1 Sãmwɛlle 2 - WẼNNAAM SEBRE 2014

A Ãnd yɩɩlle

¹ A Ãnd pʋʋsame n yeele: «Mam kɩdemda ne sũ-noog Sẽn-Ka-Saab pʋgẽ. Sẽn-Ka-Saab paasa maam pãnga, la mam tõe n la m bɛɛbã. Mam sũur yaa noogo, y sẽn fãag-ma yĩnga.

² Ned ka be n yaa pʋ-peelem soab wa Sẽn-Ka-Saab ye. Ned a to ka be tɩ sã n ka yãmb ye. Ned ka be t'a pãng zem Wẽnnaam ye.

³ Da gom-y wuk-m-meng goam ye. Da sak-y tɩ y noor yiis tɩtaam goam ye. Bala, Sẽn-Ka-Saab yaa Wẽnnaam sẽn mi fãa. Bãmb makda nebã fãa tʋʋmã.

⁴ Gãndaadã tãbd kaoome, la ka-pãens rãmbã leb n paama pãnga.

⁵ Sẽn dag n dɩt-b n tɩgdã koosda b mens rɩɩb yĩnga, tɩ kom sẽn dag n tar-b rãmbã rɩt n tɩgda. Pʋg-kiir dogda naoor a yopoe, tɩ sẽn dag n dogd-a wʋsgã lebg kiiri.

⁶ Sẽn-Ka-Saab n tõe tɩ ned ki, la b tõe tɩ ned vɩɩmde. Bãmb n tõe tɩ ned sig kɩɩm-kulgu, la b tõe t'a vʋʋge.

⁷ Sẽn-Ka-Saab n tõe tɩ ned lebg naong soaba, la b tõe tɩ ned lebg arzɛk soaba. Bãmb n tõe n sik neda, bãmb n tõe n zẽk-a.

⁸ Sẽn-Ka-Saab n yiisd nimbãan-ned wubsg pʋgẽ. Bãmb n yiisd naong soab tãmpʋʋrẽ, n kɩt t'a zĩnd ne nanambse. Bãmb n kɩtd tɩ b paam waoogr zĩig tɩ yɩ b pʋɩɩre. Bala, dũni wã yẽbgr fãa yaa Sẽn-Ka-Saab n so. La yaa yẽbg-kãens zug la b zaoolg dũni wã.

⁹ Bãmb gũuda neb nins sẽn sakd bãmbã nao-yakmã, la nin-wẽnsã na n menema lik pʋgẽ. Bala, ninsaal ka tõe n tõog ne a meng pãng ye.

¹⁰ Sẽn-Ka-Saab bɛɛbã na n sãamame. Bãmb na n zĩnda saasẽ, tɩ b sa-tãsã sig b bɛɛbã zutu. Bãmb na n kaoo dũni rãmb fãa bʋʋdo. Bãmb na n kõo b rĩmã pãnga, la b paas b nin-tũusdgã pãnga.»

¹¹ Dẽ poore, a Ɛlkana lebg n kuila a yir Rama, la biigã paa maan-kʋʋd a Eli nengẽ n maand Wẽnnaam tʋʋmde.

A Eli roogã beegre

¹² A Eli kambã rag n yaa kom-yoodo, b rag n ka mi Sẽn-Ka-Saab ye.

¹³ Ad maan-kʋʋd-kãens sẽn dag n maand bũmb nins Wẽnnaam nebã nifẽ: ned sã n dag n wa n na n maan maoongo, maan-kʋʋdã tʋmtʋmd wata ne nemd kõsdg sẽn tar yẽn a tãab nemdã rʋgb wakate,

¹⁴ n tʋm bugum dʋkã pʋga, wall kut rʋkã pʋga, wall rʋg-bedrã pʋga, wall rublã pʋga, la nemd nins fãa kõsdgã sẽn na n yiisã yaa maan-kʋʋdã n deegde. Yaa a woto la b rag n maand ne Israyɛll neb nins fãa sẽn dag n kẽnd Sɩlo wã.

¹⁵ Baa sẽn deng b sẽn na n yõog nem-kaamã, maan-kʋʋdã tʋmtʋmd kẽngdame n tɩ yeel ned ning sẽn maand maoongã yaa: «Yãk-y nemdã n kõ maan-kʋʋdã t'a kɩɩme, bala, a ka rat nem-dʋgdg ye, a rata nem-kãado.»

¹⁶ La maoongã soab sã n yeel tɩ b na n deng n yõoga kaamã t'a yaool n yãk a sẽn date, tʋmtʋmdã yetame yaa: «Ayo! Fo sã n ka kõ maam moas-moasã, mam na n yãka ne pãnga.»

¹⁷ A Eli kambã yel-wẽndã rag n yaa beeg-kãseng Sẽn-Ka-Saab nifẽ, bala, b rag n ka nand maand nins b sẽn maand Sẽn-Ka-Saab yĩngã ye.

A Sãmwɛll tʋʋmd Sɩlo

¹⁸ A Sãmwɛll dag n yeelga maan-kʋʋr fuug b sẽn wʋg ne lamd gĩsi, n maand Sẽn-Ka-Saab tʋʋmde.

¹⁹ Yʋʋmd fãa, a Sãmwɛll ma wã rag n wʋgda fu-bila, t'a sã n wa tũud a sɩdã n dabd Sɩlo n na n tɩ maan maoongã, bɩ a zɩ n tɩ kõ-a.

