1 Sãmwɛlle 18 - WẼNNAAM SEBRE 2014

A Zonatã ne a Davɩɩd zoodo

¹ A Davɩɩd sẽn gom ne a Sayull n sɛ wã poore, a Zonatã yamã kẽ a Davɩɩde, t'a nong-a wa a menga.

² Badaar bala, a Sayull reega a Davɩɩd a nengẽ, n ka bas-a t'a leb a ba wã zakẽ ye.

³ A Zonatã maana kaool ne a Davɩɩde, yẽnda sẽn nong-a wa a mengã yĩnga.

⁴ Yẽnda yeega a fu-bedrã ne zab-futã, la a sʋʋgã ne a tãpã la a sẽbdgã, n kõ a Davɩɩde.

⁵ A Sayull sẽn tʋm a Davɩɩd zĩig ning fãa, a paamda tõogre. Dẽ, a Sayull kɩtame t'a Davɩɩd lebg tãb-biisã naaba. La nebã fãa rag n nong-a lame, hal baa ne a Sayull tʋmtʋmdbã.

A Sayull maana sũ-kiir ne a Davɩɩde

⁶ A Davɩɩd sẽn kʋ Filistẽ daoã n sɛ tɩ nebã yi zabrã zĩigẽ n lebg n kuiisẽ wã, pagbã yii Israyɛll tẽmsã fãa pʋsẽ, n yɩɩndẽ la b saood n segd rĩm a Sayulli, la b wẽed sɩlsãgs ne kʋla, la b kilsdẽ.

⁷ Pagbã yɩɩnda ne sũ-noog n sokd taaba, la b yetẽ yaa: «A Sayull kʋʋ tusri, t'a Davɩɩd kʋ tus piiga.»

⁸ Gom-kãng kɩtame t'a Sayull sũurã yik wʋsgo, t'a yeele: «B yetame t'a Davɩɩd n kʋ tus piiga, tɩ mam kʋ tusri. A sẽn ka tar bũmb ning yaa naamã bala.»

⁹ Dẽ, sẽn sɩng ne badaare, a Sayull dag n geta a Davɩɩd ne gũus-m-menga.

¹⁰ Vẽkembeoogo, sɩ-wẽngã Wẽnnaam sẽn tʋmã wa n kẽ a Sayulli, t'a yik n sɩng biulung a roogã pʋgẽ. La a Davɩɩd wẽe kʋnde, wa yẽnda sẽn mi n maand wakat fãa wã. La a Sayull dag n zãada kãnd a nugẽ.

¹¹ A Sayull zẽka a kãndã n tão a Davɩɩd la a yet a sũurẽ: «Mam na n tãoo a Davɩɩd n ka-a ne roogã.» La a Davɩɩd kuuga naoor a yiib tɩ kãndã ka paam-a ye.

¹² A Sayull dag n zoeta a Davɩɩde, bala, yẽnda bãngame tɩ Sẽn-Ka-Saab bee ne a Davɩɩde, n yaool n bas yẽnda a Sayulli.

¹³ A Sayull kɩtame t'a Davɩɩd yi a zakẽ wã, n lebg tãb-biis naaba. La a Davɩɩd dag n lʋɩta nebã taoor tɩ b kẽnd n zabdẽ la b watẽ.

¹⁴ A Davɩɩd dag n paamda tõogr ne bũmb fãa, la Sẽn-Ka-Saab rag n bee ne yẽnda.

¹⁵ A Sayull sẽn yã t'a Davɩɩd paamda tõogr wakat fãa wã, a rag n zoet-a-la wʋsgo.

¹⁶ La Israyɛll nebã ne Zʋʋda nebã fãa rag n nonga a Davɩɩde, yẽnda sẽn lʋɩt bãmb taoor tɩ b kẽnd n zabdẽ la b watẽ wã yĩnga.

A Davɩɩd peega a Mikall n maan a paga

¹⁷ A Sayull yeela a Davɩɩd yaa: «Ad mam bi-pugl-kãseng a Meraabe. Mam na n dɩk-a lame n kõ foom tɩ f maan f paga. Fo we n yɩ gãndaoog n tʋm mam yĩnga, la f zab Sẽn-Ka-Saab zabã. A Sayull dag n tagsdame tɩ we n da tũ ne yẽnda nug t'a Davɩɩd ki ye. Bala, a rag n datame tɩ tũ ne Filistẽ-dãmbã nugu.»

