1 Rĩm-dãmbã 7 - WẼNNAAM SEBRE 2014

Rĩm a Salmo na-yirã meebo

¹ La sã n yaa ne rĩm a Salmo meng na-yirã, a me-a lame n sɛ yʋʋm piig la a tãab pʋgẽ.

² A Salmo reng n mee roog ning sẽn boond tɩ ‹Libã tɩɩs roogã.› La ro-kãng woglmã yaa kãntɩɩg koabga, t'a yalmã yaa kãntɩɩg pis-nu, t'a zãntlmã yaa kãntɩɩg pis-tã. B tilga roogã ne sɛɛdr tɩɩs ra-lugds ruls a naase, la b yaool n dɩk sɛɛdr tɩɩs ra-paadsã, n palg b zutu.

³ La ra-bãmb ra palga ra-lugdsã zutu. Ra-paadsã sõor dag n yaa bãmb pis-naas la a nu, la b pʋɩ-b-la ruls a tãabo, tɩ rulg fãa yaa ra-paads piig la a nu. Roogã yĩngrã paga ne sɛɛdr tɩɩs raado.

⁴ La roogã kɩremsã fãa, b maana võy n tong ruls a tãabo, la võor fãa rag n teesa a to.

⁵ Rignoyã ne võ-yalemsã fãa maaname tɩ yaa mags-magse, la bãmb me rag n tota taaba. La võ-yalemsã rag n tonga taab zĩis a tãabo.

⁶ Rĩm a Salmo kɩtame tɩ b me roog a to ne ra-lugdsi, t'a woglmã yaa kãntɩɩg pis-nu t'a yalmã yaa kãntɩɩg pis-tã. La ro-kãng rag n bee roog ning sẽn boond tɩ ‹Libã tɩɩs roogã› neng taoore. La rĩmã ninga ra-lugds roogã noor n maan zãnde.

⁷ Rĩm a Salmo mee roog n ning bʋʋd geer beenẽ, tɩ yaa bʋ-kaoor doogo. La roogã tẽngã n tɩ tãag a yĩngrã, b gãneg-a-la ne sɛɛdr tɩɩs ra-pegdo.

⁸ Rĩm a Salmo mee roog a to sẽn wẽnd ‹Libã tɩɩs roogã›, la ro-kãng rag n bee zak a to pʋgẽ, bʋʋdã roog poore. La a mee ro-kãng buud n kõ Faarõ bi-puglã sẽn dag n yaa yẽnda pagã.

⁹ La ro-bãmba fãa, sẽn sɩng ne b tẽngrã n tãag b yĩngrã, b talla kug-bɛd sẽn pees tɩ yaa neeba, n me ro-kãense, la ro-yɩngã ne zag-kãsengã pʋgã.

¹⁰ Kug nins b sẽn tall n yẽbg roogã rag n yaa kug-neeba, n yaa bɛda. Kug kẽer woglem yaa kãntɩɩg piig-piiga, tɩ kẽer yaa kãntɩɩg a nii-nii.

¹¹ La pipi kugã zutu, b rogla kug-bɛd a taab sẽn pees tɩ yaa neeba, n paas ne sɛɛdr tɩɩs raado.

¹² B mee zag-kãsengã lalg ne kug-bɛd ruls a tãab sẽn dogl taaba, ne sɛɛdr tɩɩs raad rulg a yembre, tɩ kell n yaa wa zak ning sẽn be pʋgẽ n gũbg Sẽn-Ka-Saab roogã ne a noorẽ doogã sẽn me to-to wã.

A Hiram tʋʋmde Sẽn-Ka-Saab roogã yĩnga

¹³ Rĩm a Salmo tʋmame tɩ b kẽng Tɩɩr n tɩ bool a Hiram.

¹⁴ A Hiram ma wã rag n yaa pʋg-kõore, n yaa Neftali buudu. La a ba wã yaa Tɩɩr neda. A Hiram dag n yaa yõaka n mi zũud tʋʋmde, la a tara yam la minim ne bãngr wʋsgo. La a rag n tõe n talla zũud n maan bũmb wʋsgo. Rẽ kɩtame tɩ rĩm a Salmo tʋm tɩ b kẽng Tɩɩr n tɩ bool-a t'a wa tʋm zũudã tʋʋm fãa.

¹⁵ La a Hiram maana zũud ra-lugds a yiibu. Pipi ra-lugdgã woglem yaa kãntɩɩg piig la a nii, la ra-lugdg a yiibẽ soabã taglem yaa wĩir woglem sẽn tat kãntɩɩg piig la a yiib n tõe n vilimd-a n sege.