²⁰ A Eli ninga a Ɛlkana ne a pagã zug bark n yeel yaa: «Bɩ Sẽn-Ka-Saab kɩt tɩ pʋg-kãngã rog kamb n kõ foom tɩ b ledg biig ning yãmb sẽn kos n dɩk n kõ bãmbã zĩigẽ.» La bãmb lebg n kuilame.

²¹ Sẽn-Ka-Saab ninga a Ãnd barka, la a leb n dɩka pʋga, n dog kom-dibli a tãabo, ne kom-pugli a yiibu. La biig a Sãmwɛll dag n bɩta Sẽn-Ka-Saab belmã pʋgẽ.

²² A Eli rag n kʋʋla wʋsgo, la a wʋma bũmb nins fãa yẽnda kambã sẽn dag n maand ne Israyɛll nebã. Yẽnda leb n wʋmame tɩ b rag n gãee pagb nins sẽn dag n tʋmd sɛk roogã noorã.

²³ Woto, a Eli yeela a kambã yaa: «Yaa bõe tɩ yãmb maand tʋʋm-yood a woto? Bala, mam wʋmda nebã fãa sẽn gomd yãmb tʋʋm-beedã yelle.

²⁴ M kamb sõmse, da maan-y-yã a woto ye. Mam sẽn wʋmd bũmb ninsã ka sõama ye. Bala, yãmb kɩtdame tɩ Sẽn-Ka-Saab nebã kẽed kongr pʋgẽ.

²⁵ Ned sã n beeg a to, Sẽn-Ka-Saab n na n welg yellã. La ned sã n beeg Sẽn-Ka-Saabo, ãndã n na n yõk sɛɛg a soab yĩnga?» Sẽn-Ka-Saab sẽn dag n yãk yam t'a Eli kambã na n kiime wã yĩnga, b ka kelg b ba wã goam ye.

²⁶ La biig a Sãmwɛll dag n bɩtame, la a rag n taa Sẽn-Ka-Saab ne nebã fãa yam.

B wilga a Eli ne a zakã rãmb sɩbgre

²⁷ Daar a yembre, Wẽnnaam dao n kẽng a Eli nengẽ n tɩ yeel-a yaa: «Ad Sẽn-Ka-Saab koɛɛga: Dẽ yĩnga, fo yaab-rãmbã sẽn wa n ket n be Ezɩpt tẽng n yaa Faarõ yembsã, mam ka puk m meng ne-b sɩda?

²⁸ Mam yãka bãmb Israyɛll buudã fãa sʋk tɩ b yɩ mam maan-kʋʋdba, n get maan-kʋʋrã tʋʋmd yelle, la b kẽnd m tẽn-kugrẽ wã n yõogd wisdu, la b yeelgd maan-kʋʋr futã mam taoore. La mam dɩka Israyɛll nebã kũunã buud fãa, ne maand nins sẽn yõogd bugmã n kõ y yaab-rãmbã.

²⁹ La yaa bõe yĩng tɩ yãmb ka nand mam maandã ne kũun nins mam sẽn yeel tɩ b maan m sɛk roogã zĩigẽ wã? Yaa bõe tɩ fo nand f kambã n yɩɩd maam? Yãmb yãkda Israyɛll sẽn yaa mam nebã maandã fãa nemd nins sẽn yaa sõama wã n dɩt n nobda.»

³⁰ Beneere, maam a Sẽn-Ka-Saab sẽn yaa Israyɛll Wẽnnaamã yetame yaa: «Mam dag n yeelame tɩ yãmb doogã ne y yaab-rãmbã roog na n maana mam tʋʋmdã wakat fãa yĩnga. La moasã, maam a Sẽn-Ka-Saab yetame tɩ kãab-kãngã kõn tol n leb n paam pidsg yɛs ye. Bala, mam waoogda neb nins sẽn waoogd maamã, la neb nins sẽn paoogd maamã na n paama paoogre.»

³¹ Ade, daar n wate, tɩ mam na n kɩt tɩ foom ne f buudã pãng sɛ, la ned sẽn kʋʋl ka na n leb n zĩnd fo buudã sʋk ye.

³² Fo na n yãnda bõn-sõama nins fãa mam sẽn na n maan n kõ Israyɛll nebã, la ned sẽn kʋʋl kõn leb n zĩnd fo buudã sʋk abada.

³³ La mam na n basame tɩ fo buudã ned a yembr kell n zĩnd m maan-kʋʋrã tʋʋmdẽ, sẽn na n yɩlẽ tɩ fo ges tɩ sũ-toog yõk-f tɩ f ninã yiigi. La fo buudã neb nins fãa sẽn dag n tõe n yɩ fo zu-zẽkrã na n paa tãpẽ.

³⁴ Bũmb ning sẽn na n paam fo kamb a yiib a Ofni ne a Fineyaasã na n yɩɩ bãnd fo yĩnga. Bãmb b yiibã fãa na n kii daar a yembre.

³⁵ La mam na n yãka maan-kʋʋd sẽn yaa sɩd soaba, m mengã yĩnga, sẽn maand sẽn noom maam, la sẽn tat mam yam. Mam na n kɩtame t'a yagensã maan maan-kʋʋr tʋʋmdã ne sɩda, la b kell n kẽn mam nin-tũusdgã taoor wakat fãa.

³⁶ La fo yagens nins sẽn kellã na n tɩ wõgemda maan-kʋʋdã taoore, n kos ligd ne rɩɩbo, la a yeele: «M kotame tɩ y kõ-m tʋʋmd a yembr maan-kʋʋr tʋʋmã sʋka, tɩ m tõe n paamd rɩɩb n dɩtẽ.»