1 Sãmwɛlle 22 - WẼNNAAM SEBRE 2014

A Davɩɩd lebga neb sull naaba

¹ A Davɩɩd yii beenẽ n zoe n kẽng Adulam tãngã bokẽ n tɩ soonde. A Davɩɩd kẽem-dãmbã ne a yirã rãmb fãa sẽn wʋm woto, b kẽng n tɩ bʋʋg-a-la beenẽ.

² Neb nins fãa sẽn tar yel-pakre, ne sẽn tar-b samã la sũ-pa-noaang rãmbã kẽng n tɩ tigma taab a Davɩɩd nengẽ, t'a lebg b naaba. Nebã sẽn wa n tigim yẽnda nengẽ wã sõor dag n taa neb kobs-naase.

³ A Davɩɩd yii beenẽ n kẽng Mitspe sẽn be Moaabã. La yẽnda yeela Moaab rĩmã yaa: «M kot-y lame tɩ y sak tɩ m ba wã ne m ma wã zĩnd ne yãmb hal tɩ m wa bãng Wẽnnaam sẽn dat n tall maam n maan bũmb ninga.»

⁴ La yẽnda peega a ba wã ne a ma wã n kẽng Moaab rĩmã nengẽ, la b zĩnda beenẽ wakat ning fãa yẽnda sẽn zĩnd tãmsã bogd pʋsẽ wã.

⁵ Wẽnnaam no-rɛɛs a Gaad yeela a Davɩɩd yaa: «Da zĩnd tãmsã bogd pʋsẽ ye. Yik n kẽng Zʋʋda tẽngã pʋgẽ.» La a Davɩɩd yii beenẽ, n kẽng Herɛt weoogã pʋgẽ.

A Sayull kʋʋ Noob tẽng maan-kʋʋdbã

⁶ A Sayull wʋmame tɩ b paama a Davɩɩd ne neb nins sẽn be ne yẽnda wã kibare. A Sayull dag n bee Gɩbeya tãngã zug n zĩ tɩɩg tẽngr n zãad a kãnde, t'a nanambsã gũbg-a.

⁷ A Sayull yeela tʋmtʋmdbã sẽn dag n be ne yẽnda wã yaa: «Benzame nebã, m kotame tɩ y kelge! A Izayi biigã na n kõo yãmb fãa pʋt ne reezẽ tɩɩs bɩ? Yẽnda na n kɩtame tɩ y lebg neb tusr-tusr bɩ koabg-koabg nanambs la?

⁸ Yaa bõe tɩ yãmb fãa sɩɩg taab noor n ka rat n togs maam tɩ m biigã maana kaool ne a Izayi biigã? Yãmb ned ba a ye ka zoe mam nimbãanega, n wilg maam tɩ m biigã kɩtame tɩ mam tʋmtʋmdã yik zabr ne maam, n soosd n dat n kʋ maam wa b sẽn maan rũndã wã la?»

⁹ Edom rao a Doɛɛg sẽn dag n be ne a Sayull tʋmtʋmdbã yeelame yaa: «Mam yãnda a Izayi biigã sẽn kẽng Noobe, a Akituub biig a Ayimelɛk nengẽ.

¹⁰ A Ayimelɛk soka Sẽn-Ka-Saab a Davɩɩd sẽn tog n maane, la yẽnda kõ-a-la rɩɩbo, la a rɩk Filistẽ dao a Golyat zabr sʋʋgã n kõ-a.»

¹¹ Rĩmã tʋma neb tɩ b tɩ bool a Akituub biig a Ayimelɛk sẽn yaa maan-kʋʋdã ne a yirã rãmba, la maan-kʋʋdb nins sẽn be Noobã tɩ b wa. La bãmb fãa waa rĩmã nengẽ.

¹² A Sayull yeelame: «Akituub biiga! Mam kotame tɩ f kelge!» La yẽnda yeelame: «N-na, ad-ma!»

¹³ La rĩmã soka a Ayimelɛk yaa: «Yaa bõe tɩ foom ne a Izayi biig a Davɩɩd sɩɩg taab noor n na n zãmb maam a woto? Bõe yĩng tɩ fo kõ-a rɩɩb la zabr sʋʋga, la f sok Wẽnnaam n kõ-a, t'a kɩɩsd maam n dat n soos n kʋ maam rũndã?»

¹⁴ A Ayimelɛk leoka rĩmã yaa: «Yãmb tʋmtʋmdbã fãa sʋka, ned ka be n yaa sɩd soab wa a Davɩɩd ye. Yẽnda yaa yãmb rɛɛmba, n yaa y gũudbã naaba, la a tara waoogr yãmb yirã rãmb fãa nifẽ.

¹⁵ Ka rũndã bal la mam sok Wẽnnaam n kõ yẽnda ye. Bɩ rĩmã ra ning maam wall m tʋmtʋmdbã taal ye. Bala, y tʋmtʋmdã ka tol n mi tɩ yell n be yãmb sʋk ye.»

¹⁶ La rĩmã yeela a Ayimelɛk tɩ yẽnda ne a buudã fãa na n kiime.

¹⁷ Rĩmã yeela gũudb nins sẽn be yẽnda sɛɛgẽ wã tɩ b kẽng n kʋ Sẽn-Ka-Saab maan-kʋʋdbã, bala, bãmb me sõnga a Davɩɩde. B bãngame t'a ra zoetame, la b ka sak n togs yẽnda ye. La rĩmã tʋmtʋmdb ka sak t'a kẽng n kʋ Sẽn-Ka-Saab maan-kʋʋdbã ye.

¹⁸ Woto, rĩmã yeela a Doɛɛg t'a kẽng n kʋ maan-kʋʋdbã. La Edom dao a Doɛɛg kʋʋ maan-kʋʋdbã. Badaare, yẽnda kʋʋ maan-kʋʋdb pis-nii la a nu sẽn dag n yer maan-kʋʋr futu.

¹⁹ A Sayull kɩtame tɩ b kʋ Noob sẽn yaa maan-kʋʋdb tẽngã nebã fãa. Bãmb kʋʋ pagbã ne raopã la kambã, ne kom-peelsã la niigã, ne bõensã la piisã fãa.

²⁰ A Akituub biig a Ayimelɛk biig a yembr bal n põs n zoe n kẽng a Davɩɩd nẽngẽ. Yẽnda yʋʋr boondame t'a Abiyataare.

²¹ Yẽnda togsa a Davɩɩd t'a Sayull kʋʋ Sẽn-Ka-Saab maan-kʋʋdbã fãa.

²² La a Davɩɩd yeela a Abiyataar yaa: «Mam sẽn yã Edom dao a Doɛɛg sẽn dag n be beenẽ badaarã, mam bãngame t'a ka tõe n ka togs a Sayull fãa. Yaa maam n wa ne fo buudã fãa kũum.

²³ Pa ka ne maam, la f ra zoe rabeem ye. Ned sã n baood n kʋ foom, yaa maam la a soab rat n kʋ. Fo sã n zĩnd ne maam, bũmb ka na n maan-f ye.»