1 Sãmwɛlle 26 - WẼNNAAM SEBRE 2014

A Davɩɩd leb n basa a Sayull n ka kʋ ye

¹ Zɩf nebã kẽnga a Sayull nengẽ Gɩbeya n tɩ yeel-a t'a Davɩɩd solga Hakɩla kunkubã sẽn be zĩ-koɛɛngã neng taoorã.

² Dẽ, a Sayull yika ne Israyɛll tãb-biis tus a tãab nins b sẽn yãk tãb-biisã sʋkã n kẽng Zɩf we-raoogã pʋgẽ n na n tɩ bao a Davɩɩde.

³ A Sayull tilga a tãb-sikã Hakɩla kunkubã sẽn be zĩ-koɛɛngã neng taoorã zutu, n pẽneg sorã noore. A Davɩɩd dag n bee we-raoogã pʋgẽ, la a sẽn wʋm t'a Sayull waa beenẽ n baood-a wã,

⁴ a tʋma tẽn-gũusdb tɩ b tɩ gese, la b sɩd tɩ mikame t'a Sayull waame.

⁵ Dẽ, a Davɩɩd yik n kẽnga zĩig ning a Sayull sẽn tilg a tãb-sikã, la a yãnda zĩig ning a Sayull ne a tãb-biisã naab a Neer biig Abneer sẽn gãeẽ wã. A Sayull dag n gãee tãb-sikã tẽn-sʋka, t'a nebã gũbg-a.

⁶ A Davɩɩd soka Hɛt ned a Ayimelɛk ne a Seruya biig a Abisayi sẽn yaa a Zoaab ba-biigã yaa: «Ãnda n na n tũ maam tɩ d kẽng a Sayull tãb-sikẽ wã?» La a Abisayi yeelame t'a na n tũume.

⁷ A Davɩɩd ne a Abisayi tũu taab ne yʋng n kẽng a Sayull nebã sẽn beẽ wã, la b tɩ mikame t'a Sayull gãee tãb-sikã tẽn-sʋka, n gõe t'a kãndã kɩ tẽng a zugẽ wã. La a Abneer ne a nebã rag n gãeeme n gũbg yẽnda.

⁸ A Abisayi yeela a Davɩɩd yaa: «Rũndã yẽ, Wẽnnaam yõka y bɛ wã n kõ-yã. M kotame tɩ y bas tɩ m dɩdg-a ne tẽngã n kõs-a ne m kãndã vugr bala, ka na n yɩ tɩlɛ tɩ m leb n kõs-a ye!»

⁹ A Davɩɩd yeela a Abisayi yaa: «Da kʋ-b ye. Bala, ned sã n sɩɩs Sẽn-Ka-Saab sẽn yãk-a soabã, a na n konga bʋʋm.»

¹⁰ La a Davɩɩd yeelame: «Mam wẽenda ne Sẽn-Ka-Saabo, tɩ yaa Sẽn-Ka-Saab bal n na n yãk yam ne a sẽn na n ki to-to, tõe n yɩ a daar n ta, wall a kẽnga zabr n tɩ pa tãpẽ.

¹¹ Abada! Bɩ Sẽn-Ka-Saab sõng-m tɩ nug ra sɩɩs soab ning bãmb sẽn yãkã ye. M kotame tɩ y rɩk b kãndã sẽn yeg b zugã ne b lɩngã bal n looge.»

¹² A Davɩɩd dɩka kãndã ne lɩngã sẽn dag n be a Sayull zugẽ wã n looge, tɩ ned ka yãnd-ba, wall bãng ye. La ned ka nek me ye. Bala, b fãa rag n gõeeme. Sẽn-Ka-Saab rag n kɩtame tɩ gõe-kãseng yõk bãmba.

¹³ A Davɩɩd leba tãngã kɩreng a to wã hal yɩɩga, n tɩ rʋ kunkubr ning sẽn dag n yeg bãmbã. La vɩʋ-kãseng n dag n be bãmb ne taab sʋka.

