1 Rĩm-dãmbã 6 - WẼNNAAM SEBRE 2014

Wẽnnaam doogã meebo

¹ Rĩm a Salmo sẽn wa n na n sɩng Sẽn-Ka-Saab roogã meebã, rẽ tɩ yaa Israyɛll nebã sẽn yi Ezɩpt yembdã pʋg tɩ yʋʋm kobs-naas la pis-nii. La wakat-kãng yaa a Salmo sẽn deeg naamã tɩ yʋʋm naaslẽ. Dag n yaa yʋʋmdã kiuug a yiib soabã b sẽn boond tɩ Zɩɩv kiuugã pʋga.

² Roog ning rĩm a Salmo sẽn me Sẽn-Ka-Saab yʋʋr yĩngã woglem yaa kãntɩɩg pis-yoobe, t'a yalmã yaa kãntɩɩg pisi, t'a zãntlmã yaa kãntɩɩg pis-tã.

³ La a ro-pʋg ning sẽn be-a noorẽ wã woglem yaa kãntɩɩg pisi, n zems wa roogã woglmã, la a ro-yɩngã ne a pʋgẽ dotã yaa kãntɩɩg piig-piiga.

⁴ La roogã lalg zugu, rĩmã yãka võ-yalemse, n pɩg-b ne bãens tɩ yaa yãasenga.

⁵ Rĩmã mee rot n dogl taab n dɩdg Sẽn-Ka-Saab roogã ne zĩ-sõngã, n tong ne ro-pʋs n gilgi.

⁶ Tẽngr dotã yalem dag n yaa kãntɩɩg a nu, tɩ tẽn-sʋk rãmbã yaa kãntɩɩg a yoobe, tɩ tãabẽ soabã sẽn tong yĩngrã yaa kãntɩɩg a yopoe. Woto, bãmb maana koag roogã yɩngã n gilgi, n palg raadã, sẽn na n yɩlẽ tɩ raadã ra palg roogã lalg zug ye.

⁷ B mee roogã ne kug b sẽn dag n zoe n peese. Woto, roogã meeb wakate, b ka tol n dɩk zãar n wẽ bũmbu, wall b tall lar bɩ kut buud n kɛ wall b pesg bũmb ye.

⁸ Sʋk rotã noy rag n bee Wẽnd doogã nug-rɩtgo, la b rag n tũuda rʋʋdg n dʋʋd yĩngr dotã.

⁹ Rĩm a Salmo sẽn me Wẽnd doogã n sɛ, a kɩtame tɩ b bao sɛɛdr ra-paads ne ra-lugdsi, n lud a yĩngrã fãa.

¹⁰ La a sẽn me rot nins n dogl taabã rɩdga Wẽnnaam doogã, la roog fãa zãntlem dag n yaa kãntɩɩg a nu, la b rɩka sɛɛdr tɩɩs ra-paads n kell n tõk-b ne Wẽnnaam doogã.

¹¹ Sẽn-Ka-Saab goma ne a Salmo n yeel-a yaa:

¹² «Ro-kãngã fo sẽn met mam yʋʋrã yĩngã, fo sã n sak n kẽn wa sẽn zems mam tõodã ne m minindã, la f sak mam no-tũudsã fãa, mam na n pidsa bũmb nins fãa mam sẽn dag n kãab fo ba a Davɩɩdã fo yĩnga.

¹³ Mam na n zĩnda Israyɛll nebã sʋka, la mam kõn tol n bas Israyɛll sẽn yaa mam nebã ye.»

Sẽn-Ka-Saab roogã pʋg nagsgo

^14-15 Rĩm a Salmo sẽn kɩt tɩ b me roogã n sɛ, a baoo sɛɛdr ra-pegd n lud a pʋgẽ lalsã n zẽk n tãag yĩngrã, la b gãneg a tẽngã ne sɩprɛs ra-pegdo.

¹⁶ Dẽ, b maka kãntɩɩg pisi sẽn sɩng ne roogã yaanga, n bao sɛɛdr ra-pegd n pasg tɩ lebg ro-pʋga, la ra-pegdã tilga tẽng n zẽk n tãag lalgã zãntlem. La b boonda taoor do-kãng tɩ zĩig sẽn welg toor n yɩɩd fãa.

¹⁷ Ro-pʋg ning b sẽn pasg n kellã woglem dag n yaa kãntɩɩg pis-naase.

¹⁸ B peesa sɛɛdr ra-pegd n lud roogã pʋgã, la b gʋla kãana ne tɩ-puud naana ra-pegdã zutu tɩ yaa neere. Roogã pʋgã gill fãa rag n luda ne sɛɛdr ra-pegd tɩ ned ka tõe n yãnd kugã ye.

¹⁹ Rĩm a Salmo kɩtame tɩ b maneg zĩig ro-taoorã sẽn yaa zĩig sẽn welg toor n yɩɩd fãa wã, n ning Sẽn-Ka-Saab kaoolã koglgã beenẽ.

