1 Rĩm-dãmbã 20 - WẼNNAAM SEBRE 2014

A Akaab ne Siiri rĩmã kibare

¹ Siiri rĩm a Bɛn-Hadaad tigma a tãb-biisã fãa, ne a nanambs pis-tã la a yiibã sẽn dag n be ne-a wã, la a rag n tara wiid ne Saar-dãmba. Yẽnda ne a tãb-biisã yiime n tɩ gũbg Samaari tẽngã n na n zab ne-a.

² Siiri rĩm a Bɛn-Hadaad tʋma neb Israyɛll rĩm a Akaab nengẽ.

³ Siiri rĩm a Bɛn-Hadaad kɩtame tɩ b tɩ yeel Israyɛll rĩmã yaa: «Rĩm a Bɛn-Hadaad yetame: Yãmb wanzuri wã ne y sãnemã yaa maam n so. Y pagbã ne y ra-sãmbã yaa maam n so.»

⁴ La Israyɛll rĩmã leok-a lame n yeele: «Mam zu-soab la m dĩma, yaa wa yãmb sẽn yeelã bala. Maam ne mam sẽn tarã fãa yaa yãmb n so.»

⁵ B sẽn tʋm-b rãmbã lebg n wa yeelame yaa: «Ad a Bɛn-Hadaad sẽn yeele: Mam yeelame tɩ b wa togs foom tɩ f rɩk f wanzuri wã ne f sãnemã, la f pagbã ne f kambã n kõ maam.

⁶ Beoog woto wẽnde, bãng-y tɩ mam na n tʋma m tʋmtʋmdbã fo nengẽ. Bãmb na n kẽe fo na-zakã n veese, la b vees fo tʋmtʋmdbã roto, n wʋk bũmb ning fãa sẽn tar yõod ne foomã n looge.»

⁷ Woto, Israyɛll rĩmã boola soolmã kãsem-dãmbã fãa n yeel-b yaa: «M kos tɩ yãmb mengã ges tɩ nin-kãngã baooda tõnd ne wẽnga! Bala, yẽnda tʋma neb tɩ b wa yeel maam tɩ m dɩk m pagbã ne m kambã, la m wanzuri wã ne m sãnemã n kɩs tɩ b wa kõ-a. La mam ka zãgs ye.»

⁸ La Israyɛll kãsem-dãmbã ne nebã fãa yeela rĩm a Akaab yaa: «Da kelg-y-yã-a ye, la ra sak-y n maan-y wa a sẽn yeelã me ye.»

⁹ Dẽ, Israyɛll rĩm a Akaab yeela a Bɛn-Hadaad sẽn tʋm-b rãmbã yaa: «Kẽng-y n tɩ yeel-y m soaal a Bɛn-Hadaad tɩ mam saka pipi kosgã, la moasã wã yẽ, m ka sak ye.» A Bɛn-Hadaad sẽn tʋm-b rãmbã lebg n kẽng n tɩ togsa a Bɛn-Hadaad koe-kãnga.

¹⁰ A Bɛn-Hadaad leb n tʋmame tɩ b tɩ yeel Israyɛll rĩm a Akaab yaa: «Mam sã n ka kɩt tɩ Samaari tẽngã tom sãeege, tɩ bũmb ka kell sẽn sekd tãb-biis nins sẽn tũud maamã nug pidbu, bɩ wẽnnaam-dãmbã sɩbg maam ne sɩbg-kãsenga.»

¹¹ Israyɛll rĩmã leokame n yeele: «Kẽng-y n tɩ yeel-y-yã a Bɛn-Hadaad tɩ sẽn dabd-a zabr ka pẽgd a meng wa sẽn kẽng-a n tɩ zab n tõog n lebg n wa ye.»

¹² B sẽn wa n na n togs a Bɛn-Hadaad koe-kãngã wã, rẽ t'a rag n zĩi ne rĩm-dãmb zãn tẽngr n yũud rãam. Woto, a yeela a tãb-biisã yaa: «Bɩ ned kam fãa rɩk a zab-teedo.» Dẽ, bãmb sũu tãp n teedg n tees Samaari tẽngã.

Israyɛll nebã paama tõogre

¹³ La wakat-kãng bala, Wẽnnaam no-rɛɛs n wa n yeel Israyɛll rĩm a Akaab yaa: «Sẽn-Ka-Saab yetame: ‹Fo nee kʋʋngã sẽn tondã? Rũndã, mam na n kɩtame tɩ f tõog-ba, dẽ, fo na n bãngame tɩ mam yaa Sẽn-Ka-Saabo.› »

¹⁴ Rĩm a Akaab sokame: «Na n tũu ne ãnda nug tɩ d paam tõogre?» La no-rɛɛsã leokame tɩ Sẽn-Ka-Saab yetame: «Yaa soda-kom-bɩɩsã soolem nanambsã sẽn yãkã, la mam na n tũnug n kɩt tɩ y tõoge.» Rĩm a Akaab sokame: «Ãnda n tog n deng n sɩng zabrã?» No-rɛɛsã leb n leokame: «Yaa yãmba!»