¹⁴ La a Davɩɩd zẽka a koɛɛg n yeel nebã ne a Neer biig a Abneer yaa: «Leok-m wɛ Abneere!» La a Abneer leokame: «Foom la ãndã n zẽkd f koɛɛg ne rĩmã?»

¹⁵ T'a Davɩɩd leoke: «Yãmb ka rao la? Yãmb to bee Israyɛll sɩda? Bõe yĩng tɩ yãmb ka gũ rĩmã sẽn yaa yãmb soaalã sõama? Bala, tẽngã ned a yembr n dag n wa beenẽ n na n kʋ rĩmã sẽn yaa yãmb soaalã.

¹⁶ Yãmb sẽn maan bũmb ningã ka neer ye. Mam wẽenda ne Wẽnnaam tɩ yãmb zemsa kũum, bala, yãmb ka gũ y soaalã sẽn yaa soab ning Sẽn-Ka-Saab sẽn yãkã ye. Moasã, ges-y bãmb kãndã ne b lɩngã sẽn dag n dɩg b zugẽ wã bee yɛɛnẽ?»

¹⁷ A Sayull bãnga a Davɩɩd koɛɛgã n yeele: «Yaa m biig a Davɩɩd bɩ?» A Davɩɩd leokame: «N-yẽe, m dĩm la m soaala, yaa maam!»

¹⁸ A Davɩɩd leb n yeelame: «N-na! Yaa bõe tɩ y rigd-ma? M maan-y-la bõe? Mam maana bõe sẽn ka zemse?

¹⁹ Moasã, m dĩm la m soaala, m kotame tɩ y kelg-ma: Sã n yaa Sẽn-Ka-Saab n tusd yãmb tɩ y maan maam wẽnga, bɩ b sak n deeg kũun tɩ b sũurã sigi. La sã n yaa ninsaalb n maan a woto, bɩ kãab-wẽng zĩnd b rãmb zut Sẽn-Ka-Saab taoore. Bala, b rigda maam dũndã, tɩ m ka tar zĩig tẽng ning Sẽn-Ka-Saab sẽn kõ b nebã pʋgẽ ye. Bãmb yetame tɩ m kẽng n tɩ waoog bu-zẽmsã wẽnnaam-dãmbã.

²⁰ Bɩ mam zɩɩm da raag zĩig a to tɩ ka Sẽn-Ka-Saab tẽngã pʋgẽ ye. Bala, Israyɛll dĩmã yika zabre, n baood maam wa ned sẽn baood karenga, n digd-m wa ned sẽn digd koadeng tãng zug n dat n kʋ.»

²¹ A Sayull yeelame: «M biig a Davɩɩde, lebg n wa tɩ mam kongame. Lebg n wa tɩ m ka na n leb n maan-f wẽng ye. Rũndã daarã, fo gesame tɩ mam vɩɩmã tara yõod wʋsgo. Ade, mam maana yalemdo, n tudg m meng tudg-kãsenga.»

²² A Davɩɩd leokame: «Rĩmã, ad y kãndã! Tʋm-y y rakõor a yembr t'a wa reege.»

²³ Sẽn-Ka-Saab na n lebsa ned kam fãa wa sẽn zems a tɩrlem ne a pʋ-peelem. Bala, rũndã, Sẽn-Ka-Saab ninga yãmb mam nugẽ, la mam dag n ka rat n sɩɩs soab ning Sẽn-Ka-Saab sẽn yãkã ye.

²⁴ Rũndã, mam sẽn ges tɩ yãmb vɩɩmã yaa bõn-kãsengã yĩnga, Sẽn-Ka-Saab me na n gesa mam vɩɩmã wa bõn-kãsenga, n fãag maam ne toog buud fãa.

²⁵ A Sayull yeela a Davɩɩd yaa: «M biig a Davɩɩde, bɩ Sẽn-Ka-Saab ning f zug barka! Bũmb ning fãa fo sẽn na n maane, f na n paama tõogre.» A Davɩɩd dɩka a sor n looge, la a Sayull kuilame.