1 Sãmwɛlle 14 - WẼNNAAM SEBRE 2014

A Zonatã yika zabr ne Filistẽ-dãmbã

¹ Daar a yembre, a Sayull biig a Zonatã yeela bi-bɩɩg ning sẽn zãad-a yẽnda zab-teedã yaa: «Wa tɩ d kẽng Filistẽ-dãmbã tãb-sikã sẽn be hal ka sẽnẽ wã.» A Zonatã yaool n dag n ka wilg a ba a Sayull ye.

² A Sayull dag n bee Gɩbeya toadgẽ wã, n zĩ gernaad tɩɩg ning sẽn be Migrõ wã tẽngre. Neb nins sẽn dag n be ne yẽnda wã sõor kolga neb kobs-yoobe.

³ Wakat-kãng tɩ yaa a Akiya n dag n yeelgd maan-kʋʋr kãsem fuugã. Akiya yaa a Ikabood ba-biig a Akituub biiga. A Akituub yaa a Fineyaas biiga, la a Fineyaas yaa Sẽn-Ka-Saab maan-kʋʋd a Eli sẽn dag n be Sɩlo wã biiga. Tãb-bi-sullã ka bãng a Zonatã loogr ye.

⁴ A Zonatã sẽn tɩ tũ zĩig ning n na n pɩʋʋg n kẽng Filistẽ-dãmbã tãb-sikẽ wã, pĩig kug-sɩlems a yiib n dag n be goabg la rɩtgo. B rag n boonda a yembr tɩ Botsɛte, la b boond a yembrã tɩ Sene.

⁵ A yembr bee rɩtgo, n teesd Mikmaase, t'a yembr be goabga, n teesd Geba sẽnẽ.

⁶ A Zonatã yeela a rakõorã sẽn zãad yẽnda zab-teedã yaa: «Wa tɩ d kẽng nin-bãmbã sẽn ka kẽ bãongã tãb-sikẽ. Daar ninga, Sẽn-Ka-Saab na n sõnga tõndo, bala, bũmb ka be n tõe n gɩdg Sẽn-Ka-Saab tɩ b tũnug neb bilf wall neb wʋsg n fãag ye.»

⁷ Yẽnda rakõorã leok-a lame: «Yãmb sẽn dat n maan bũmb ning fãa, bɩ y maan tɩ mam bee ne yãmba.»

⁸ La a Zonatã yeelame: «Beneere, wa tɩ d kẽng b sẽnẽ, n maan tɩ b yã-do.

⁹ Bãmb sã n yeel tõnd tɩ d yals tɩ b wa, tõnd na n yalsame n ka kẽng b nengẽ ye.

¹⁰ La bãmb sã n yeel tõnd tɩ d wa b nengẽ, bɩ d kẽnge, bala, Sẽn-Ka-Saab rɩk-b lame n ning tõnd nugẽ. Bõn-kãng na n yɩɩ bãnde.»

¹¹ Dẽ, bãmb b yiibã fãa likame tɩ Filistẽ-dãmbã yãnd-ba, n yeele: «Ad Ebre neb sẽn yit bogd nins b sẽn dag n solgã pʋsẽ.»

¹² La Filistẽ-dãmbã yeela a Zonatã ne ned ning sẽn zãad-a yẽnda zab-teedã yaa: «Wa-y tõnd nengẽ tɩ d wilg-y bũmbu.» A Zonatã yeela ned ning sẽn zãad-a yẽnda zab-teedã: «Pʋg maam tɩ d kẽnge, bala, Sẽn-Ka-Saab rɩk-b lame n ning Israyɛll nugẽ.»

¹³ A Zonatã ne a rakõorã kũnumame n dʋ tãngã. A Zonatã rag n pãbda Filistẽ-dãmbã n lubdẽ, t'a rakõorã pʋgd n baasdẽ.

¹⁴ Zab-kãng pʋga, a Zonatã ne a rakõorã sẽn zãad yẽnda zab-teedã kʋʋ neb pisi, la b kʋ-b-la zĩ-sẽk pʋgẽ.

¹⁵ Rabeem-kãseng yõka Filistẽ-dãmbã b tãb-sikẽ wã, ne soolmã nebã, la nebã fãa. Rabeem kẽe baa ne tẽn-gũusdbã ne sãamdbã. Tẽngã rigimdame, la yɩɩ rabeem sẽn yit Wẽnnaam nengẽ.

¹⁶ A Sayull tẽn-gũusdb nins sẽn dag n be Gɩbeya sẽn be Benzame soolmẽ wã yãame tɩ Filistẽ-dãmbã zoet n sãeegd n kẽed goabg la rɩtgo.

¹⁷ Woto, a Sayull yeela neb nins sẽn be ne yẽnda wã yaa: «M kotame tɩ y sõd nebã n bãng neb nins sẽn ka be sõore!» Dẽ, bãmb sõda nebã, la b mikame tɩ yaa a Zonatã ne sẽn zãad-a yẽnda zab-teedã n ka be b sʋka.

