1 Sãmwɛlle 7 - WẼNNAAM SEBRE 2014

¹ Kiryat-Yeyarim nebã wa n talla Sẽn-Ka-Saab kaoolã koglgã n looge. Bãmb kẽng n tɩ sik-a-la a Abinadaab zakã sẽn be tãngã zugã pʋga. Bãmb yãka a Abinadaab biig a Eleyazaar t'a gũ Sẽn-Ka-Saab kaoolã koglgã.

A Sãmwɛll lebga Israyɛll nebã bʋ-kaooda

² Sẽn-Ka-Saab kaoolã koglgã paa Kiryat-Yeyarim n kaoose. A paa be yʋʋm pisi. Israyɛll nebã wiisa Sẽn-Ka-Saab taoore.

³ La a Sãmwɛll yeela Israyɛll buudã fãa yaa: «Sã n mikame tɩ yaa ne y sũyã fãa la y rat n lebg n tũ Sẽn-Ka-Saabo, bɩ y yiis bu-zẽmsã wẽnnaam-dãmbã, ne Astarte wẽn-naandsã yãmb sʋka. La y wẽnemd y sũyã n kõ Sẽn-Ka-Saabo, la y tũ bãmb b yembr bala. Woto, bãmb na n fãaga yãmb Filistẽ-dãmbã nusẽ.»

⁴ Dẽ, Israyɛll nebã menesa Baall-dãmbã, la Astarte wẽn-naandsã bãmb sʋka, la b tũ Sẽn-Ka-Saab b yembr bala.

⁵ A Sãmwɛll yeelame: «Tigm-y Israyɛll nebã fãa Mispa, tɩ m pʋʋs Sẽn-Ka-Saab y yĩnga.»

⁶ Dẽ, bãmb tigma Mispa, la b toog koom n daag Sẽn-Ka-Saab taoore. Bãmb maana no-loeer badaare, la b yeelame: «Tõnd beega Sẽn-Ka-Saabo.» A Sãmwɛll dag n yaa Israyɛll nebã bʋ-kaood Mispa.

⁷ Filistẽ-dãmbã wʋmame tɩ Israyɛll nebã tigma Mispa. Dẽ, b nanambsã ne b nebã yikame n na n tɩ zab ne Israyɛll nebã. Israyɛll nebã sẽn wʋm bõn-kãngã, Filistẽ-dãmbã rabeem yõka bãmba.

⁸ Israyɛll nebã yeela a Sãmwɛll yaa: «Ra sĩnd f noor ye! Kelem n bool Sẽn-Ka-Saab sẽn yaa tõnd Wẽnnaamã n kõ-do, tɩ b fãag-d Filistẽ-dãmbã nugẽ.»

⁹ A Sãmwɛll dɩka pe-bil sẽn ket n yẽsemdẽ, n maan maoongo, n yõog-a fãa bugum Sẽn-Ka-Saab yĩnga. A Sãmwɛll kelmame n bool Sẽn-Ka-Saab Israyɛll nebã yĩnga, la Sẽn-Ka-Saab leoka a kosgã.

¹⁰ A Sãmwɛll sẽn wa n maand maoongã wakate, Filistẽ-dãmbã kolgame n na n zab ne Israyɛll nebã. Badaare, Sẽn-Ka-Saab kɩtame tɩ sa-tãs zĩnd Filistẽ-dãmbã sʋka, n kẽes-b rabeem, la Israyɛll nebã tõoga bãmba.

¹¹ Israyɛll nebã yii Mispa n dig Filistẽ-dãmbã hal n tãag Bɛt-Kaare.

¹² A Sãmwɛll dɩka kugr n lugl Mispa ne zĩig ning b sẽn boond tɩ Yẽndã sʋka, n pʋd kugrã yʋʋr tɩ Ebɛn-Ezɛɛre, sẽn dat n togs tɩ sõngr kugri, la a yeele: «Hal tɩ ta kaanẽ, Sẽn-Ka-Saab sõnga tõndo.»

¹³ Woto, Israyɛll nebã tõoga Filistẽ-dãmbã n ning-b yãnde, la b ka leb n tol n wa Israyɛll soolmẽ wã ye. A Sãmwɛll vɩɩmã tɛka, Sẽn-Ka-Saab sɩbga Filistẽ-dãmbã.

¹⁴ Israyɛll nebã leb n deega b tẽms nins fãa Filistẽ-dãmbã sẽn dag n deegã, sẽn sɩng ne Ekrõ hal n tɩ ta Gat ne b tẽn-kɩremsã me. Israyɛll fãaga tẽn-bãmb Filistẽ-dãmbã nugẽ. Vɩ-bãan zĩnda Israyɛll nebã ne Amoor nebã sʋka.

¹⁵ A Sãmwɛll yɩɩ Israyɛll bʋ-kaood a vɩɩmã tɛka.

¹⁶ Yʋʋmd fãa, yẽnda rag n kẽnda Betɛll ne Gilgall la Mispa, n kaood Israyɛll nebã bʋʋd zĩ-kãens fãa.

¹⁷ La rẽ poore, yẽnda lebgd n kuila a yir Rama. Yẽnda mi n kaooda Israyɛll nebã bʋʋd beenẽ me. Yẽnda mee tẽn-kugr beenẽ Sẽn-Ka-Saab yĩnga.