1 Rĩm-dãmbã 2 - WẼNNAAM SEBRE 2014

A Davɩɩd sagla a biig a Salmo

¹ A Davɩɩd sẽn wa n kolg kũum, a bool-a lame n yeel-a yaa:

² «Mam na n kiime n kẽng zĩig ning ninsaalbã fãa sẽn dabdẽ wã. Dẽ yĩngã, keng f meng n yɩ raoa.

³ Sak Sẽn-Ka-Saab sẽn yaa fo Wẽnnaamã no-tũusdsi, n maan bãmb tʋlsmã, la f tũ b tõodã, ne b noyã, la b zãmsgã, ne bũmb nins fãa sẽn gʋls a Moyiis tõogã sebr pʋgẽ wã. Woto, fo na n paama tõogr bũmb nins fãa fo sẽn dat n maanã pʋgẽ, la f sẽn saagd n na n maanã pʋgẽ me.

⁴ La Sẽn-Ka-Saab na n pidsa kãabg ning b sẽn dag n kãab maamã. Bãmb kãaba maam n yeele: ‹Fo yagensã sã n gũus ne b yel-manesmã, la b sak maam ne b sũyã fãa, fo roogã kõn tol n kong ned sẽn na n deeg naamã n soog Israyɛll nebã ye.›

⁵ Fo meng mii pag a Seruza biig a Zoaab sẽn maan maam bũmb ningã. Yẽnda kʋʋ a Neer biig a Abneer ne a Yetɛɛr biig a Amasa sẽn yaa Israyɛll tãb-biisã nanambs a yiibã. Yẽnda kʋ-b-la wakat ning sẽn yaa laafɩ wakatã. Yẽnda maana zabr n daag zɩɩm tɩ mad a sẽbdgã a sẽn dag n sẽbg a sɛɛgã, ne a neooda wã a sẽn dag n pidã.

⁶ Bɩ f maan wa sẽn zems yam ning fo sẽn tarã, la f ra bas-a t'a kʋʋl n ki ye.

⁷ Maan Galaad rao a Barzɩlayi kambã neere, la f kɩt tɩ b naagd foom n dɩtẽ. Bala, bãmb sõnga maam wakat ning mam sẽn wa n zoet n dat n põs fo kẽem a Absalomã.

⁸ Ade, Bawurim tẽng rao a Gera sẽn yaa Benzame buudã nedã biig a Simeyi bee ne foom. Daar ning mam sẽn wa n loogd n dabd Mahanayima, yẽnda paooga maam wʋsgo. A yi n sega maam Zʋrdẽ kʋɩlgã noore, la mam wẽena ne Sẽn-Ka-Saab yʋʋr n yeel tɩ m ka na n kʋ yẽnda ne sʋʋg ye.

⁹ Da bas-a n ka sɩbg ye. Bala, fo tara yam, la fo mi f sẽn na n maan-a bũmb ninga. Bɩ f kɩt t'a zoob-peendã monem ne zɩɩm n sig kɩɩm-kulgu.»

A Davɩɩd kiime t'a Salmo reeg a zĩiga

¹⁰ La a Davɩɩd saka a saam-dãmba, tɩ b tɩ mum-a a Davɩɩd tẽngã pʋga.

¹¹ A Davɩɩd sẽn dɩ naamã Israyɛllã yɩɩ yʋʋm pis-naase: A rɩɩ naam Ebrõ yʋʋm a yopoe, la Zeruzalɛm yaa yʋʋm pis-tã la a tãabo.

¹² Dẽ, a Salmo leda a ba a Davɩɩd zaoorẽ, la a naamã paama pãng wʋsgo.

Rĩm a Salmo kɩtame tɩ b kʋ a Adoniza

¹³ A Hagit biig a Adoniza kẽnga a Salmo ma a Batseba nengẽ. La a Batseba soka yẽnda yaa: «Yaa noog tɩ fo wat m nengẽ?» La yẽnda leokame tɩ yaa noogo.

¹⁴ A Adoniza yeela a Batseba yaa: «Mam tara koɛɛg n dat n togs foom.» La a Batseba yeel-a lame t'a togse.

¹⁵ A Adoniza yeelame: «Fo mengã miime tɩ naamã rag n yaa maam n so, la Israyɛll nebã fãa ra tẽedame tɩ maam n na n lebg rĩmã. La naamã wẽnemd n lebga mam yao a Salmo rẽnda, tɩ bala, yaa Sẽn-Ka-Saab n kõ-a.

¹⁶ La bũmb a yembr bal la mam dat n kos foom moasã, ra zãgs m kosgã ye.» La a Batseba yeelame t'a togse.