¹⁸ Dẽ, a Sayull yeela a Akiya t'a kɩt tɩ b tall Sẽn-Ka-Saab kaoolã koglgã n kolge. Bala, wakat-kãng tɩ kaoolã koglgã bee ne Israyɛll nebã.

¹⁹ A Sayull sẽn wa n ket n gomd ne maan-kʋʋdã, rẽ tɩ rãmbgã rag n paasda Filistẽ-dãmbã tãb-sikẽ wã. La a Sayull yeela maan-kʋʋdã t'a ra leb n nams a meng n sok Sẽn-Ka-Saab ye. La a Sayull ne a tãb-biisã fãa sẽn be ne yẽnda wã tigmame n kẽng zabrã zĩigẽ.

²⁰ La b yãame, tɩ Filistẽ-dãmbã fãa rɩka b sʋʋs n wẽnemd n kɛɛd taaba. Rag n lebga rãmbg-kãseng meng-menga.

²¹ Ebre neb n dag n be ne Filistẽ-dãmbã n sõngd-ba. Bãmb tũu Filistẽ-dãmbã n kẽng b tãb-sikã zĩigẽ wã. Ebre nin-bãmb wẽnemdame n naag Israyɛll neb nins sẽn dag n be ne a Sayull ne a Zonatã wã.

²² Israyɛll neb nins fãa sẽn dag n solg Efrayiim soolem ning sẽn be tãms sʋkã sẽn wʋm tɩ Filistẽ-dãmbã zoetame wã, bãmb me yiime n naag n dig Filistẽ-dãmbã n zab ne-ba.

²³ Badaare, Sẽn-Ka-Saab fãaga Israyɛlle, la b zab n tõoga b bɛɛbã hal n tãag Bɛt-Avɛn zugẽ.

Israyɛll nebã fãaga a Zonatã

²⁴ Israyɛll nebã namsa badaare, bala, a Sayull kɩtame tɩ nebã wẽen n yeel tɩ ned sã n lemb rɩɩb tɩ zaabr ka ta, tɩ yẽnda nan ka paam n dok a sũurã ne a bɛɛbã, bɩ kãab-wẽng paam a soaba. Dẽ, bãmb ned ba a yembr ka tol n lemb rɩɩb ye.

²⁵ Nebã fãa kẽnga weoogã pʋgẽ, la b yãnda sɩɩd sẽn be weoogã zĩig zãnga.

²⁶ Nebã sẽn kẽ weoogã pʋgẽ wã, b yãnda sɩɩdã, la ned ba a yembr ka tol n lemb-a ye, nebã sẽn dag n zoet wẽeneg ning b sẽn dag n wẽenã yĩnga.

²⁷ A Zonatã rag n ka bãng t'a baaba rag n kɩtame tɩ nebã wẽen ye. Dẽ, yẽnda rɩka rasaar ning a sẽn dag n zãadã, n leok sɩɩdã n dɩ, la a nengã yẽegame.

²⁸ Ned a yembr yeela a Zonatã yaa: «Yãmb ba wã rag n kɩtame tɩ nebã wẽen n yeel tɩ ned ning sẽn lemb-a rɩɩb rũndã daarã, bɩ kãab-wẽng paam a soaba.» La nebã yaool n dag n yɛɛme.

²⁹ La a Zonatã leokame: «M baaba baoo toog bal n kõ nebã. Yãmb ka ne tɩ mam sẽn lemb sɩɩdã bilfã, mam nengã yẽegame sɩda?

³⁰ Nebã sã n dag n dɩẽ bũmb nins b sẽn yã b bɛɛbã zĩisẽ wã, b rag n na n tõoga Filistẽ-dãmbã n yɩɩd a woto.»

³¹ Badaare, bãmb tõoga Filistẽ-dãmbã sẽn sɩng Mikmaas hal n tãag Ayalon, la nebã rag n yɛɛ wʋsgo.

³² Israyɛll nebã zɛɛ b bɛɛbã laogã. B yõga rũm-bãoonegã, ne rũm-bɛdã, la b nag-bi wã, n kʋ-b zĩig pʋgẽ, n wãb-b ne b zɩɩmã.

³³ La nebã kẽng n tɩ yeela a Sayull yaa: «Nebã beegda Sẽn-Ka-Saabo, n wãbd nemd ne zɩɩm.» La a Sayull yeelame: «Yãmb sẽn maanã yaa kɩɩsgo. Bilm-y kug-bedr n wa ne ka tao-tao.

³⁴ La y kẽ nebã sʋk n yeel-b tɩ bãmb ned kam fãa tall a naaf wall a peosg n wa kʋ kaanẽ. Rẽ zugẽ, b na yaool n wãbe, la b ra wãb nemdã ne zɩɩmã n beeg Sẽn-Ka-Saab ye.» Badaar yʋngo, ned kam fãa talla a naaf n wa kʋ zĩ-kãngã.

