1 Sãmwɛlle 15 - WẼNNAAM SEBRE 2014

A Sayull kɩɩsg a to

¹ A Sãmwɛll yeela a Sayull yaa: «Yaa maam la Sẽn-Ka-Saab tʋm tɩ m wa ning fo zug kaam tɩ f lebg rĩm n soog Israyɛll sẽn yaa bãmb nebã. Dẽ wã, bɩ f kelg Sẽn-Ka-Saab sẽn yet bũmb ningã.»

² Ade, Saasẽ-Pãng-Soabã yetame yaa: «Mam na n sɩbga Amalɛk nebã, bala, wakat ning Israyɛll nebã sẽn wa n yi Ezɩpt tẽngã, bãmb tek n gɩdg-b-la sorã zugu.

³ Moasã, bɩ f kẽng n tɩ zab ne Amalɛk nebã, n sãam bũmb nins b sẽn tarã zãnga. Da zoe-y b nimbãaneg ye. Kʋ-y pagbã ne raopã, kambã ne kom-peelsã, niigã ne piisã, la yʋgma wã ne bõensã fãa.»

⁴ A Sayull boola tãb-biisã n tigim-b Telayim n sõd-ba. La b sõorã rag n yaa tãb-biis tus kobessi sẽn kẽnd ne nao, n paas Zʋʋda neb tus piiga.

⁵ A Sayull kẽname n ta Amalɛk-rãmbã tẽngẽ, n kɩt tɩ neb soond ko-soogẽ wã.

⁶ A Sayull yeela Kɛn nebã yaa: «Yi-y n zãag-y ne Amalɛk-rãmbã tɩ m da wa naag-y ne bãmb n sãam ye. Bala, yãmb maana Israyɛll nebã fãa neer wakat ning b sẽn wa n yi Ezɩptã.» La Kɛn nebã yiime n bas Amalɛk nebã.

⁷ A Sayull tõoga Amalɛk nebã, sẽn sɩng Havɩla hal n tãag Suur sẽn be Ezɩpt neng taoorã noore.

⁸ Yẽnda yõka Amalɛk rĩm a Agaag vɩɩga, la a kʋ nebã fãa ne sʋʋga.

⁹ La a Sayull ne nebã basa a Agaag n ka kʋ ye. La b basa rũm-bãoonegã ne rũm-bɛd nins fãa sẽn yaa sõama n yɩɩdã. Bãmb ka sak n sãam rũm-kãens ye. La yaa rũms nins fãa sẽn yaa wag n ka tar yõodã bal la b kʋ zãnga.

Sẽn-Ka-Saab basa a Sayulli

¹⁰ Sẽn-Ka-Saab yeela a Sãmwɛll yaa:

¹¹ «Mam maanda m bãngẽ m sẽn yãk a Sayull t'a lebg mam nebã rĩmã yĩnga. Bala, yẽnda basa maam n ka sak mam noorã ye.» A Sãmwɛll sũurã sãama ne Sẽn-Ka-Saab sẽn yeelã. Yẽnda kelem n boola Sẽn-Ka-Saab yʋngã tõre.

¹² A Sãmwɛll yika yibeoog pĩnda, n na n tɩ seg a Sayulli. La b yeela yẽnda t'a Sayull kẽnga Karmell n tɩ me bõn-naandg a meng waoogr yĩnga, n lebg n kẽng Gilgalle.

¹³ A Sãmwɛll kẽnga a Sayull nengẽ, la a Sayull yeel-a lame: «Bɩ Sẽn-Ka-Saab ning y zug barka! Mam maana Sẽn-Ka-Saab sẽn yeelã.»

¹⁴ A Sãmwɛll sokame: «Yaa bõe rũm-bãooneg ne rũm-bɛd yãbr la mam sẽn wʋmdã?»

¹⁵ La a Sayull leokame: «Yaa rũms nebã sẽn tall Amalɛk-rãmbã nengẽ n wa. B basa rũm-bãoonegã, la rũm-bɛd nins sẽn yaa sõama wã, n na n maan maoong n kõ Sẽn-Ka-Saab sẽn yaa yãmb Wẽnnaamã. La rũms a taabã sẽn kellã, tõnd kʋ-b-la zãnga.»

¹⁶ A Sãmwɛll yeela a Sayull yaa: «Yals tɩ m togs-f bũmb ning Sẽn-Ka-Saab sẽn wilg maam yʋngẽ.» A Sayull yeelame t'a togse.

¹⁷ Dẽ, a Sãmwɛll yeelame: «Ka fo sẽn wa n tagsdẽ tɩ f ka fɩ wã la f lebg Israyɛll buudã naab sɩda? Ka Sẽn-Ka-Saab n yãk foom tɩ f lebg Israyɛll rĩm sɩda?

