1 Sãmwɛlle 3 - WẼNNAAM SEBRE 2014

A Sãmwɛll boolgo

¹ Bi-bɩɩg a Sãmwɛll dag n bee ne a Eli n maand Sẽn-Ka-Saab tʋʋmde. Wakat-kãnga, Sẽn-Ka-Saab rag n ka wɛ n gomd ne nebã ye. La vẽnegrã me rag n ka wʋsg ye.

² Daar a yembre, a Eli rag n gãee a gãagẽ. A ninã pãng rag n booga wʋsgo, t'a ka leb n neẽ ye.

³ Wẽnnaam fɩtlã rag n ket n witame, la a Sãmwɛll dag n gãee Sẽn-Ka-Saab roogẽ wã, zĩig ning kaoolã koglgã sẽn dag n be wã.

⁴ Sẽn-Ka-Saab boola a Sãmwɛll t'a sak tɩ: «Ad maam!»

⁵ La yẽnda yikame n wudg n kẽng a Eli nengẽ n tɩ yeele: «Ad maam! Bala, yãmb boola maam.» La a Eli leokame: «Ayo! Mam ka bool-f ye! Lebg n tɩ gãande!» La a Sãmwɛll lebg n tɩ gãandame.

⁶ Sẽn-Ka-Saab leb n boola a Sãmwɛlle. La a Sãmwɛll leb n yik n kẽnga a Eli nengẽ n tɩ yeele: «Ad maam! Bala, yãmb boola maam.» La a Eli leokame: «Ayo, m biiga! M ka bool-f ye! Lebg n tɩ gãande!»

⁷ A Sãmwɛll dag n nan ka mi Sẽn-Ka-Saab ye, la a rag n nan zɩ n wʋm Sẽn-Ka-Saab goam vẽeneg-vẽeneg ye.

⁸ Sẽn-Ka-Saab leb n boola a Sãmwɛll naoor a tãabẽ soaba. La a yikame n leb n kẽng a Eli nengẽ n tɩ yeel-a: «Ad maam! Bala, yãmb boola maam.» Dẽ, a Eli bãngame tɩ yaa Sẽn-Ka-Saab n dag n boond biigã.

⁹ A Eli yeela a Sãmwɛll yaa: «Kẽng n tɩ gãande, la b sã n leb n bool foom bɩ f leok yaa: Sẽn-Ka-Saabo, gom-y tɩ y tʋmtʋmdã kelgdame.» Woto, a Sãmwɛll lebg n tɩ gãandame.

¹⁰ Sẽn-Ka-Saab leb n waa a Sãmwɛll nengẽ. Bãmb leb n bool-a-la wa pĩndã: «Sãmwɛlle! Sãmwɛlle!» La a Sãmwɛll leokame: «Gom-y tɩ y tʋmtʋmdã kelgdame.»

¹¹ Woto, Sẽn-Ka-Saab yeela a Sãmwɛll yaa: «Gese, mam na n maana bũmb Israyɛll pʋgẽ, tɩ ned ning fãa sẽn na n wʋm-a bɩ a yɛɛse!

¹² Badaare, mam na n pidsa bũmb nins fãa mam sẽn togse, sẽn kẽed ne a Eli roogã wɛɛngẽ wã. Mam sẽn sɩng bũmb ningã, mam na n baas-a lame.

¹³ Mam dag n wilga a Eli tɩ mam meng n na n sãam a roogã wakat sẽn kõn sɛ yĩnga. Bala, yẽnda rag n bãngame t'a kambã beegda maam, la yẽnda yaool n bas-b lame n ka gɩdg-b ye.

¹⁴ Yaa woto yĩng n kɩte, tɩ mam wẽend n yetẽ tɩ maand bɩ kũun ka tol n tõe n yẽes a Eli roogã yel-wẽnã ye.»

¹⁵ A Sãmwɛll kell n gãandame tɩ beoogã vẽege, t'a yaool n yik n pags Sẽn-Ka-Saab roogã kʋɩlemse. A Sãmwɛll dag n zoeta rabeem n ka rat n wilg a Eli vẽnegr ning yẽnda sẽn paamã ye.

¹⁶ La a Eli boola a Sãmwɛll n yeele: «M biig a Sãmwɛlle!» La a Sãmwɛll leokame: «Ad maam!»

¹⁷ La a Eli sok-a lame: «Yaa bõe koɛɛg la Sẽn-Ka-Saab kõ foom? M kotame tɩ f ra solg-m bũmb ba a yembr ye. Fo sã n solg maam bũmb nins Sẽn-Ka-Saab sẽn yeel foomã baa bilfu, bɩ Sẽn-Ka-Saab sɩbg foom sɩbg-kãsenga.»

¹⁸ Dẽ, a Sãmwɛll togsa a Eli bũmbã fãa n ka solg ba a yembr ye. La a Eli yeelame: «Bãmb yaa Sẽn-Ka-Saabo. Bɩ b maan sẽn noom bãmba.»

¹⁹ A Sãmwɛll dag n bɩtame, la Sẽn-Ka-Saab rag n bee ne yẽnda, n ka bas b gomd ba a yembr tɩ vaal ye.

²⁰ Israyɛll nebã fãa, sẽn sɩng ne Dan hal tɩ ta Bɛɛr-Seba wã bãngame t'a Sãmwɛll sɩd yaa Sẽn-Ka-Saab no-rɛɛsa.

²¹ Sẽn-Ka-Saab rag n ket n vẽnegda b meng Sɩlo. Sɩlo tẽngã pʋgẽ, bãmb dag n tũnugda a Sãmwɛll n vẽnegd b meng b goamã pʋga.