1 Sãmwɛlle 5 - WẼNNAAM SEBRE 2014

Kaoolã koglg bee Filistẽ-dãmbã nengẽ

¹ Filistẽ-dãmbã sẽn yõk Wẽnnaam kaoolã koglgã n deegã, b yii ne-a Ebɛn-Ezɛɛr n tall n kẽng Asdoode.

² Filistẽ-dãmbã rɩka Wẽnnaam kaoolã koglgã n tɩ kẽes b wẽn-naandg a Dagõ roogẽ wã, n dɩgl-a n yegl a Dagõ.

³ Vẽkembeoogo, Asdood nebã yika yibeoog pĩnd n mik t'a Dagõ lʋɩɩ yão-vãbg Wẽnnaam kaoolã koglgã taoore. La bãmb rooga wẽn-naandg a Dagõ n lebs n yalsg-a a zĩigẽ wã.

⁴ La vẽkembeoogo, b yikame n leb n mik t'a Dagõ lʋɩ yão-vãbg Wẽnnaam kaoolã koglgã taoore, t'a nusã ne a naoã kao n dʋr digno-koakã zugu, la yaa a mengã bal n dag n kete.

⁵ Woto yĩng n kɩte, t'a Dagõ maan-kʋʋdbã ne neb nins sẽn wat Asdood n kẽed a Dagõ roogẽ wã ka sakd n tab rigno-koakã hal tɩ ta rũndã.

⁶ Sẽn-Ka-Saab sɩbga Asdood nebã wʋsgo, tɩ sũ-sãang kẽ-ba. Sẽn-Ka-Saab kɩtame tɩ nod-kegems yõk Asdood ne a soolmã fãa nebã.

⁷ Asdood raopã sẽn yã toog ning sẽn paam-bã, b yeelame: «Wa-y tɩ d da bas tɩ Israyɛll Wẽnnaamã kaoolã koglgã pa tõnd nengẽ ye. Bala, Wẽnnaam kɩtame tɩ toog paamd tõndo, la ne tõnd wẽnnaam a Dagõ.»

⁸ Bãmb tʋmame tɩ b bool Filistẽ nanambsã n tigim n yeel-b yaa: «Tõnd na n maana a wãn ne Israyɛll Wẽnnaamã kaoolã koglgã?» Nanambsã yeelame tɩ b tall Israyɛll Wẽnnaamã kaoolã koglg n kẽng Gat tẽngã, la b tall-a lame n kẽnge.

⁹ Dẽ, b sẽn tall-a n kẽng beenẽ wã, Sẽn-Ka-Saab sɩbga tẽngã rãmb ne sɩbg-kãsenga. Sũ-sãang wʋsg zĩndame, bala, nod-kegems yõka tẽngã rãmba, sẽn sɩng ne kom-bãoonegã hal tɩ ta kom-kãsemsã fãa.

¹⁰ Woto, Gat nebã talla Wẽnnaam kaoolã koglgã n kẽng Ekrõ. La kaoolã koglgã sẽn ta beenẽ, Ekrõ tẽngã neb kelmame n yeele: «B talla Israyɛll Wẽnnaamã kaoolã koglg n wa ka, n dat tɩ tõnd ne d nebã fãa ki.

¹¹ Dẽ, bãmb tʋmame tɩ b bool Filistẽ-dãmbã nanambsã, n tigim-b n yeel-b yaa: ‹Tɩ lebs-y Israyɛll Wẽnnaamã kaoolã koglgã a zĩigẽ, t'a ra wa kɩt tɩ maam ne b nebã ki ye! Bala, kũum dabeem n dag n kẽ tẽngã.› Wẽnnaam sɩbgrã rag n yaa kãsenga.

¹² Nod-kegemsã yõga neb nins sẽn dag n põs kũumã, la nebã sẽn dag n baood sõngrã kelems rag n zẽkd n tata saasẽ.»