1 Sãmwɛlle 30 - WẼNNAAM SEBRE 2014

A Davɩɩd pʋgla Amalɛk nebã

¹ A Davɩɩd ne a nebã sẽn ta Siklaag rasem a tãabã daare, b mikame tɩ Amalɛk buudã rag n kẽng n tɩ zaba ne nug goabg sẽnẽ nebã la ne Siklaage, n tõog-b n ning b tẽngã bugum.

² Bãmb yõga pagbã ne neb nins sẽn dag n be beenẽ wã fãa n looge, sẽn sɩng ne kãsem n tɩ ta yao-zʋʋga. La b ka kʋ ned ba a yembr ye. B yõg-b lame n tall n kuili.

³ A Davɩɩd ne a nebã sẽn ta tẽngã pʋgẽ, b mikame tɩ b ninga tẽngã bugum, la b talla bãmb pagbã ne b kom-dibli wã la b kom-pugli wã n looge.

⁴ Dẽ, a Davɩɩd ne neb nins sẽn dag n be ne yẽnda wã zẽka b koees n yãbe, hal tɩ b pãngã sɛ.

⁵ Amalɛk-rãmbã rag n yõga a Davɩɩd pagb a yiibã me n looge. Yaa Zizreyɛll biig a Akinoam, ne Karmell dao a Naball pag a Abigayɩlle.

⁶ Sũ-sãan-kãseng n yõk a Davɩɩde, bala, nebã rag n gomdame tɩ b na n lob-a-la kuga, bãmb fãa sũyã sẽn sãam b kom-dibli wã ne b kom-pugli wã yĩngã yĩnga. La a Davɩɩd paama pãng sẽn yit Sẽn-Ka-Saab sẽn yaa yẽnda Wẽnnaamã nengẽ.

⁷ Yẽnda yeela a Ayimelɛk biig a Abiyataar sẽn yaa maan-kʋʋdã yaa: «M kotame tɩ f tall maan-kʋʋr kãsem fuugã n wa.» La a Abiyataar tall-a lame n wa kɩs a Davɩɩde.

⁸ A Davɩɩd soka Sẽn-Ka-Saab yaa: «Mam sã n pʋgl nin-bãmbã, m na n paam-b lame bɩ?» La Sẽn-Ka-Saab leoka yẽnda yaa: «Fo na n paam-b lame n fãag neb nins b sẽn tall n loogã.»

⁹ Dẽ, a Davɩɩd ne neb kobs-yoobã sẽn dag n be ne yẽnda wã rɩka sore, n kẽn n ta Besoor ko-soogã.

¹⁰ La a Davɩɩd kell n kẽnga taoor ne neb kobs-naasã, bala, neb kobs-yi n yals beenẽ, b sẽn yɛ wʋsg n ka leb n tõe n dʋʋg kʋɩlgã yĩnga.

¹¹ Bãmb yãnda Ezɩpt ned a yembr weoogã pʋgẽ n peeg-a n wa a Davɩɩd nengẽ. Bãmb kõ-a-la rɩɩb t'a rɩ la koom t'a yũ.

¹² B leb n kõ-a-la kankam-gil-koeemse, ne reezẽ-gĩn-koeems a yiibu. Yẽnda sẽn dɩ n sɛ, a nengã vẽnegame. Bala, rag n yaa rasem a tãab la yʋnd a tãab yẽnda sẽn ka paam koom ne rɩɩb ye.

¹³ A Davɩɩd sok-a-la a sẽn yaa ned ning yamba, la a sẽn yitẽ. Yẽnda leokame: «Mam yaa Ezɩpt neda, n yaa Amalɛk ned a yembr yamba, la yaa hal rab-tãtẽ la mam zu-soabã loog n bas maam, mam sẽn lʋɩ bãag yĩnga.

¹⁴ Tõnd kẽngame n tɩ zab ne Kerɛt tẽng nug goabg sẽnẽ nebã, ne Zʋʋda soolem nebã, la Kalɛɛb nug goabg sẽnẽ nebã, n ning Siklaag tẽngã bugum.»

¹⁵ A Davɩɩd soka yẽnda yaa: «Fo tõe n yãaga tõnd n kẽng nin-bãmb nengẽ bɩ?» La yẽnda leokame: «Yãmb sã n wẽen ne Wẽnd tɩ y ka na n kʋ-ma, la y ka na n dɩk-m n kõ m soaalã, mam na n tall-y lame n kẽnge.»