¹⁵ Woto, Israyɛll rĩm a Akaab tigma soda-kom-bɩɩsã n sõde, la b sõorã rag n yaa neb kobessi la pis-tã la a yiibu. Dẽ poore, yẽnda tigma Israyɛll tãb-biisã fãa n sõd n mik tɩ b sõorã yaa tãb-biis tus a yopoe.

¹⁶ Rĩm a Akaab ne a tãb-biisã yii wĩnto-sʋk n na n tɩ zabe. Wakat-kãnga, rẽ t'a Bɛn-Hadaad ne nanambs pis-tã la a yiibã sẽn wa n na n sõng yẽnda wã rag n zĩi zãnã tẽngr n yũud rãam tɩ b nems yilimdẽ.

¹⁷ Israyɛll soda-kom-bɩɩsã n deng yi. A Bɛn-Hadaad tʋmame tɩ b tɩ ges n bãng yɛlã sẽn yaa to-to, la b togs-a lame tɩ neb n yi Samaari n watẽ.

¹⁸ A Bɛn-Hadaad yeelame: «B sã n wat n na n baoo laafɩ, bɩ y yõg-b vɩɩse. La b sã n wat n na n baoo zabr me, bɩ y yõg-b vɩɩse!»

¹⁹ Soda-kom-bɩɩsã yii tẽngã n lʋɩ taoor tɩ Israyɛll tãb-biisã fãa yaool n pʋgda.

²⁰ Bãmb ned kam fãa tõog n kʋʋ ned a yembre, la Siiri nebã rag n zoetame tɩ Israyɛll nebã pʋgd n digd-ba. Siiri rĩm a Bɛn-Hadaad zomba wed-moaag n tũ wed-rʋʋdb kẽer n zoe.

²¹ Dẽ, Israyɛll rĩm a Akaab yiime n kʋ wiidã n sãam saar-dãmbã, la a tõoga Siiri nebã ne tõog-kãsenga.

Rĩm a Akaab leb n paama tõogre

²² Wẽnnaam no-rɛɛsã kẽng n tɩ yeela Israyɛll rĩmã yaa: «Paam-y raoodo, la y tags n ges y sẽn na n maanega, bala, yʋʋmdã sã n vẽke, Siiri rĩmã na n lebg n wa zaba ne yãmba.»

²³ Siiri rĩmã tʋmtʋmdb yeel-a lame: «Israyɛll nebã Wẽnnaamã yaa tãms Wẽnnaam. Yaa rẽ yĩng la b sẽn tõog tõndã. Dẽ wã, wa-y tɩ d kẽng tẽn-nabdrẽ wã, n tɩ zab ne-b n ges d kõn tõog-ba.

²⁴ Rẽ yĩngã, ad yãmb sẽn na n maan bũmb ninga: Reeg-y nanam-bãmb fãa naamã, la y kɩt tɩ kombɛɛmb led b zĩisẽ.

²⁵ Bɩ yãmb mengã yãk tãb-biis sõor sẽn zem sẽn ki-bã, la y bao wiid ne saar-dãmb sõor sẽn zem pĩnd dãmbã, tɩ d kẽng tẽn-nabdrẽ wã n tɩ zab ne-ba. Woto, d na ges d sã n kõn tõog-ba.» La a Bɛn-Hadaad kelga b saglgã, la a maana wa b sẽn yeelã.

²⁶ La yʋʋmdã sẽn vẽke, rĩm a Bɛn-Hadaad tigma Siiri rãmbã n kẽng Afɛk n na n tɩ zab ne Israyɛll nebã.

²⁷ Israyɛll rĩm a Akaab me tigma a tãb-biisã, n kõ-b rɩɩbo, tɩ b yi n na n seg Siiri nebã. Israyɛll nebã tãb-sik rag n bee Siiri rãmbã neng taoore. La Israyɛll nebã ka wʋsg ye, b sõorã rag n ka yɩɩd bʋʋs bãg a yiib ye, tɩ Siiri nebã yaool n yɛdg n pid zĩigã.

²⁸ Wẽnnaam daoã leb n waa Israyɛll rĩmã nengẽ n yeele: «Sẽn-Ka-Saab yetame: Siiri nebã yetame tɩ mam yaa tãms Wẽnnaam, tɩ m ka tãn-lond Wẽnnaam ye. Woto yĩngã, mam na n kɩtame tɩ f tõog kʋʋn-kãngã yãmb sẽn ne wã, la yãmb na n bãngame tɩ mam yaa Sẽn-Ka-Saabo.»

²⁹ Israyɛll nebã ne Siiri nebã yalsa beenẽ rasem a yopoe tɩ b nensã tees taaba. La rasem a yopoe wã daare, bãmb yika zabrã, la Israyɛll nebã kʋʋ Siiri tãb-biis tus koabg daar a yembr pʋgẽ.

