb tõodã la d maand sẽn tat bãmb yamã yĩnga.

²³ Ad bãmb tõogã la a woto: Yaa tɩ d tẽ bãmb bi-ribl a Zeezi Kiris yʋʋre, la tɩ d nong taab wala sẽn zems tõog ning a Zeezi sẽn kõ tõndã.

²⁴ Ned ning sẽn sakd bãmb tõodã bee Wẽnnaam pʋgẽ, tɩ Wẽnnaam be yẽnda pʋgẽ. Woto, tõnd miime tɩ bãmb bee tõnd pʋgẽ, Sɩɩg-sõng bãmb sẽn kõ tõndã maasem yĩnga.