¹⁶ A Hiram rõoga zũud pugli a yiib n dogl ra-lugdsã zutu. La pugl fãa zãntlem dag n taa kãntɩɩg a nu.

¹⁷ A Hiram leb n maana nag-teed a taab ne zũud n ning pugli wã zutu. Yaa gãmba sẽn yaa neeba. La pugl fãa rag n tara nag-teed a yopoe.

¹⁸ Yẽnda leb n naana te-neeb sẽn wẽnd gernaad tɩɩg biis ruls a yiib n ning n gilg gãmbã wã n lud pugli a yiibã sẽn be ra-lugdsã zutã.

¹⁹ Pugli a yiib n dag n be ra-lugdsã sẽn be yɩng roogã noorã zutu. Pugli wã zãntlem yaa kãntɩɩg a naase, la b ra wẽnda tɩ-puudu.

²⁰ Pugli wã sẽn be ra-lugds a yiibã zutã, b rag n gilg-b-la ne gernaad tɩɩg biis kobessi, la b ra bee yĩngr n pẽ sẽn tʋʋgẽ wã.

²¹ A Hiram lugla ra-lugds a yiib Wẽnd doogã noore. La yẽnda pʋda nug-rɩtg soabã tɩ Yakĩn, la a pʋd nug-goabg soabã tɩ Boaaze.

²² Ra-lugds a yiibã zut rag n maaname tɩ wẽnd tɩ-puudu. Yɩɩ woto la b maan ra-lugdsã n sɛ.

Zũud sĩn-bedrã maanego

²³ A Hiram yẽnega zũud n maan sĩn-bedre. La sĩn-bedrã noorã yalem yaa kãntɩɩg piiga. La a rag n yaa gilga, a zãntlmã yaa kãntɩɩg a nu. La yaa wĩir woglem sẽn tat kãntɩɩg pis-tã n tõe n gilg-a n sege.

²⁴ B maana kãana, n ning-b n gilg sĩn-bedrã noor zãnga, la kãntɩɩg fãa yaa bãmb piig-piiga. La kãanã yaa ruls a yiibu. B naaga sĩn-bedrã ne kãanã n yõg tɩ kell n yaa bũmb a yembre.

²⁵ Sĩn-bedrã ra roga zũud lols piig la a yiib zugu. Lols a tãab nens ra teesa yaanga, t'a tãab tees nin-taoore, t'a tãab tees goabga, t'a tãab tees rɩtgo, tɩ sĩn-bedrã rog bãmb zugu, la lolsã fãa sees teega taab sĩn-bedrã tẽngre.

²⁶ Sĩn-bedrã taglem dag n taa nug-yakemde. La b maana a noorã tɩ wẽnd wũmbl noore, n yaa wa tɩ-puudu. Sĩn-bedrã dag n tõe n deega ko-yʋy tus a yiib koom.

Zuud terok-rãmbã maanego

²⁷ A Hiram maana zũud terok-rãmb piiga, la terok a yembr fãa woglem ne a yalem yaa kãntɩɩg a naas-naase, tɩ b zãntlmã yaa kãntɩɩg a tãab-tãabo.

²⁸ Ad b sẽn maan terok-rãmbã to-to: B rag n maana b wamsã ne zũud sẽn yaa paklse, la b rɩk b wamsã n sog ne tebendsã.

²⁹ B rag n gʋla gɩgma, lolse, la serubẽ-rãmb naana pɩgdsã sẽn dag n dog wamsã zugã zutu. La b maana nag-teed sẽn yaa tɩ-puud buud n ning gɩgma wã ne lolsã yĩngr ne b tẽngr tɩ luundẽ.

³⁰ Terok fãa rag n tara zũud nao gils a naase, b sẽn ning zũud tebends zutu. La terokã sogs a naasã zĩisẽ, b rag n ninga zũud gãts sĩngã tẽngre, la gãtsã rag n bee nag-teedã zugẽ.

³¹ La sĩng fãa b sẽn dag n dɩk n sagl terok fãa pʋgẽ wã, noor ra tʋʋg n yii yɩng sẽn tat kãntɩɩg a yembre. La sĩng fãa noor dag n yaa gilga, t'a yaadmã rag n yaa kãntɩɩg a yembr la pʋɩ-sʋka. La b rag n gʋla nag-teed sĩng fãa noor zugu. La tebendsã rag n yaa magdo, b ka gils ye.

³² Nao-gils a naasã rag n bee kud-paklsã tẽngre, tɩ gãtsã tong ne terokã n yõge. Naoor a yembr fãa zãntlem dag n yaa kãntɩɩg a yembr la pʋɩ-sʋka.

