1 Sãmwɛlle 29 - WẼNNAAM SEBRE 2014

Filistẽ-dãmbã riga a Davɩɩd t'a looge

¹ Filistẽ-dãmbã tigma b tãb-biisã fãa Afɛke, la Israyɛll nebã tilga b tãb-sikã Zizreyɛll ko-bundgã sɛɛgẽ.

² Filistẽ-dãmbã nanambs kolga ne neb koabg-koabga, la neb tusr-tusri, la a Davɩɩd ne a nebã tũ a Akiis n be poorẽ n pʋgda.

³ Filistẽ-dãmbã nanambs sokame tɩ Ebre nin-kãensã maanda bõe kaanẽ? A Akiis leok-b lame: «Yaa Israyɛll rĩm a Sayull tʋmtʋmd a Davɩɩde. Yaa hal daar zãr la yẽnda wa n be ne maam, la mam nan ka yã a sẽn maan bõn-wẽng ye.»

⁴ La Filistẽ-dãmbã nanambs sũy yika ne a Akiis tɩ b yeel-a yaa: «Kɩt-y tɩ rao-kãngã lebg n leb zĩig ning yãmb sẽn kõ-a wã. La a ra tũ tõnd n kẽng zabrã zĩigẽ, n wa tɩ lebg tõnd bɛ zabrã wakat ye. Yẽnda na n yɩɩ wãn t'a soaalã sũur sig ne-a, sã n ka a sẽn na n fiuus tõnd nebã zutu?

⁵ Ka Davɩɩd-kãng yĩng la b sẽn dag n yɩɩnd la b saood n yetẽ tɩ: ‹A Sayull kʋʋ tusri, t'a Davɩɩd kʋ tus piigã› wɛ?»

⁶ A Akiis boola a Davɩɩd n yeel-a yaa: «Mam wẽenda ne Sẽn-Ka-Saab sẽn vɩ wã, tɩ fo yaa nin-tɩrga, la m sũur nooma ne fo sẽn na n tũ maam n kẽnd n zabdẽ la d lebgd n wat tãb-sikẽ wã. Fo sẽn be ne maamã tɛka, mam ka yã bõn-wẽng fo zug ye. La baoosgo, nanambsã sũy ka noom ne foom ye.

⁷ Moasã, bɩ f lebg n kuil ne bãane, la f ra maan bũmb sẽn na n sãam Filistẽ nanambsã sũy ye.»

⁸ A Davɩɩd soka a Akiis yaa: «M soaala, mam maana bõe? Mam sẽn be ne yãmbã tɛka, mam maana bõe tɩ y ka rat tɩ m tũ yãmb n kẽng n tɩ zab ne y bɛɛbã?»

⁹ A Akiis leoka a Davɩɩd yaa: «Mam miime tɩ fo tara bʋʋm wa Wẽnnaam malɛɛka, la Filistẽ-dãmbã nanambs yeelame tɩ fo ka tõe n tũ tõnd n kẽng zabrã ye.

¹⁰ Woto yĩngã, bɩ foom ne neb nins sẽn tũ-b foomã sãd yibeoog pĩnd n looge.»

¹¹ A Davɩɩd ne a nebã sãda yibeoog pĩnd n lebg n leb Filistẽ-dãmbã tẽngẽ, la Filistẽ-dãmbã kẽnga Zizreyɛlle.