1 Tɩmote 6 - WẼNNAAM SEBRE 2014

Saglse, yembsã yĩnga

¹ Bɩ neb nins sẽn be yembd pʋgẽ wã ges b mens zu-soben-dãmbã wa neb sẽn zems ne waoogr fãa, tɩ b ra wa n paoog Wẽnnaam yʋʋrã la tẽeb zãmsgã ye.

² La neb nins zu-soben-dãmb sẽn yaa Kiris tẽedbã, b ka tog n paoog-b n yetẽ tɩ bãmb yaa ba-biis ne taab ye. B tog n tʋma b yĩng sõama n yɩɩda, bala, b yaa tẽedbã, la nin-nongds bãmb sẽn maood tɩ maan-b neere. Ad bũmb nins fo sẽn tog n zãms nebã la f sagl-b tɩ b sake.

Wẽnnaam sakre

³ Ned sã n zãmsd nebã bũmb a to, la a ka kẽnd wa sẽn zems tõnd Zu-soab a Zeezi Kiris gom-sõngã, la a wa tẽeb zãmsg sẽn zemsd ne Wẽnnaam sakrã,

⁴ soab‑kãng pida ne wuk-m-menga, la a ka mi baa fɩ ye. A sã n ka wẽed no-koɛɛma, la a ka maand zab gom-biis poorẽ, yaa bãag ne-a. Yaa bõn-kãens n wat ne sũ-kiiri, la ka-wʋm-taaba, la kãnegre, la tags-wẽng neb a taab zutu,

⁵ tɩ neb nins sɩɩs sẽn kẽ belgr pʋgẽ wã wẽed no-koɛɛm n ka basdẽ ye. Bãmb dãmb ka tar sɩd ye, la b rɩka Wẽnnaam sakrã tɩ yɩ arzegs baoob sore.

⁶ Sɩda, ned sã n maand sũ-noog ne bũmb nins a sẽn tara, Wẽnnaam sakrã sɩd yaa paoong so-kẽenga.

⁷ Bala, tõnd ka zã baa fɩ n wa tẽng zug ka ye, la tõnd ka tõe n zã baa fɩ me n loog ye.

⁸ Dẽ wã, tõnd sã n tar dɩɩb ne futu, rẽ na n seka tõndo.

⁹ Neb nins sẽn baood n lebg arzegs rãmbã lʋɩta makr pʋgẽ, la kũusr pʋgẽ, datem wʋsg sẽn yaa yalemd la wẽns pʋsẽ, la bõn-kãens kẽesda ninsaalbã sãoong la meneng pʋgẽ.

¹⁰ Bala, ligdã nonglem yaa bõn-wẽnsã fãa yẽgre. La neb kẽer sẽn nong ligd wʋsgã menemame n zãag ne tẽebã, la b sɩbga b mens ne tood buud toay-toaya.

Tẽeb zabre

¹¹ La fo sẽn yaa Wẽnnaam nedã, zãag f meng ne bõn-kãense, la f bao tɩrlem, la Wẽnnaam sakre, la tẽebo, la nonglem, la sũ-mare, la sũ-bʋgsem.

¹² Zab tẽeb zab-sõngã, gãd vɩɩm sẽn kõn sa wã, tɩ yaa rẽnda yĩng la Wẽnnaam bool foom, la yaa rẽnda yĩng me la fo sẽn kɩs kaset-sõngo, kaset rãmb wʋsg taoorã.

¹³ Mam yeta foom, Wẽnnaam sẽn kõt bõn-vɩɩsã fãa vɩɩmã taoore,

¹⁴ tɩ f sak tõodã tɩ rẽgd tosg ra zĩnd ye, tɩ rõadg da zĩndi, hal tɩ ta tõnd Zu-soab a Zeezi Kiris pukrã.

¹⁵ Wakat sã n ta, sẽn tar-a barkã, n yaa b yembr tãa n so naamã, dĩm-dãmb Dĩma la zu-soben-dãmb Zu-soabã na n puka bõn-kãnga.

¹⁶ Yaa bãmb bal n ka kiida, n vɩ vẽenem ned sẽn ka tõe n ta pʋgẽ. Ned nan ka yãnd bãmb ye, la ned ka tõe n yãnd bãmb me ye. Yaa bãmb n so waoogre, la pãng sẽn paad wakat sẽn kõn sa. Ãmina!

¹⁷ Yeel neb nins sẽn tar arzegs dũni‑kãngã pʋgẽ wã tɩ b ra maan wilg-m-menga, la b da rɩk b teegrã n teeg arzegs b sẽn ka tar a hakɩɩk ye. Bɩ b teeg Wẽnnaam, tɩ b kõta bũmb fãa tɩ seke, tɩ tõnd tõe n tall n maan sũ-noog ne.

¹⁸ Bɩ b maan neere, la bɩ b yɩ neb sẽn maand tʋʋm-sõamy wʋsgo, la b yɩ neb sẽn kõte, la sẽn nong n pʋɩ b sẽn tarã ne neb a taaba.

¹⁹ Woto, bãmb na n bĩnga paoong wakat sẽn watã yĩnga, wa yẽbgr sẽn tar pãnga, tɩ b tõe n paam vɩɩm hakɩɩkã tɩ yɩ b pʋɩɩre.

²⁰ Tɩmote, tall bũmb nins sẽn bĩng fo pʋgẽ wã, la f mao n zãag f meng ne gom-vɩɩd sẽn ka kẽed ne Wẽnnaam yell ye. Zãag ne no-koɛɛma, la ne zĩrẽ-bãngre.

²¹ Neb kẽer sẽn dɩk bõn-kãens tɩ yɩ b tʋʋmdã ka tõog n ta zĩig ning b sẽn da tog n ta tẽebã wɛɛngẽ wã ye. Bɩ barkã zĩnd ne yãmb fãa.