¹⁸ A Davɩɩd yeela a Sayull yaa: «Mam yaa ãnda, la mam buudã ne m ba wã zak rãmb yaa ãnda rãmb Israyɛll buudã sʋka, tɩ mam na n lebg rĩmã rɛɛmba?»

¹⁹ La wakat ning b sẽn da tog dɩk a Sayull bi-pugl a Meraab n kõ a Davɩɩdã sẽn ta, b rɩk-a lame n kõ Mehola rao a Adriyɛll t'a maan a paga.

²⁰ A Sayull bi-pugl a Mikall dag n nonga a Davɩɩde. Dẽ, b togsa a Sayulli, la bõn-kãng taa rĩmã yam.

²¹ A Sayull rag n yeta a sũurẽ woto: «Mam na n dɩka m bi-pugl a Mikall n kõ a Davɩɩd tɩ yɩ bẽdg a yĩnga, tɩ Filistẽ-dãmbã paam-a n kʋ.» La a Sayull leb n yeela a Davɩɩd naoor a yiibẽ soab t'a na n dɩka a biigã n kõ-a t'a lebg a rɛɛmba.

²² A Sayull yeela a tʋmtʋmdbã tɩ b soos n wɩdg a Davɩɩde, n yeel-a yaa: «Tõnd ne rĩmã nong-f lame, la bɩ f reeg rĩmã bi-pugl n maan f paga, n lebg rĩmã rɛɛmba.»

²³ A Sayull tʋmtʋmdbã goma woto ne a Davɩɩde, la a Davɩɩd leoka bãmb yaa: «Yãmb tẽedame tɩ yaa nana tɩ lebg rĩm dɛɛmb la? Mam yaa naong soaba, la sẽn paas me, mam yaa talga.»

²⁴ A Sayull tʋmtʋmdbã togs-a-la a Davɩɩd sẽn gom bũmb ninsã.

²⁵ La a Sayull yeela bãmb tɩ b tɩ wilg a Davɩɩd yaa: «Rĩmã ka baood pʋʋsem sẽn kẽed ne yi-kãadmã wɛɛngẽ ye. Rĩmã sẽn dat bala, yaa tɩ f wa ne Filistẽ-dãmbã yo-gãnd koabga, tɩ b rok b sũur ne b bɛɛbã.» A Sayull dag n tagsdame tɩ Filistẽ-dãmbã na n tõog n kʋ a Davɩɩde.

²⁶ A Sayull tʋmtʋmdbã taasa a Davɩɩd gom-kãense, la yellã ta a Davɩɩd yam t'a na n deeg rĩmã biiga, n lebg rĩmã rɛɛmba. La sẽn deng wakat ning b sẽn yãkã taabo,

²⁷ a Davɩɩd yika ne a tãb-biisã n tɩ kʋ Filistẽ-dãmb kobessi. Yẽnda talla b fãa yo-gãnã n wa kõ rĩmã, la b sõd-b-la rĩmã taoore, t'a Davɩɩd tõe n lebg rĩmã rɛɛmba. Dẽ, a Sayull dɩka a Mikall n kõ a Davɩɩd t'a maan a paga.

²⁸ A Sayull yãame tɩ Sẽn-Ka-Saab bee ne a Davɩɩde, la yẽnda bi-pugl a Mikall dag n nonga a Davɩɩde.

²⁹ Dẽ, a Sayull dag n zoeta a Davɩɩd n paasdẽ, la yẽnda kisga a Davɩɩd a vɩɩmã tɛka.

³⁰ La wakat-kãng tɩ Filistẽ-dãmbã nanambs rag n yitame n zabd ne Israyɛll nebã. La b sã n tɩ zab fãa, a Davɩɩd tõogdame n yɩɩd a Sayull tʋmtʋmdb a taabã fãa, la yẽnda yʋʋrã rag n yii wʋsgo.