1 Sãmwɛlle 6 - WẼNNAAM SEBRE 2014

Filistẽ-dãmbã tɩ lebsa Wẽnnaam kaoolã koglgã

¹ Sẽn-Ka-Saab kaoolã koglgã paa Filistẽ-dãmbã tẽngẽ kiuug a yopoe.

² La Filistẽ-dãmbã boola b maan-kʋʋdbã ne b bagbã n sok-b yaa: «Tõnd na n maana a wãn ne Sẽn-Ka-Saab kaoolã koglgã? Sõng-y tõnd tɩ d bãng d sẽn na n maan to-to n lebs-a a sẽn yiẽ wã.»

³ Bãmb leokame: «Yãmb sã n na n tɩ lebs Israyɛll Wẽnnaamã kaoolã koglgã, bɩ y ra tɩ lebs-a zaalem ye. Bao-y kũun tɩ yɩ maoong y beegrã yĩnga. Dẽ, yãmb na n paama maagre, la y na n bãnga bũmb ning sẽn kɩt tɩ Wẽnnaam sɩbg yãmbã.»

⁴ Filistẽ-dãmbã sokame tɩ yaa bõe kũun la b tõe n kõ Wẽnnaam b beegrã yĩnga. La maan-kʋʋdbã ne bagbã leokame: «Maan-y noad a nu mamsg ne sãnem, ne yõens a nu mamsg ne sãnem, wa sẽn zems Filistẽ-dãmbã nanambs a nu wã sõore. Bala, yaa bãag a yembr n yõk yãmb ne y nanambsã.

⁵ Maan-y noadã ne yõens nins sẽn sãamd-b yãmb tẽngã mamsdo, la y kõ Israyɛll Wẽnnaamã waoogre, tɩ daar ning bɩ Wẽnnaam boog yãmb ne y tẽngã sɩbgrã, la sɩbgr ning sẽn be y wẽnnaam-dãmbã zugã.

⁶ Yaa bõe tɩ y na n keng y sũy wa Ezɩpt nebã ne Faarõ sẽn dag n maanã? Wẽnnaam mengã sẽn sɩbg-bã, b ka bas Israyɛll nebã tɩ b loog sɩda?

⁷ Moasã, kɩt-y tɩ b maan terok-paalle, la y bao nag-yãans a yiib sẽn tar kamb sẽn ket n yẽsemdẽ, la sẽn nan ka tall n tʋme, n balg terokã, la y tall b kambã sẽn tũud-bã n leb yiri.

⁸ Rɩk-y Sẽn-Ka-Saab kaoolã koglgã n sagl terokã pʋga, la y rɩk teed nins fãa yãmb sẽn maan ne sãnem beegrã yĩngã, n ning koglg a to pʋgẽ n sagl n yegl kaoolã koglgã n dig niigã tɩ b looge.

⁹ La bɩ yãmb meng ges sõama: B sã n dɩk Bɛt-Semees toadgã sore, rat n yeelame tɩ Sẽn-Ka-Saab n kɩt tɩ to-kãsengã paam tõndo. La b sã n ka rɩk so-kãnga, tõnd na n bãngame tɩ ka Sẽn-Ka-Saab n sɩbg tõnd ye, yaa toog sẽn wa n paam tõnd a woto bala.»

¹⁰ Dẽ, Filistẽ-dãmbã maana a woto. Bãmb yõga nag-yãans a yiib sẽn tar kamb sẽn ket n yẽsemdẽ, n balg terokã n yaool n pag b kambã yiri.

¹¹ Bãmb sagla Sẽn-Ka-Saab kaoolã koglgã, ne koglg ning sẽn tar sãnem yõensã ne sãnem noadã mamsd terokã pʋgẽ.

¹² Niigã rɩka Bɛt-Semees sorã tɩrg bal n ka bʋdg ye. B rɩka sorã bal n yãbd n loogdẽ, n ka bʋdg goabg wall rɩtg ye. Filistẽ-dãmbã nanambs pʋgla bãmb hal n tɩ ta Bɛt-Semees toadgã.

¹³ Bɛt-Semees nebã rag n bee bãoogẽ n tigsd b bɩle. La b sẽn zẽk b neng n gese, b yãnda kaoolã koglgã, la b maana sũ-noog rẽ yĩnga.

¹⁴ Terokã taa Bɛt-Semees rao a Zozoe pʋʋgẽ wã, la a yalsame. Kug-bedr n dag n be beenẽ. Nebã kell n wesa terokã raado, la b yõg nag-yaansã n maan maoong sẽn yõogd bugum Sẽn-Ka-Saab yĩnga.

¹⁵ Leevi nebã sika Sẽn-Ka-Saab kaoolã koglgã ne koglg ning sẽn tar teed nins sẽn maan ne sãnemã, n dogl kug-bedrã zugu. Badaare, Bɛt-Semees nebã maana maoong sẽn yõogd bugum, ne maand a taab Sẽn-Ka-Saab yĩnga.

¹⁶ La Filistẽ nanambs a nu wã sẽn yã rẽ wã zugẽ, b lebg n leba Ekrõ badaar bala.

¹⁷ Ad sãnem noad mamsd nins Filistẽ-dãmbã sẽn maan n kõ Sẽn-Ka-Saab b beegrã yĩngã: A yembr yaa Asdood yʋʋr yĩnga, a yembr Gaaza yʋʋr yĩnga, a yembr Askalon yʋʋr yĩnga, a yembr Gat yʋʋr yĩnga, la a yembr yaa Ekrõ yʋʋr yĩnga.

¹⁸ Sãnem yõens a nu me n dag n be beenẽ Filistẽ-dãmbã tẽms tẽng fãa yʋʋr yĩnga, la yaa Filistẽ-dãmbã nanambs a nu wã n dag n so tẽn-bãmba. Yaa sẽn sɩng ne tẽng ning sẽn gũbg ne lalsã, n tɩ ta tẽn-bilã sẽn ka tar lalgã, hal n tɩ ta kug-kẽeng ning sẽn be Bɛt-Semees rao a Zozoe pʋʋgẽ wã. Yaa kug-kãng zug la b rogl Sẽn-Ka-Saab kaoolã koglgã, la kugrã ket n bee be hal tɩ ta rũndã.

¹⁹ Sẽn-Ka-Saab kʋʋ Bɛt-Semees neb kẽere, b sẽn lɩk n ges Sẽn-Ka-Saab kaoolã koglgã pʋgẽ wã yĩngã. Neb tus pis-nu wã sʋka, bãmb kʋʋ neb pis-yopoe. Nebã sũyã sãama hal wʋsgo, Sẽn-Ka-Saab sɩbgrã sẽn yɩ toog wʋsgã yĩnga.

²⁰ Bɛt-Semees nebã sokame yaa: «Ãndã n tõe n yals Wẽnnaam Sẽn-Ka-Saab sẽn yaa pʋ-peelem soabã taoore? La kaoolã koglgã sã n yi tõnd nengẽ, yɛ la a na n kẽnge?»

²¹ Bãmb tʋma neb tɩ b kẽng Kiryat-Yeyarim nebã nengẽ n tɩ yeel-b yaa: «Filistẽ-dãmbã lebg n talla Sẽn-Ka-Saab kaoolã koglg n wa. Wa-y n tall-y-yã-a n kẽng y nengẽ.»