³³ B maana naoã tɩ yaa wa saar nao. B gãtsã ne b zãnt-rãmbã ne b reyõ-rãmbã, n paas b moyo-rãmbã fãa maana ne kutu.

³⁴ Terok fãa rag n tara sogs a naas sẽn naag ne terokã meng n yõge.

³⁵ La terokã zugu, tẽgdg sẽn yaa gilg n dag n be be, t'a zãntlmã zems kãntɩɩg pʋɩ-sʋka. La terokã zugu, b naaga tebendsã ne a kud-paklsã n yõge.

³⁶ La b gʋla serubẽ-rãmba, gɩgma ne koms tɩɩs naana terokã zugu, ne a tebendsã zutu, la b gʋl tɩ-puud n gilg a zãngã.

³⁷ Yɩɩ a woto la a Hiram maan terok-rãmb piigã tɩ b wẽnd taaba: Kutã yaa bũmb a yembre, la b magbã ne b yalẽ wã fãa yaa yembre.

³⁸ A Hiram maana zũud sĩn-bi piiga. La sĩn-bil a yembr fãa tõe n deega ko-yʋy pis-naase. La a yembr fãa zãntlem tata kãntɩɩg a naase. La terok fãa zugu, sĩn-bil a ye n dog be.

³⁹ Yẽnda rɩka terok-rãmb a nu n ning Sẽn-Ka-Saab roogã rɩtgo, la a nu n ning roogã goabga. La a rɩka sĩn-bedrã n ning roogã rɩtgo, n tees wĩndg sẽn pukdẽ sẽnẽ.

⁴⁰ A Hiram maana laase, ne pɛll-dãmba ne zɩɩm mesb laase. A Hiram maana tʋʋm nins rĩm a Salmo sẽn yeel-a t'a maan Sẽn-Ka-Saab roogã yĩngã n sɛ.

⁴¹ Yẽnda maana ra-lugds a yiibu, la a maan pugli n dogl ra-lugdsã zutu. La a maan gãmba a yiib n lud pugli wã sẽn be ra-lugdsã zutã.

⁴² La yẽnda maana te-neeb sẽn wẽnd gernaade.

⁴³ La yẽnda maana sĩn-bi piigã n dogl terok-rãmb piigã zutu,

⁴⁴ la a maana sĩn-bedrã n dogl lols piig la a yiibã zutu,

⁴⁵ ne tompeglem laasã, ne pɛll-dãmbã la ne zɩɩm mesb laasã. Teed nins fãa a Hiram sẽn maan n kõ rĩm a Salmo Sẽn-Ka-Saab roogã yĩngã maana ne zũud halaale.

⁴⁶ Yaa Zʋrdẽ tẽn-nabdrã zug la rĩm a Salmo kɩt tɩ b yẽneg zũudã yak pʋg n maan te-bãmba. Zĩ-kãng bee Sʋkot ne Sartan sʋka.

⁴⁷ Rĩm a Salmo kɩtame tɩ b maan teedã fãa n ka bao n na n mak zũudã n bãng a zɩslem, teedã sẽn yaa wʋsgã yĩnga.

⁴⁸ Rĩm a Salmo leb n maana Sẽn-Ka-Saab roogã teed a taabã me. Yaa sãnem tẽn-kugrã, sãnem taabl ning b sẽn dogend kaset burã a zugã.

⁴⁹ B talla sãnem halaal n maan fɩtl dogends piiga, n ning a nu ro-taoorã sẽn yaa zĩig sẽn welg toor n yɩɩdã rĩgnoorã rɩtgo, la b ning a nu goabga, ne tɩ-puudã, la fɩtl-dãmbã ne b sãnem gãtsã,

⁵⁰ ne la-bãoonegã, la sʋʋsã, ne zɩɩm mesb laasã, ne tʋgdã, la wisd yõogr laasã sẽn maan ne sãnem halaalã, ne sãnem kʋɩlems wẽnemdedse, ro-taoorã sẽn yaa zĩig sẽn welg toor n yɩɩdã yĩnga, la ro-yɩngã kʋɩlemsã fãa yaa sãnem.

⁵¹ Yɩɩ woto la b maan tʋʋm nins fãa rĩm a Salmo sẽn kɩt tɩ b maan Sẽn-Ka-Saab roogã yĩngã n sɛ. Rĩm a Salmo rɩka wanzuri wã ne sãnemã la teed nins a ba a Davɩɩd sẽn dag n welg toor Sẽn-Ka-Saab yĩngã, n tall-b n wa bĩng Sẽn-Ka-Saab roogã laog bĩngr zĩigẽ.