1 Rĩm-dãmbã 5 - WẼNNAAM SEBRE 2014

A Salmo yam, la a tõogre

¹ Rĩm a Salmo sooga Israyɛll tẽmsã fãa, sẽn sɩng ne Efrat kʋɩlgã, hal tɩ ta Filistẽ-dãmbã tẽngã ne Ezɩpt todsã. Tẽn-bãmb fãa rag n wata ne kũun n kõt a Salmo, la rĩm a Salmo sooga bãmb a vɩɩmã tɛka.

² Daar fãa, rĩm a Salmo moenegda a zakã ne zom-bãaneg yond a yoobe, la zom-yãas yond piig la a yiibu,

³ n paas nag-nobds piiga, ne nag-zaals pisi, la rũm-bãooneg koabga, ne walse, la yãgse, wilpeendo ne noose, kolokolo-rãmba, kĩini, lad-rãmb sẽn nob sõama.

⁴ Rĩm a Salmo rag n soo tẽms nins fãa sẽn dag n be Efrat kʋɩlgã rʋʋndã ne b nanambsã, sẽn sɩng ne Tifsa n tɩ tãag Gaaza. La yẽnda rag n vɩɩ bãan ne a yagsã fãa.

⁵ La Zʋʋda ne Israyɛll tẽmsã pʋga, sẽn sɩng ne Dan buudã soolem n tɩ tãag Bɛɛr-Seba, nebã fãa rag n vɩɩ ne bãan la laafɩ. La rĩm a Salmo vɩɩmã tɛka, nebã fãa rag n vɩɩ ne bãane, n kood b reezẽ tɩɩs pʋto la b send b kankamse.

⁶ A Salmo rag n tara wiid tus pis-naase, a saar-dãmbã yĩnga. La a tar wed-rʋʋdb tus-piig la a yiibu.

⁷ Soolmã kombɛɛmb piig la a yiibã ned kam fãa n dag n dɩlgd rĩm a Salmo ne neb nins sẽn dɩt na-yirã kiuug fãa, la b ka basd tɩ bũmb paoog ye.

⁸ Kombɛɛmbã dag n baooda koodo, la yamdo, wiidã, la wed-kɩɩmbã yĩnga, n tall n kẽng n tɩ bĩng zĩig ning rĩmã sẽn be wã, la ned kam fãa maanda wa sẽn zems a tʋʋmde.

A Salmo yam

⁹ Wẽnnaam kõ a Salmo yam ne bãng-kãsenga. La yẽnda minimã rag n yaa wʋsg wa bĩisrã sẽn be ko-kãsengã noorã.

¹⁰ A Salmo yamã rag n yɩɩda yam dãmb nins fãa sẽn dag n be yaangã ne Ezɩpt tẽngã.

¹¹ A Salmo yamã rag n yɩɩda nebã fãa. Yẽnda yamã rag n yɩɩda Ezrak rao a Etãn, ne a Maholl kambã: yaa a Eman, a Kalkolle, ne a Darda. La rẽ kɩtame t'a Salmo yʋʋrã yi n saag soolem nins fãa sẽn dag n gũbg bãmbã.

¹² Rĩm a Salmo wẽe yel-bũn tus a tã, la a yɩɩlã sõor tata yɩɩl tusr la yɩɩl a nu.

¹³ Rĩm a Salmo goma tɩɩs yelle, sẽn sɩng ne Libã Sɛɛdr dãmbã, n tãag izop rãmbã sẽn yit lalsã seesã me yelle. A leb n goma rũms ne bõn-yɩgdɩ yelle, ne bõn-vuudsã la zĩmã yelle.

¹⁴ Buud toor-toorã rĩm-dãmbã sẽn be dũniyã zugã sẽn wʋm tɩ b gomd rĩm a Salmo yamã yellã, b tʋma neb tɩ b wa kelg rĩm a Salmo yam goamã.

Sẽn-Ka-Saab roogã meeb seglgo

¹⁵ Tɩɩr dĩm a Hiram dag n yaa a Davɩɩd zoa hal daar zãra, dẽ, a Hiram sẽn wʋm tɩ b pʋdga a Salmo zug kaam t'a lebg rĩm n deeg a ba zĩiga, yẽnda tʋma neb a Salmo nengẽ.

¹⁶ Rĩm a Salmo tʋmame tɩ b tɩ yeel rĩm a Hiram yaa:

¹⁷ «Yãmb bãngame tɩ m ba a Davɩɩd dag n dat n mee roog Sẽn-Ka-Saab sẽn yaa bãmb Wẽnnaamã yĩnga, la b ka tõog ye. Bala, bɛɛbã rag n yita zĩig fãa n wat n zabd ne bãmba, hal tɩ Sẽn-Ka-Saab wa kɩt tɩ b tõog b bɛɛbã.

