1 Rĩm-dãmbã 19 - WẼNNAAM SEBRE 2014

A Eli zoeese

¹ Rĩm a Akaab tɩ togsa a pag a Zezabɛll bũmb nins fãa a Eli sẽn maanã, ne a sẽn kʋ Baall no-rɛɛsdbã fãa to-to ne sʋʋgã.

² A Zezabɛll tʋma ned t'a tɩ yeel a Eli yaa: «Beoog woto wẽnde, tɩ mam sã n ka maan foom wa fo sẽn maan Baall no-rɛɛsdbã, bɩ wẽnnaam-dãmbã ra bas-m ye.»

³ A Eli sẽn wʋm woto, a yikame n zoe n na n fãag a yõore. La yẽnda zoe n taa Bɛɛr-Seba sẽn yaa Zʋʋda soolmã, la a basa a rakõorã beenẽ.

⁴ A Eli mengã kẽna daar tõr we-raoogã pʋga, la a tɩ zĩnda tɩɩg tẽngre, la a kosa kũum n yeele: «Sẽn-Ka-Saabo, moasã wã, mam yaa n yɛɛme. Reeg-y m vɩɩmã tɩ mam ka yɩɩd m yaab-rãmbã ye.»

⁵ A Eli gãanda tɩɩgã tẽngr n gũsi. La malɛɛk n wa n sɩɩs-a n yeele: «Yik n dɩ.»

⁶ A Eli sẽn gese, a mikame tɩ bur sẽn wʋm kug-tʋʋls zut rɩg a sɛɛgẽ, tɩ koom ne yubl tẽga. La a rɩɩme la a yũ, n lebg n gãande.

⁷ Sẽn-Ka-Saab malɛɛkã leb n waa a Eli nengẽ naoor a yiibẽ soaba, n sɩɩs-a n yeele: «Yik n dɩ! Bala, fo na n kẽna kẽn-woko.»

⁸ Dẽ, a Eli yikame n dɩ la a yũ. La rɩɩb ning yẽnda sẽn dɩ wã kõo yẽnda pãng t'a kẽn rasem pis-naase, la yʋnd pis-naase. La yẽnda taa Horɛɛb sẽn yaa Wẽnnaam tãngã.

⁹ La beenẽ, a Eli kẽe tãngã bokẽ n gãand be yʋn-kãnga. La Sẽn-Ka-Saab goma ne yẽnda n yeele: «Eli, bõe la fo be ka n maandẽ?»

¹⁰ La a Eli leokame: «Mam tʋma Sẽn-Ka-Saab sẽn yaa Saasẽ-Pãng-Soabã yĩng ne m sũurã fãa, la Israyɛll nebã basa yãmb kaoolã, la b luba y tẽn-kugã, la b kʋ yãmb no-rɛɛsdbã ne sʋʋga. Yaa maam m yembr bal n ket n vɩ, la b baooda maam me n dat n kʋ.»

¹¹ Sẽn-Ka-Saab yeela a Eli yaa: «Yi tãngã bokẽ n tɩ yals maam a Sẽn-Ka-Saab taoor tãngã zugu, n ges mam sẽn na n looge!» Dẽ, sob-kãseng n yiki, n pãrg tãmsã n kɩt tɩ pĩisã wãad Sẽn-Ka-Saab taoore. Sẽn-Ka-Saab rag n ka be sebgã pʋg ye. Sebgã loogr poore, tẽn-digimdg n zĩndi, la Sẽn-Ka-Saab rag n ka be tẽn-digimdgã pʋg ye.

¹² La tẽn-digimdgã loogr poore, bugum n pʋgle, la Sẽn-Ka-Saab rag n ka be bugmẽ wã ye. Bugmã loogr poore, a Eli wʋma pemsem sẽn fʋʋsd rãamde.

¹³ A Eli sẽn wʋm bõn-kãnga, a rɩka a fuugã n lud a neng n yi n yals tãngã bok noore, la a wʋma koɛɛg sẽn gomd ne yẽnda n yetẽ yaa: «Eli! Bõe la fo be ka n maandẽ?»

¹⁴ A Eli leokame: «Mam tʋma Sẽn-Ka-Saab sẽn yaa Saasẽ-Pãng-Soabã yĩng ne m sũurã fãa, la Israyɛll nebã basa yãmb kaoolã, la b pãba y tẽn-kugã n wã, la b kʋ yãmb no-rɛɛsdbã ne sʋʋga. Yaa maam m yembr bal n ket n vɩ, la b baooda maam me n dat n kʋ.»

¹⁵ Sẽn-Ka-Saab yeela a Eli yaa: «Lebg n tũ we-raoogã sor sẽn teesd Damaas sẽnẽ wã, la fo sã n ta Damaase, bɩ f pʋdg a Azayɛll zug naam kaam t'a lebg Siiri rĩmã.

¹⁶ La f pʋdg a Nimsi biig a Zehu naam kaam t'a lebg Israyɛll rĩmã. La f pʋdg Abɛll-Mehola rao a Safat biig a Eliize kaam t'a reeg f zĩig n lebg no-rɛɛsa.

¹⁷ Ned ning sẽn na n põs a Azayɛll sʋʋgã, a Zehu n na n kʋ-a, la sẽn põs-a a Zehu sʋʋgã, a Eliize n na n kʋ-a.

¹⁸ La Israyɛll pʋgẽ, mam na n basa raop tus a yopoe tɩ b põse. Yaa neb nins sẽn ka yĩgimd Baall taoore, la b ka mogs-a wã.»

A Eliize boolgo

¹⁹ A Eli yii be n looge, la a tɩ mika a Safat biig a Eliize t'a tar niig sẽn balg yiib-yiib zĩis piig la a yiib n kooda. La a Eliize rag n bee ne piig la a yiibẽ soabã. A Eli tũu yẽnda nengẽ n dɩk a fuug n lob a Eliize zugu.

²⁰ A Eliize basa a niigã, la a wudg n pʋgl a Eli n yeele: «M kotame tɩ y kõ-m sor tɩ m kuil n tɩ pʋʋs m ba ne m ma la m wa!» A Eli leokame: «Kẽng la f lebg n wa! Bala mam ka maan-f bũmb ye.»

²¹ A Eliize sẽn yi a Eli nengẽ, a kẽng n tɩ yõga niig a yiib n maan maoongo, la a rɩka nag-koodsã raad n dʋg b nemdã n kõ nebã tɩ b wãbe, la a yik n tũ a Eli n lebg a tʋmtʋmda.