1 Sãmwɛlle 8 - WẼNNAAM SEBRE 2014

Israyɛll nebã kosa rĩmã

¹ A Sãmwɛll sẽn wa n kʋʋlã, a yãka a kambã tɩ b lebg Israyɛll bʋ-kaoodba.

² A Sãmwɛll bi-kãsengã yʋʋr la a Zowɛlle, la yiibẽ soabã yʋʋr la a Abiya. Bãmb dag n yaa Bɛɛr-Seba bʋ-kaoodba.

³ A Samwɛll kambã ka rɩk a Sãmwɛll naoor ye. Bãmb dag n nonga kũuni, b rag n deegda kũuni, la b kaood bʋʋdã kɛga.

⁴ Israyɛll nebã kãsem-dãmb fãa tigma taab n kẽng a Sãmwɛll nengẽ Rama:

⁵ Bãmb yeela a Sãmwɛll yaa: «Yãmb kʋʋlame, la yãmb kambã me ka rɩk yãmb naoor ye. Dẽ wã, bao-y rĩm n kõ-do, t'a soog tõnd wa buud a taabã fãa me sẽn tarã.»

⁶ A Sãmwɛll sũurã sãama ne Israyɛll sẽn yeel tɩ b rata rĩm sẽn na n yɩ bãmb bʋ-kaoodã, la yẽnda pʋʋsa Sẽn-Ka-Saabo.

⁷ Dẽ, Sẽn-Ka-Saab yeela a Sãmwɛll yaa: «Kelg nebã, la f maan bũmb nins fãa b sẽn kot foomã n kõ-ba. Bala, ka foom la b zãgsd ye, yaa maam la b zãgs yã. Bala, b ka leb n dat tɩ mam yɩ b rĩm ye.

⁸ Bãmb sẽn maand to-to ne foomã, kell n yaa wa b sẽn dag n sɩng n maand ne maam wakat ning mam sẽn yiis-b Ezɩpt tẽngã hal tɩ ta moasã wã. Bãmb basa maam n tũ wẽnnaam-dãmb a taaba.

⁹ Dẽ wã, bɩ f kelg-ba, la f keoog-b sõama, la f wilg-b rĩm ning sẽn na n wa soog bãmbã sẽn na n tall noor ning ne bãmba.»

¹⁰ A Sãmwɛll rɩka Sẽn-Ka-Saab goamã fãa n taas nebã sẽn kot yẽnda tɩ b rata rĩmã.

¹¹ A yeel-b lame yaa: «Ad rĩm ning sẽn na n soog-a yãmbã sẽn na n tall noor ne bũmb ninga: Yẽnda na n dɩka yãmb kom-dibli wã n maan a tãb-biisi, n kɩt tɩ kẽer zoet ne saar-dãmba, tɩ kẽer yɩ a wed-rʋʋdba, la kẽer na n lʋɩɩ a saar-dãmbã taoore, n yɩ a gũudba.

¹² A na n kɩtame tɩ kẽer lebg tãb-biis tusr-tusr nanambse, tɩ kẽer lebg tãb-biis pis-nunu nanambse. Yẽnda na n kɩtame tɩ kẽer ko a pʋtã, la b tigs a koodã, tɩ kẽer me maan a zab-teedã ne saar-dãmbã teedo.

¹³ Yẽnda na n dɩka yãmb kom-pugli wã tɩ b maand parfẽ-rãmba, tɩ kẽer segend dɩɩbo, tɩ kẽer maand buri.

¹⁴ Yẽnda na n deesa yãmb pʋ-sõama wã ne y reezẽ tɩɩs pʋtã, la y oliiv tɩɩs pʋtã n kõ a tʋmtʋmdbã.

¹⁵ Yẽnda na n deega y bõn-koaadlã ne y reezẽ tɩɩs biisã piig pʋɩɩre, n kõ a nanambsã ne a zakã tʋmtʋmdbã.

¹⁶ Yẽnda na n deega yãmb yem-daadã ne y yem-pogsã, la y kom-bɩɩsã ne y bõens nins sẽn yaa sõama wã n kɩt tɩ b tʋm a tʋʋmã.

¹⁷ Yẽnda na n deega yãmb rũm-bãoonegã piig pʋɩɩre. Yãmb mensã na n lebga a yembse.

¹⁸ Wakat-kãnga, yãmb na n zẽka y koees n yãb ne Sẽn-Ka-Saabo, rĩm ning yãmb sẽn yãkã wɛɛngẽ, la badaare, Sẽn-Ka-Saab ka na n leok yãmb ye.»

¹⁹ Nebã kɩɩsame n ka kelg a Sãmwɛll ye. Bãmb yeelame yaa: «Ayo! Tõnd data rĩm t'a soog tõndo.

²⁰ Woto, tõnd me na n lebga wa buud a taabã fãa. Tõnd dĩmã n na n kaood tõnd bʋʋdo, la a lʋɩt tõnd taoor zabr wakate, n zabd n kõt-do.»

²¹ A Sãmwɛll wʋma nebã goamã fãa, la a rɩkame n togs Sẽn-Ka-Saabo.

²² Dẽ, Sẽn-Ka-Saab yeela a Sãmwɛll yaa: «Kelg b goamã, bao rĩm n kõ-ba.» La a Sãmwɛll yeela Israyɛll nebã tɩ ned fãa lebg n leb a tẽngẽ.