A Davɩɩd tõoga Amalɛk nebã

¹⁶ Yẽnda yãaga a Davɩɩd n kẽnge, la b tɩ mikame tɩ Amalɛk-rãmbã pida tẽngã n dɩtẽ la b yũuda, la b maand sũ-noogo, bala, b rag n wʋka te-zɛɛdem wʋsg Filistẽ-dãmbã ne Zʋʋda nebã tẽms pʋsẽ.

¹⁷ A Davɩɩd zaba ne bãmb yibeoog pĩnd hal tɩ ta vẽkembeoogã zaabre, la bãmb ned ba a yembr ka põse, sã n ka kom-bɩɩs kobs-naasã sẽn zomb yʋgmã wã n zoe wã bala.

¹⁸ A Davɩɩd leb n deega Amalɛk-rãmbã sẽn dag n wʋk bũmb ninsã fãa, la a leb n deeg a pagb a yiibã.

¹⁹ La sã n yaa ne a Davɩɩd dãmb neb nins b sẽn dag n yõgã, ned ba a yembr ka paoog ye, sẽn sɩng ne kãsem tɩ tãag yao-zʋʋga, kom-dibli la kom-pugli, la baa Amalɛk rãmbã sẽn dag n wʋk teed ninsã, ba a yembr ka menem ye. A Davɩɩd talla bõn-kãens fãa n looge.

²⁰ A Davɩɩd wʋka rũm-bɛdã ne rũm-bãoonegã. La neb nins sẽn lʋɩ rũmsã taoor n gɩbend-bã rag n yetame: «Ad a Davɩɩd sẽn tɩ zab n deeg la woto fãa!»

²¹ A Davɩɩd sẽn ta zĩig ning neb kobs-yi wã sẽn dag n yɛ wʋsg n ka tõe n leb n kẽng taoorã tɩ b bas-b Besoor ko-soogã noorã, nin-bãmb yiime n na n seg a Davɩɩd ne neb nins sẽn dag n be-b ne a Davɩɩdã. A Davɩɩd kolg-b lame n pʋʋs-b n sok b keelem.

²² Nin-yood ne nin-wẽns nins fãa sẽn dag n tũ a Davɩɩdã yeelame: «Bãmb sẽn ka tũ tõnd n kẽngã, bãmb ka n na paam bũmb nins tõnd sẽn zab n deegã ye. Ned kam fãa na n deega a pag ne a kamb bal n looge.»

²³ La a Davɩɩd yeel-b lame yaa: «M saam-biisi, da maan-y-yã a woto ne bũmb nins Sẽn-Ka-Saab sẽn kõ tõndã ye. Bala, Sẽn-Ka-Saab gũu tõndo, la b kɩtame tɩ tõnd tõog neb nins sẽn wa n zab ne tõndã.

²⁴ Ãnda soab n na n kelg yãmb yel-kãngã pʋga? Neb nins sẽn kẽng zabrã zĩigẽ wã pʋɩɩre, ne neb nins sẽn pa-b poorẽ n gũ teedã pʋɩɩr segd n zema taaba. Bãmb ned kam fãa na n paama pʋɩɩre.»

²⁵ Sẽn sɩng ne badaare, b kɩtame tɩ bõn-kãng lebg no-tũudg ne tõog Israyɛll nebã yĩng hal tɩ ta rũndã.

²⁶ A Davɩɩd sẽn ta Siklaagã, yẽnda yãka teedã n tʋm tɩ b tɩ kõ Zʋʋda nebã kãsem-dãmbã sẽn yaa yẽnda zo-rãmbã, la a yeel-b yaa: «Ad kũun mam sẽn yãk Sẽn-Ka-Saab bɛɛbã teed pʋgẽ yãmb yĩnga!»

²⁷ Woto, yẽnda yãkame n tʋm tɩ b tɩ kɩs Betɛll kãsem-dãmbã, ne Ramot sẽn be nug goabgã kãsem-dãmbã, la Yatɩɩr kãsem-dãmbã,

²⁸ ne Arowɛɛr kãsem-dãmbã, la Sifmot kãsem-dãmbã, ne Ɛstemoa kãsem-dãmbã,

²⁹ la Rakall kãsem-dãmbã, ne Yerameyɛll tẽmsã kãsem-dãmbã, la Kɛn nebã tẽms kãsem-dãmbã,

³⁰ ne Horma kãsem-dãmbã, la Boor-Asãn kãsem-dãmbã, ne Hatak kãsem-dãmbã.

³¹ La a tʋm tɩ b tɩ kɩs Ebrõ kãsem-dãmbã ne zĩis nins fãa a Davɩɩd ne a nebã sẽn dag n kẽngã.