¹⁷ La yẽnda yeelame: «Mam kot-f lame tɩ f tɩ gom ne rĩm a Salmo, bala, fo sã n kos-ba b ka na n zãgs ye. Kos-b tɩ b rɩk Sunem tẽng bi-pugl a Abisaag n kõ-m tɩ m maan m paga.»

¹⁸ A Batseba yeelame: «Beneere, mam meng na n tɩ goma ne rĩmã fo yelle.»

¹⁹ A Batseba kẽngame n na n tɩ gom ne rĩm a Salmo, a Adoniza wɛɛngẽ. La rĩmã yikame n seg-a n wõgemd a taoore, la a lebg n tɩ zaoond a geerã, la b talla naam geer a to n wa rɩgl dĩmã rɩtg t'a ma zaoonde.

²⁰ La a Batseba yeelame: «Mam tara m kosg bilf n dat n kos foom. Ra zãgs ye!» La rĩmã yeelame yaa: «M ma, kos-y-yã, tɩ m ka na n zãgs ye.»

²¹ Dẽ, a Batseba yeelame tɩ: «M kotame tɩ f rɩk Sunem tẽng bi-pugl a Abisaag n kõ f kẽem a Adoniza t'a maan a paga.»

²² La rĩm a Salmo yeela a ma yaa: «Bõe yĩng tɩ yãmb kot Sunem tẽng bi-pugl a Abisaag bal n na n kõ a Adoniza? A Adoniza ka mam kẽem la? Kell-y n kos-y rĩungã me n kõ yẽnda ne maan-kʋʋd a Abiyataar la a Seruza biig a Zoaabe, tɩ bãmb n be ne taaba!»

²³ Naab a Salmo wẽena ne Sẽn-Ka-Saab n yeele: «Mam sã n ka kʋ a Adoniza yel-kãngã poorẽ bɩ Sẽn-Ka-Saab sɩbg maam ne sɩbg-kãsenga.

²⁴ Yaa Sẽn-Ka-Saab n kõ maam rĩungã, n kɩt tɩ m zaoond m ba a Davɩɩd geerã zugu, la b kɩt tɩ m buudã tar pãnga, wa bãmb sẽn dag n kãabã. La mam wẽenda ne Sẽn-Ka-Saab sẽn vɩ wã, tɩ rũndã, a Adoniza na n kiime.»

²⁵ Dẽ, rĩm a Salmo tʋma a Zehozada biig a Benaya t'a tɩ kʋ a Adoniza.

B riga a Abiyataar n yiis Zeruzalɛm

²⁶ Rĩmã yeela maan-kʋʋd a Abiyataar yaa: «Yik n kẽng Anatot sẽn yaa fo zĩigã, bala, m dag n tog n kʋʋ foom, la rũndã, m ka na n kʋ-f ye. Bala, fo rag n tʋka Sẽn-Ka-Saab sẽn yaa Zu-soabã kaoolã koglgã n lʋɩ m ba a Davɩɩd taoore, la f naaga m ba a Davɩɩd b namsgã fãa pʋga.»

²⁷ Dẽ, rĩm a Salmo riga a Abiyataar n yiis Sẽn-Ka-Saab maan-kʋʋrã tʋʋmd pʋga, tɩ Sẽn-Ka-Saab sẽn dag n gom a Eli roogã wɛɛngẽ Sɩlo wã paam pidsgu.

²⁸ La a Zoaab sẽn wʋm woto, yẽnda zoee n kẽnga Sẽn-Ka-Saab sɛk roogẽ wã, n tɩ gãd tẽn-kugrã yɩɩla, bala, a Zoaab tɩ kẽ a Adoniza n yaool n da ka kẽ a Absalom ye.

²⁹ La b togsa rĩm a Salmo t'a Zoaab zoe n kẽnga Sẽn-Ka-Saab sɛk roogẽ wã, n tɩ be tẽn-kugrã sɛɛgẽ. Dẽ, rĩm a Salmo tʋma a Zehozada biig a Benaya n yeel-a t'a kẽng n tɩ kʋ-a.

³⁰ A Benaya sẽn ta Sẽn-Ka-Saab sɛk roogẽ wã, a yeela a Zoaab tɩ rĩmã yeelame t'a yi be. La a Zoaab yeelame t'a ka na n yi ye, tɩ yẽnda na n paa Sẽn-Ka-Saab sɛk roogã pʋg n ki. A Benaya lebg n tɩ togsa rĩmã a Zoaab sẽn yeelã fãa.