¹⁸ Sẽn-Ka-Saab tʋma foom, n yeel-f tɩ f kẽng n tɩ sãam Amalɛk-rãmbã sẽn yaa nin-wẽnsã, la f zab ne-b n menes-b zãnga.

¹⁹ La yaa bõe tɩ fo ka sak Sẽn-Ka-Saab noore? Yaa bõe tɩ f zoe n bir paoongã, n maan sẽn yaa wẽng n beeg Sẽn-Ka-Saabo?»

²⁰ A Sayull leoka a Sãmwɛll yaa: «Mam saka Sẽn-Ka-Saab noore. Mam kẽnga zĩig ning bãmb sẽn tʋm maamã, la m waa ne a Agaag sẽn yaa Amalɛk-rãmbã rĩmã, la m kʋʋ Amalɛk nebã zãnga.

²¹ La yaa nebã n yãk rũm-bãoonegã ne rũm-bɛd nins sẽn yaa sõama wã, n na n maan maoong n kõ Sẽn-Ka-Saab sẽn yaa yãmb Wẽnnaamã Gilgalle.»

²² A Sãmwɛll yeelame: «Dẽ yĩnga, maand sẽn yõogd bugum ne maand a taab nooma Sẽn-Ka-Saab sũur n yɩɩd bãmb goamã sakr sɩda? Gese! Sakr yɩɩda maando, la kelgr yɩɩda pe-raad kaam.

²³ Bala, kɩɩsg yaa wẽng wa bagr bʋgb sẽn yaa wẽngã, la tõdgr yaa wẽnga, wa bõn-naands pʋʋsg sẽn yaa wẽngã. La fo sẽn zãgs Sẽn-Ka-Saab noorã yĩnga, bãmb me basa foom tɩ f ka na n leb n yɩ rĩm ye.»

²⁴ Dẽ, a Sayull yeela a Sãmwɛll yaa: «Mam beegame, bala, mam kɩɩsa Sẽn-Ka-Saab noore, la m kɩɩs yãmb goamã. Mam zoee nebã n sak n maan b sẽn datã.

²⁵ Moasã, mam kotame tɩ y kõ-m sugr m beegrã yĩnga, la y lebg n wa yãag-m tɩ m tɩ wõgemd Sẽn-Ka-Saab taoor n waoog-ba.»

²⁶ A Sãmwɛll yeela a Sayull yaa: «Mam ka na n yãag foom ye. Bala, fo kɩɩsa Sẽn-Ka-Saab noore, la bãmb me basa foom, tɩ f ka na n leb n yɩ Israyɛll buudã rĩm ye.»

²⁷ La a Sãmwɛll sẽn lebg t'a na n looge, a Sayull gãda a fuugã noor n tak tɩ kẽege.

²⁸ A Sãmwɛll yeel-a lame: «Sẽn-Ka-Saab na n deega fo naamã rũndã, n kõ ned a to sẽn são foom.

²⁹ Soab ning sẽn yaa Israyɛll Wẽnnaam wakat sẽn ka sɛtã ka yagd zĩrẽ, la b ka ninsaal n na n maan b bãngẽ ye.»

³⁰ A Sayull leb n yeelame: «Mam beegame! La baoosgo, mam kot-y lame, tɩ m nebã kãsem-dãmbã ne Israyɛll buudã fãa taoore, bɩ y ra ning-m yãnd ye. Lebg-y n wa-y n yãag-y-m tɩ m tɩ waoog Sẽn-Ka-Saab sẽn yaa yãmb Wẽnnaamã.»

³¹ Dẽ, a Sãmwɛll lebg n tũ a Sayull t'a tɩ wõgemd Sẽn-Ka-Saab taoor n waoog-ba.

³² A Sãmwɛll yeelame tɩ b tall a Agaag sẽn yaa Amalɛk-rãmbã rĩmã n wa. A Agaag kolga ne sũ-noogo, n tagsdẽ tɩ b ka na n leb n kʋ-a ye.

³³ La a Sãmwɛll yeel-a lame: «Wa fo sʋʋgã sẽn kʋ neb wʋsg n kɩt tɩ b ma-rãmbã kong b kambã, woto me, fo ma wã me na n konga a biigã.» Dẽ, a Sãmwɛll kʋʋ a Agaag Sẽn-Ka-Saab taoor Gilgalle.

³⁴ A Sãmwɛll kẽnga Rama, la a Sayull lebg n kuila a yir Gɩbeya.

³⁵ A Samwɛll kiime n ka tol n leb n kẽng a Sayull nengẽ ye. A Sãmwɛll yãba a Sayull yĩng wʋsgo. La Sẽn-Ka-Saab sũur sãama ne b menga, bãmb sẽn yãk a Sayull t'a lebg Israyɛll rĩmã yĩnga.