³⁰ La sẽn kell-bã zoe n tuda Afɛk tẽngã sẽnẽ. La lalgã lʋɩ n põda neb tus pisi la a yopoe n kʋ. Wakat-kãnga, rẽ tɩ rĩm a Bɛn-Hadaad dag n zoeeme n kẽ tẽngã pʋga, n tɩ kẽ roog yaang ro-pʋgẽ n soonde.

³¹ A Bɛn-Hadaad kug-zĩidbã yeel-a lame yaa: «Tõnd wʋmame tɩ b yetẽ tɩ Israyɛll rĩm-dãmbã tara nimbãan-zoeer wʋsgo. Rẽ wã yĩnga, wa-y tɩ d sẽgen sũ-sãang futu, la d loe d zutã ne tãando, n yi n kẽng Israyɛll rĩmã nengẽ, tɩ daar ninga, a na bas yãmb n ka kʋ-y ye.»

³² Dẽ, b baoo sũ-sãang fut n yeelge, la b loe b zutã tãando, n kẽng Israyɛll rĩmã nengẽ n tɩ yeel-a yaa: «Yãmb tʋmtʋmd a Bɛn-Hadaad yõkd-y-la sɛɛga, n kotẽ tɩ y bas-a la y ra kʋ-a ye.» La a Akaab sokame: «Rẽ yĩnga, a Bɛn-Hadaad ket n vɩɩme la? Ad a yaa mam saam-biiga.»

³³ Bãmb sẽn mik tɩ yellã rat n zemsame, b yeelame: «A Bɛn-Hadaad yaa yãmb saam-biig wɛ!» La a Akaab yeelame tɩ b tɩ tall-a n wa. A Bɛn-Hadaad yi a sẽn dag n solgẽ wã n kẽng a Akaab nengẽ. La a Akaab kɩtame t'a kẽ n naag yẽnda a saarã pʋga.

³⁴ A Bɛn-Hadaad yeela a Akaab yaa: «Mam na n lebsa yãmb tẽms nins mam ba wã sẽn dag n dees yãmb ba wã nengẽ wã. Woto, yãmb tõe n kẽnda Damaas n koosd y teed wa mam ba wã me sẽn dag n maand Samaari wã.» Dẽ, rĩm a Akaab yeelame: «Maam a Akaab na n maana kaool ne yãmba, la m yaool n kõ-y lohorem tɩ y looge.» Bãmb sẽn maan kaoolã n sɛ, a Akaab kõ-a-la lohorem t'a looge.

Sẽn-Ka-Saab sũur sãama ne rĩm a Akaabe

³⁵ Wakat-kãnga, Sẽn-Ka-Saab yeela b no-rɛɛsdbã ned a yembr t'a yeel a to wã yaa: «M kot-f lame tɩ f wẽ-ma!» La a yembrã zãgsame t'a ka na n wẽ-a ye.

³⁶ Dẽ, Wẽnnaam no-rɛɛs a yembrã yeelame: «Gese, fo sã n yi ka, gɩgemd n na n tek n yõk foom n kʋ, fo sẽn ka sak Sẽn-Ka-Saab noorã yĩnga.» La a to wã sẽn sɩd yi beenẽ, gɩgemd n tek n yõk-a n kʋ.

³⁷ Wẽnnaam no-rɛɛs-kãng leb n yãnda ned a to n yeel-a: «M kotame tɩ f wẽ-ma!» La yẽnda wẽ-a lame n pogle.

³⁸ Wẽnnaam no-rɛɛsã kẽng n tɩ yalsa rĩmã sẽn na n loog sor ningã zugu. La a rag n luda a nengã ne peende.

³⁹ La rĩmã wa n loogda beenẽ, tɩ Wẽnnaam no-rɛɛsã kelem n yeel-a yaa: «N-na! Mam dag n kẽnga zabre, la ned n yi zabrã zĩigẽ n tall ned n wa kɩs maam n yeele: Gũ nin-kãngã t'a ra zoe ye. Fo sã n bas-a t'a meneme, yaa foom la b na n kʋ n lebse. Ka rẽ, bɩ f yao wanzuri ligd-koeems tus a tã!

⁴⁰ La mam wa n basa raoã gũub n maand tʋʋm a taaba, la a zoe n menemame.» Tɩ Israyɛll rĩmã leok-a yaa: «Foom n kao f meng bʋʋdo.»

⁴¹ La zĩig pʋgẽ bala, Wẽnnaam no-rɛɛsã pilga peendã n bas a nengã, la Israyɛll rĩmã bãngame tɩ yaa Wẽnnaam no-rɛɛsdbã ned a yembre.

⁴² Dẽ, Wẽnnaam no-rɛɛsã yeela Israyɛll rĩmã yaa: «Ade, Sẽn-Ka-Saab yetame: ‹Fo sẽn bas ned ning mam sẽn kãab t'a tog n kiime wã t'a põsã, b na n kʋʋ foom n lebse, la b kʋ fo nebã n led yẽnda nebã zĩigẽ.› »

⁴³ Dẽ, Israyɛll rĩmã lebg n kuila a yir Samaari ne sũ-sãang la sũ-puugri.