1 Sãmwɛlle 11 - WẼNNAAM SEBRE 2014

A Sayull tõoga Amo nebã

¹ Amo ned a Nahaas kẽnga ne a nebã n tɩ tilg b tãb-sikã Yabɛɛs sẽn be Galaadã n na n zab ne-a. Yabɛɛs nebã fãa yeela a Nahaas t'a maan kaool ne bãmb n soog-ba.

² La Amo ned a Nahaas leok-b lame: «Yãmb sã n dat tɩ mam maan kaool ne yãmba, rẽndame tɩ mam deng n feoog yãmb ned kam fãa rɩtg nifri, n ning Israyɛll nebã fãa yãnde.»

³ Yabɛɛs nebã kãsem-dãmb yeelame: «Bɩ y kõ-d weer dasem a yopoe, tɩ d tʋm neb tɩ b togs Israyɛll nebã fãa, la ned sã n ka be n na n fãag tõndo, d na yaool n sak yãmb sẽn datã.»

⁴ Neb nins b sẽn tʋmã sẽn ta Gɩbeya a Sayull sẽn beẽ wã n togs koe-kãngã tɩ nebã wʋma, b fãa zẽka b koees n yãbe.

⁵ La mikame t'a Sayull dag n yi a pʋʋgẽ ne a nag-koods n watẽ, la a sokame tɩ yaa bõe n tar nebã tɩ b yãbda. La b togs-a-la Yabɛɛs nebã sẽn yeelã.

⁶ A Sayull sẽn wʋm gom-kãense, Wẽnnaam Sɩɩgã kẽe yẽnda, la a sũurã yika hal wʋsgo.

⁷ Yẽnda yãka niig a yiib n kʋ n beese, n kɩs neb nins sẽn wa ne koɛɛgã tɩ b tɩ kɩs Israyɛll soolmã fãa, n yeel tɩ ned ning fãa sẽn ka na n tũ a Sayull ne a Sãmwɛll n kẽng zabrã, b na n maana a soab niigã me a woto. La Sẽn-Ka-Saab rabeem yõka Israyɛll nebã, la b lagma taab n yik wa nin-yende.

⁸ A Sayull tigma Israyɛll nebã Bezɛke. Bãmb sõorã taa tus kobs-tã, tɩ Zʋʋda nebã sõor dag n yaa tus pis-tã.

⁹ Bãmb yeela neb nins sẽn yi Yabɛɛs n wa ne koɛɛgã tɩ b lebg n leb Yabɛɛs sẽn be Galaadã n tɩ yeel nebã, tɩ b na n paama fãagr beoog yibeoogo, wĩndgã sã n wa zẽkdẽ. La b sẽn tɩ taas Yabɛɛs nebã koɛɛgã, b maana sũ-noog wʋsgo.

¹⁰ La Yabɛɛs nebã yeela Amo nebã tɩ beoogo, bãmb na n sakame n wa tɩ b maan bãmb wa b sẽn date.

¹¹ Vẽkembeoogo, a Sayull welga a nebã sags a tãabo. La bãmb kẽe Amo-rãmbã tãb-sikẽ tõd-beoogo, n kʋ-b hal tɩ ta wĩntoogo. Neb bilf nins sẽn põsã sãeegame tɩ ned ka leb n tũ a to ye.

¹² Nebã yeela a Sãmwɛll yaa: «Yaa ãndã rãmb la sẽn dag n yet t'a Sayull ka na n yɩ tõnd dĩmã? Tall-y-b n wa tɩ d kʋ.»

¹³ La a Sayull yeelame: «Ayo! B ka na n kʋ ned rũndã daarã ye. Bala, rũndã, Sẽn-Ka-Saab waa ne fãagr Israyɛll tẽngã pʋgẽ.»

¹⁴ Dẽ, a Sãmwɛll yeela nebã yaa: «Wa-y tɩ d kẽng Gilgall n tɩ yeel t'a Sayull la tõnd dat t'a yɩ d rĩmã.»

¹⁵ Nebã fãa kẽnga Gilgall n tɩ kõ a Sayull naamã Sẽn-Ka-Saab taoor beenẽ. Bãmb maana zems-n-taar maand Sẽn-Ka-Saab taoore, la a Sayull ne nebã fãa maana sũ-no-kãseng beenẽ.