1 Sãmwɛlle 28 - WẼNNAAM SEBRE 2014

¹ Wakat-kãnga, Filistẽ-dãmbã rag n tigma b tãb-biisã n na n tɩ zab ne Israyɛll nebã. A Akiis yeela a Davɩɩd yaa: «Bãng tɩ foom ne f nebã na n wa tũu mam tãb-biisã n kẽng zabrã zĩigẽ.»

² A Davɩɩd leoka a Akiis yaa: «Beneere! Bee ne yãmb tɩ y ges y sẽn dat tɩ y tʋmtʋmdã maan bũmb ninga.» Dẽ, a Akiis yeela a Davɩɩd t'a ratame t'a Davɩɩd lebg yẽnda mengã gũud wakat fãa.

A Sayull ne kinkir-baga

³ A Sãmwɛll dag n kiime, tɩ Israyɛll nebã yãb-a, la b mum-a-la a tẽngẽ wã Rama. A Sayull dag n diga kinkir-bagbã ne bagbã fãa n yiis tẽngã pʋgẽ.

⁴ Filistẽ-dãmbã tilga b tãb-sikã Sunem. La a Sayull tigma Israyɛll nebã fãa, n tilg b tãb-sikã Gilboa.

⁵ A Sayull sẽn yã Filistẽ nebã tãb-sikã, rabeem-kãseng yõk-a lame t'a pɛlengã yɩke.

⁶ A Sayull soka Sẽn-Ka-Saab a sẽn tog n maan bũmb ninga, la Sẽn-Ka-Saab ka leok ne zãmsdo, ne Urim, wall ne bãmb no-rɛɛsdbã koɛɛg ye.

⁷ A Sayull yeela a tʋmtʋmdbã tɩ b wilg-a pag sẽn yaa kinkir-bag zĩiga, t'a kẽng n tɩ gese. Yẽnda tʋmtʋmdbã yeel-a lame tɩ pag a yembr n be Ɛn-Door n yaa kinkir-baga.

⁸ La a Sayull toeema fut n yeelg fut a taaba. La yẽnda ne neb a yiib n tũ taab n kẽnge. Bãmb taa pagã nengẽ ne yʋngo. A Sayull yeela pagã yaa: «M kotame tɩ f bool ned a yembr sẽn ki n kõ-ma. Kɩt tɩ ned ning yʋʋr mam sẽn na n pʋdã puki.»

⁹ Pagã yeelame: «Yãmb mi a Sayull sẽn maan bũmb ningã, yẽnda kʋʋ kinkir-bagbã ne tɩ-rɩtbã fãa tẽngã pʋgẽ. Yaa bõe tɩ yãmb makd maam n na n kɩt tɩ b kʋ-ma?»

¹⁰ La a Sayull wẽena ne Sẽn-Ka-Saab yʋʋr n yeele: «Mam wẽenda ne Sẽn-Ka-Saab sẽn vɩ wã, tɩ b ka na n ning foom taal yel-kãngã pʋgẽ ye.»

¹¹ Pagã sokame tɩ ãnda la b rat t'a bool n kõ-ba? A Sayull leokame t'a bool a Sãmwɛll n kõ-a.

¹² La pagã sẽn yãnd a Sãmwɛllã, a kelmame n yeel a Sayull yaa: «Yaa bõe tɩ y belg maam? Yaa yãmb la a Sayulli!»

¹³ Rĩmã yeel-a lame «Da zoe rabeem ye. Fo nee bõe?» Pagã leoka a Sayull yaa: «Mam nee wẽnnaam a ye sẽn pukd tẽngã pʋgẽ n watẽ.»

¹⁴ Dẽ, a Sayull sokame n na n bãng a sẽn wẽnd bũmb ninga. Pagã leokame tɩ yaa nin-kẽem n pukdã, la a pila fuugu. A Sayull bãngame tɩ yaa a Sãmwɛlle, la yẽnda wõgemdame n fõgen a neng tẽnga.

¹⁵ A Sãmwɛll yeela a Sayull yaa: «Yaa bõe tɩ f nams maam n kɩt tɩ m puki?» A Sayull leokame: «Mam bee sũ-sãan-kãseng pʋga. Bala, Filistẽ-dãmbã zabda ne maam, la Wẽnnaam basa maam. Bãmb ka leok maam ne bãmb no-rɛɛsdbã, wall zãmsd pʋgẽ me ye. Mam boond-y lame tɩ y wilg-m m sẽn tog n maam bũmb ninga.»

¹⁶ A Sãmwɛll yeel-a lame: «Sã n yaa tɩ Sẽn-Ka-Saab basa foom n lebg f bɛ, yaa bõe tɩ y sokd maam?

¹⁷ Sẽn-Ka-Saab maanda foom wa b sẽn dag n kɩt tɩ m yeel foomã. Bãmb deega f naamã n kõ a Davɩɩde.

¹⁸ Fo sẽn ka kelg Sẽn-Ka-Saab koɛɛgã, la f ka sak n sãam Amalɛk nebã ne bũmb nins fãa b sẽn tarã wa sẽn zems b sũ-puugrã, yaa rẽ n kɩte, tɩ Sẽn-Ka-Saab maan foom woto rũndã.

¹⁹ Sẽn paase, Sẽn-Ka-Saab na n kɩtame tɩ Filistẽ-dãmbã tõog foom ne Israyɛll nebã. Beoogo, foom ne f kambã na n zĩnda ne maam, la Sẽn-Ka-Saab na n kɩtame tɩ Filistẽ-dãmbã tõog Israyɛll tãb-biisã.»

²⁰ Zĩig pʋgẽ bala, a Sayull lʋɩɩ tẽng a woglmã tɛka, la a Sãmwɛll goamã kɩtame tɩ rabeem-kãseng yõk-a. Sẽn paase, yẽnda rag n ka leb n tar pãng ye. Bala, yẽnda ka rɩ rɩɩb badaare, wĩndgã ne yʋngã tõr ye.

²¹ Pagã sẽn kolg a Sayull n yãnd t'a yɛɛsa wʋsgã, a yeel-a lame: «Gese, mam sẽn yaa yãmb tʋmtʋmd-poakã gẽnega m yõor n maan bũmb ning yãmb sẽn yeel maam tɩ m maanã.

²² Moasã, m kotame tɩ yãmb me kelg y tʋmtʋmd-poakã koɛɛga. Bas-y tɩ m wa ne rɩɩb bilf tɩ y rɩ n paam pãng sorã zugu.»

²³ A Sayull zãgsame n yeel t'a kõn dɩ ye. La a tʋmtʋmdbã ne pagã pẽdg-a lame t'a yaool n sak n dɩ. La yẽnda tik n yikame, n zaoond gãagã zugu.

²⁴ Pagã rag n tara nag-bi-wubdg a yãgrẽ wã. Yẽnda kẽnga tao-tao n yõk nag-bilã n kʋ n segle, la a yãk zom n nag n maan bur sẽn ka ning rã-bɩlle.

²⁵ Pagã rɩka rɩɩbã n wa rɩgl a Sayull ne a tʋmtʋmdbã, la bãmb dɩɩme, la b yik yʋn-kãng bal n looge.