³¹ La rĩm a Salmo yeelame: «Beneere, maan wa yẽnda sẽn yeelã. Kʋ-a, la f rɩk-a n mume. Woto, f na n yiisa a Zoaab sẽn daag neb nins zɩɩm zaalma yell maam ne m buudã zugu.

³² Sẽn-Ka-Saab na n kɩtame t'a Zoaab yellã pa a meng zugu. Bala, yẽnda rag n kʋʋ neb a yiib sẽn yaa nin-tɩrse, la nin-sõamyã n yɩɩd yẽnda, tɩ m ba a Davɩɩd ka bãng ye. Yaa a Neer biig a Abneer sẽn dag n yaa Israyɛll tãb-biisã naabã, ne a Yetɛɛr biig a Amasa sẽn dag n yaa Zʋʋda tãb-biisã naabã.

³³ Bɩ nin-bãmbã b yiibã yell zĩnd a Zoaab ne a yagensã zug wakat sẽn kõn sa. La bɩ Sẽn-Ka-Saab kɩt tɩ rĩm a Davɩɩd ne b yagensã, la b buudã ne b rĩungã zĩnd ne bãan wakat sẽn kõn sa.»

³⁴ Dẽ, a Zehozada biig a Benaya kẽng n tɩ kʋ a Zoaabe. La b mum-a-la a yirã sẽn be we-raoogã pʋgã.

³⁵ La rĩm a Salmo kɩtame t'a Zehozada biig a Benaya led a Zoaab zĩigẽ n lʋɩ Israyɛll tãb-biisã taoore, la b kɩt tɩ maan-kʋʋd a Sadok led a Abiyataar zĩigẽ.

Rĩm a Salmo kɩtame tɩ b kʋ a Simeyi

³⁶ Rĩmã tʋmame tɩ b tɩ bool a Simeyi, t'a yeel-a yaa: «Kẽng Zeruzalɛm n tɩ me roog f mengã yĩnga, la f zĩnd be n da tol n yi be n kẽng zĩig ba a yembr ye.

³⁷ La bãng tɩ daar ning fo sẽn na n yi beenẽ n pɩʋʋg Sedrõ ko-soogã, f na n kiime, la f zɩɩm na n zĩnda f meng zugu.»

³⁸ La a Simeyi leoka rĩmã yaa: «N-na! Beneere! Yãmb tʋmtʋmdã na n maana wa yãmb sẽn yeelã.» A Simeyi zĩnda Zeruzalɛm n kaoos wʋsgo.

³⁹ Dẽ, yʋʋm a tãab loogr zugẽ, a Simeyi yembs a yiib n zoe n kẽng a Maaka biig a Akiis sẽn yaa Gat rĩmã nengẽ. B togsa a Simeyi t'a yembsã bee Gat tẽnga.

⁴⁰ La a Simeyi yikame n ning a bõang yolg n zomb n kẽng a Akiis nengẽ Gat tẽnga, n na n tɩ reeg a yembsã. Yẽnda tɩ reega a yembsã Gat tẽng n lebg n kuili.

⁴¹ La b tɩ togsa rĩm a Salmo t'a Simeyi yii Zeruzalɛm n kẽng Gat tẽng n lebg n kuili.

⁴² La rĩm a Salmo kɩtame tɩ b tɩ bool a Simeyi t'a wa, tɩ b yeel-a yaa: «Mam dag n ka kɩt tɩ fo wẽen ne Sẽn-Ka-Saab yʋʋr sɩda? La mam dag n ka yeel foom tɩ daar ning fo sẽn na n yi Zeruzalɛm n kẽng zĩig a to f na n kiime? Fo ka leok maam n yeel tɩ beneere, tɩ f wʋmame?

⁴³ Dẽ wã, maan a wãn tɩ fo kɩɩs wẽeneg ning fo sẽn wẽen ne Sẽn-Ka-Saabo, n ka sak mam noorã?»

⁴⁴ Rĩmã yeela a Simeyi yaa: «Fo mengã mii wẽng ning fãa fo sẽn maan m ba a Davɩɩdã. Dẽ wã, Sẽn-Ka-Saab na n kɩtame tɩ f wẽnemã fãa leb-fo.

⁴⁵ La Sẽn-Ka-Saab ninga rĩm a Salmo barka, la rĩm a Davɩɩd rĩungã na n kell n paama pãng Sẽn-Ka-Saab taoor wakat sẽn kõn sa.»

⁴⁶ Dẽ, rĩm a Salmo yeela a Zehozada biig a Benaya t'a kʋ a Simeyi. La a Benaya yiime n kʋ-a. Woto kɩtame t'a Salmo naamã tall pãnga.