³⁵ A Sayull mee tẽn-kugr Sẽn-Ka-Saab yĩnga, la yɩɩ pipi tẽn-kugr a sẽn me Sẽn-Ka-Saab yĩnga.

³⁶ A Sayull yeelame: «Wa-y tɩ d kẽng n tɩ zab ne Filistẽ-dãmbã yʋngã tõr hal tɩ beoogã vẽege, la d ra bas ned ba a yembr t'a põs ye.» Nebã yeela a Sayull t'a maan a sẽn date. Maan-kʋʋdã yeelame: «Wa-y tɩ d kolg Wẽnnaam taoor kaanẽ.»

³⁷ La a Sayull soka Wẽnnaam yaa: «Dẽ yĩnga, mam tog n kẽng n tɩ zaba ne Filistẽ-dãmbã bɩ? Yãmb na n dɩk-b lame n ning Israyɛll nebã nugẽ bɩ?» La Wẽnnaam ka leok a Sayull tɩ bũmb badaar ye.

³⁸ A Sayull yeelame: «Yãmb fãa sẽn yaa nebã nanambsã, yãmb mens bãnga bũmb ning sẽn wilgd tɩ yãmb beega rũndã wã.

³⁹ Bala, mam wẽenda ne Sẽn-Ka-Saab sẽn yaa Israyɛll fãagdã, tɩ baa sã n yaa mam biig a Zonatã n beege, a na n kiime.» La nebã fãa sẽn tigmã ka leok yẽnda ye.

⁴⁰ A Sayull yeela Israyɛll nebã fãa yaa: «Bɩ y yals toore, tɩ maam ne m biig a Zonatã me yals toore.» La nebã yeela a Sayull t'a maan wa a sẽn date.

⁴¹ A Sayull yeela Sẽn-Ka-Saab yaa: «Israyɛll Wẽnnaam! Yaa bõe tɩ yãmb ka leok maam dũndã? Sã n yaa maam bɩ m biig a Zonatã n beeg yãmba, bɩ y yãk Urim. La sã n yaa Israyɛll nebã fãa n konge, bɩ y yãk Tumim.» La Sẽn-Ka-Saab yãka a Zonatã ne a Sayulli. La taal yii nebã zugu.

⁴² A Sayull yeelame: «Maan-y poeer maam ne m biig a Zonatã sʋka.» La poeerã yãka a Zonatã.

⁴³ A Sayull yeela a Zonatã: «Togs maam fo sẽn maan bũmb ninga.» La a Zonatã yeelame: «Mam dɩka m dasaar n leok sɩɩd bilf bal n lembe. Ad maam! Bɩ y kʋ-ma.»

⁴⁴ A Sayull yeelame: «Zonatã, mam sã n ka kʋ foom, bɩ Wẽnnaam sɩbg maam ne sɩbg-kãsenga.»

⁴⁵ Nebã yeela a Sayull yaa: «Bõe! N kʋ a Zonatã? Ka a Zonatã n kɩt tɩ Israyɛll nebã paam tõog-kãsengã la? Abada! Tõnd wẽenda ne Sẽn-Ka-Saabo, tɩ yẽnda zoobg ba a ye ka na n lʋɩ tẽng ye. Bala, yaa ne Wẽnnaam sõngr la a maan tʋʋm-kãngã rũndã daarã.» Woto, nebã fãaga a Zonatã, tɩ b ka kʋ-a ye.

⁴⁶ La a Sayull basa Filistẽ-dãmbã rigbu, la Filistẽ-dãmbã lebg n kuilame.

A Sayull tõogre

⁴⁷ A Sayull sẽn deeg Israyɛll naamã zugẽ, a zaba ne a bɛɛbã zĩig fãa. Yẽnda zaba ne Moaab rãmbã, ne Amo-rãmbã, la Edom dãmbã, ne Soba rĩm-dãmbã, la Filistẽ-dãmbã. La yẽnda sẽn kẽng zĩig ning fãa, a paamda tõogre.

⁴⁸ Yẽnda rɩka a pãngã fãa, n zab ne Amalɛk n tõog-ba, n fãag Israyɛll nebã neb nins sẽn dag n fãad bãmbã nugẽ.

⁴⁹ A Sayull kambã rag n yaa a Zonatã ne a Yisvi, la a Malkisuwa. La a kom-pugli a yiibã yʋy la woto: Kãsmã yʋʋr la a Meraabe, tɩ yao wã yʋʋr la a Mikalle.

⁵⁰ A Sayull pagã yʋʋr la a Ayinoam, n yaa a Ayimaas bi-pugla. La a tãb-biisã naab yʋʋr la a Abneer sẽn yaa a Sayull saamb a Neer biigã.

⁵¹ A Sayull ba a Kiis ne a Abneer ba a Neer dag n yaa a Abiyɛll kom-dibli.

⁵² A Sayull vɩɩmã tɛka, a zaba ne Filistẽ-dãmbã ne sũuri. A Sayull sã n dag n yãnd ned sẽn yaa gãndaoogo, a rɩkd-a lame t'a lebg a tãb-biiga.