²⁰ Ro-taoorã sẽn yaa zĩig sẽn welg toor n yɩɩdã woglem dag n yaa kãntɩɩg pisi, t'a yalmã yaa kãntɩɩg pisi, la a zãntlmã me yaa kãntɩɩg pisi. La b bolg-a-la ne sãnem halaale, la ro-taoorã kõom zĩigẽ, b maana tẽn-kugr n lud-a ne sɛɛdr ra-pegdo.

²¹ Rĩm a Salmo kɩtame tɩ b bolg roogã pʋg zãng ne sãnem halaale, la a kɩt tɩ b maan sãnem yãmdo, n ning ro-taoorã a sẽn bolg ne sãnemã noore.

²² La a rag n kɩtame tɩ b bolg roogã zãng fãa ne sãnem, n kɩt tɩ b bolg tẽn-kugrã sẽn be ro-taoorã noorã me ne sãnem.

²³ Rĩmã kɩtame tɩ b bao oliiv tɩɩg raad n naan serubẽ-rãmb a yiib n ning ro-taoorã sẽn yaa zĩig sẽn welg toor n yɩɩdã pʋga. La serubẽ a ye fãa zãntlem dag n yaa kãntɩɩg piiga.

²⁴ Pipi serubẽ wã pɩgsr a yembr woglem yaa kãntɩɩg a nu, t'a ye wã me woglem yaa kãntɩɩg a nu. Dẽ, sẽn sɩng ne pɩgsr a yembrã satmẽ n tɩ tãag a to wã satmẽ wã, yaa kãntɩɩg piiga.

²⁵ La serubẽ a yiibẽ soabã me pɩgs a yiibã woglem yaa kãntɩɩg piiga. Woto, serubẽ-rãmb a yiibã naandã ne b woglmã fãa zema taaba.

²⁶ Pipi serubẽ wã ne yiibẽ soabã zãntlem dag n zema taaba.

²⁷ Rĩm a Salmo ninga serubẽ-rãmb a yiibã ro-taoorã sẽn yaa zĩig sẽn welg toor n yɩɩdã pʋgẽ. Serubẽ a yembr fãa pɩgsr tika roogã lalga, la bãmb b yiibã pɩgs teega taab roogã sʋka.

²⁸ A Salmo kɩtame tɩ b bolg serubẽ-rãmbã ne sãnem.

²⁹ Rĩm a Salmo kɩtame tɩ b pees roogã lalgã raadã, la a pʋgẽ wã ne a yɩngã, b naana serubẽ-rãmba, la komse, ne tɩ-puud sẽn yaa neeb raadã zug n gilg zĩigã fãa.

³⁰ Yẽnda gãnega sʋk roogã ne ro-taoorã tẽngã ne sãnem.

³¹ La a baoo oliiv tɩɩs raad n maan kʋɩlems a yiib sẽn bogl taab n ning zĩig sẽn welg toor n yɩɩdã roog noore. Rignoorã raadã ne a teedsã taa bãmb b nu.

³² La b rag n maana kʋɩlems a yiibã ne weoogẽ oliiv tɩɩs raado. La b naan serubẽ-rãmb ne komse, la tɩ-puud sẽn yaa neeb kʋɩlemsã zutu, n bolg-b ne sãnem. La b bolga serubẽ-rãmbã ne komsã me sãnem.

³³ Rĩm a Salmo maana roogã noor me ne weoogẽ oliiv tɩɩs ra-pegd a naase.

³⁴ La a maan kʋɩlemsã ne sɩprɛs tɩɩs raado. Pipi kʋɩlengã maana ne ra-pegd a yiib sẽn pakd goabg la rɩtgo, la yiibẽ soabã, b ninga fu-lillids a yiib sẽn pakd goabg la rɩtgo.

³⁵ La kʋɩleng fãa zugu, rĩm a Salmo kɩtame tɩ b gʋl serubẽ-rãmb ne komse, la tɩ-puud sẽn yaa neeba, n kɩt tɩ b bolg-b ne sãnem.

³⁶ A Salmo mee pʋgẽ zakã lalg ne kug sẽn pees rulg a tãabo, la a rogl sɛɛdr raad rulg a yembre.

³⁷ Yaa a Salmo sẽn deeg naam tɩ yʋʋm naaslẽ, Zɩɩv kiuugã pʋgẽ, la b yẽbg Sẽn-Ka-Saab roogã.

³⁸ A Salmo sẽn deeg naamã tɩ yʋʋm piig la a yembre, kiuug a nii soabã sẽn yaa Bull kiuugã pʋgẽ, la Sẽn-Ka-Saab roogã me n sɛ zãng fasɩ, la roogã yɩɩ wa a sẽn dag n tog n yɩ to-to wã. A Salmo mee Sẽn-Ka-Saab roogã yʋʋm a yopoe pʋgẽ.