¹⁸ Moasã, Sẽn-Ka-Saab sẽn yaa mam Wẽnnaamã kɩtame tɩ mam soolmã fãa zĩ bãane, la b kɩt tɩ mam ka leb n tar bɛyã, la toog me ka leb n beẽ ye.

¹⁹ Dẽ yĩngã, mam tagsdame n dat n me roog Sẽn-Ka-Saab sẽn yaa mam Wẽnnaamã yʋʋr yĩnga. Bala, Sẽn-Ka-Saab rag n yeela m ba a Davɩɩd woto: Fo bi-ribl ning mam sẽn na n kɩt t'a led fo zĩigẽ n dɩ naamã, n na n me roog mam yʋʋrã yĩnga.

²⁰ Dẽ wã, bɩ y kɩt tɩ y ra-kɛɛdbã kẽng Libã tãmsã zut n tɩ kɛ sɛɛdr tɩɩsã raad n wa kõ-ma. Mam tʋmtʋmdbã na n wa sõnga yãmb tʋmtʋmdbã n tʋme, la mam na n yaoo yãmb tʋmtʋmdbã yaoodo, wa sẽn zems yãmb sẽn na n yeel tɩ m yao-b to-to wã. Bala, tõnd ka tar neb sẽn mi raad kɛɛb n ta Sɩdõ nebã ye.»

²¹ A Hiram sẽn wʋm rĩm a Salmo sẽn gom goam ninsã, a sũurã yɩɩ noog wʋsgo, la a yeelame yaa: «Bɩ Sẽn-Ka-Saab yʋʋrã paam pẽgr rũndã daarã, bãmb sẽn kõ a Davɩɩd bi-ribl sẽn tar yam a woto t'a na n soog bu-kãsen-kãngã wã yĩnga.»

²² A Hiram tʋmame tɩ b tɩ yeel a Salmo yaa: «Yãmb sẽn tʋm tɩ b wa togs maam koɛɛg ningã ta-m lame, la m na n maana bũmb ning fãa yãmb sẽn date. Yaa sẽn kẽed ne sɛɛdr tɩɩsã ne sɩprɛs tɩɩsã raad wɛɛngẽ wã.

²³ Mam tʋmtʋmdbã na n talla raadã n yi Libã n kẽng n tɩ sik ko-kãsengã noore. La mam na n kɩtame tɩ b sẽb-b kil-kila, n tũnug-b ko-kãsengã n ta zĩig ning yãmb sẽn na n wilg maamã. La mam na n kɩtame tɩ b logs ra-kilã n bas beenẽ, tɩ yãmb tʋmtʋmdbã tɩ wʋke. La mam sẽn kot yãmb bũmb ning bala, yaa tɩ yãmb kɩt rɩɩbo, m na-yirã neb rɩlgr yĩnga.»

²⁴ Dẽ, a Hiram kõ a Salmo raad tɩ sek wa a sẽn datã tɛka.

²⁵ Woto, rĩm a Salmo rag n kõta rĩm a Hiram Oorz yond tus pisi, la oliiv kaam rʋgd kobsi t'a rɩlgd a zakã rãmb yʋʋmd fãa.

²⁶ Sẽn-Ka-Saab kõ a Salmo yam wa b sẽn dag n yeelã. La rĩm a Hiram ne rĩm a Salmo rag wʋmda taaba, la b maana kaool ne taaba.

Rĩm a Salmo yõgna roogã meeb tʋʋmã

²⁷ Rĩm a Salmo yãka neb tus pis-tã Israyɛll tẽngã gill fãa pʋgẽ tɩ b tʋmd tʋʋm-wɛgla.

²⁸ La kiuug fãa, rĩmã rag n tʋmda bãmb tus piig-piig tɩ b kẽnd Libã n deesd taaba. Neb tus piig sã n tʋm kiuug a yembr Libã, b lebgd n kuil n tɩ vʋʋsa kiuug a yiibu. Yaa a Adoniram n dag yaa pãng tʋʋmã taoor soabã.

²⁹ Rĩm a Salmo dag n tara kug-zɩtb tus pis-yopoe, la kug-pɛɛsdb tus pis-nii tɩ b tʋmd tãmsã zutu.

³⁰ La sẽn paase, yẽnda dag n tara tʋʋm taoor dãmb tus a tã la kobs-tã, tɩ b so tʋmtʋmdbã tɩ b tʋmdẽ.

³¹ Rĩm a Salmo rag n kõo noor tɩ b tũus kug-bɛd n pees tɩ yaa neeba, tɩ b na n tall n yẽbg Wẽnnaam doogã.

³² Rĩm a Salmo ne rĩm a Hiram tʋmtʋmdbã ne Gibal nebã peesa kugã, la b segl raadã, roogã meeb yĩnga.