1 Rĩm-dãmbã 16 - WẼNNAAM SEBRE 2014

¹ Sẽn-Ka-Saab goma ne a Hanani biig a Zehu sẽn yaa Wẽnnaam no-rɛɛsã n yeel-a t'a yeel a Basa yaa:

² «Fo rag n yaa nin-zaalg n be Israyɛll nebã sʋka, tɩ mam yãk foom n kɩt tɩ f lebg Israyɛll sẽn yaa mam nebã naaba. La fo rɩka a Zeroboaam naoore, n kɩt tɩ Israyɛll sẽn yaa mam nebã beege, tɩ m sũurã yiki.

³ Woto yĩnga, mam na n sãama foom a Basa ne f roogã, wa m sẽn dag n sãam a Nebat biig a Zeroboaam roogã to-to wã.

⁴ Foom a Basa roogã ned sã n ki tẽng pʋgẽ, baas n na n wãb-a, la a sã n ki weoogẽ, weoogã bõn-yɩgdɩ n na n dɩ-a.»

⁵ A Basa tʋʋm a taabã ne bũmb nins fãa a sẽn maanã, ne a gãndaalmã gʋlsa Israyɛll rĩm-dãmbã kibay sebr pʋga.

⁶ A Basa saka a saam-dãmba, la b mum-a-la Tɩrsa tẽnga. Yẽnda biig a Ela n led yẽnda zĩigẽ n dɩ naamã.

⁷ A Basa ne a buudã wɛɛngẽ, Sẽn-Ka-Saab rag n goma ne a Hanani biig a Zehu sẽn yaa Wẽnnaam no-rɛɛsã. La yaa wẽng ning a Basa sẽn maan Sẽn-Ka-Saab nifẽ, n kɩt tɩ b sũurã yikã poorẽ. Bala yẽnda maana wẽng wa a Zeroboaam ne a roogã sẽn maan tɩ Sẽn-Ka-Saab sɩbg-bã.

Israyɛll rĩm a Ela rĩungu

⁸ Zʋʋda rĩm a Aaza sẽn deeg naam tɩ yʋʋm pisi la a yoaablẽ, a Basa biig a Ela lebga Israyɛll rĩmã. La yẽnda rɩɩ a naamã yʋʋm a yiib Tɩrsa.

⁹ Israyɛll rĩm a Ela tʋmtʋmd a yembr n dag n be beenẽ t'a yʋʋr boondẽ t'a Zimri, n yaa saar-dãmbã pʋɩ-sʋk naaba. A Zimri dag n baood n na n kʋʋ rĩm a Ela. La wakat-kãng tɩ rĩm a Ela rag n bee balem-naab a Arsa zakẽ wã Tɩrsa n yũud rãam. A yũume hal t'a neng yilimdẽ.

¹⁰ Dẽ, a Zimri wa n kẽe beenẽ n kʋ rĩm a Ela n deeg a naamã. Rẽ tɩ yaa Zʋʋda rĩm a Aaza sẽn deeg a naamã tɩ yʋʋm pisi la a yopoɛɛlẽ.

¹¹ A Zimri sẽn deeg naamã bal yee, a yikame n kʋ a Basa roogã gilli, n ka bas tɩ rao wall bi-ribl ba a yembr põs ye. Yẽnda kʋ a Basa roagdbã ne a zo-rãmbã fãa.

¹² A Zimri kʋ a Basa roogã fãa wa Sẽn-Ka-Saab sẽn dag n kɩt tɩ b no-rɛɛs a Zehu gomã.

¹³ La yaa a Basa ne a biig a Ela sẽn waoog wẽn-naands n beeg Sẽn-Ka-Saabo, n kɩt tɩ Israyɛll nebã lʋɩ kongr pʋgẽ, tɩ Sẽn-Ka-Saab sẽn yaa Israyɛll Wẽnnaamã sũur yikã yĩng n kɩt tɩ yɩ a woto.

¹⁴ A Ela tʋʋm a taabã ne bũmb nins fãa a sẽn maanã gʋlsa Israyɛll rĩm-dãmbã kibay sebr pʋga.

Israyɛll rĩm a Zimri rĩungu

¹⁵ Zʋʋda rĩm a Aaza sẽn deeg a naam tɩ yʋʋm pisi la a yopoe, a Zimri me reega naam Tɩrsa, n dɩ rasem a yopoe. Rẽ tɩ Israyɛll nebã rag n tilga b tãb-sikã Gibeton sẽn yaa Filistẽ-dãmbã soolmã, n na n zab ne Filistẽ nebã.

¹⁶ Israyɛll nebã sẽn dag n be zabrã zĩigẽ wã wʋmame tɩ b yetẽ t'a Zimri zãmba rĩmã n kʋ-a. La badaar bala, Israyɛll nebã yãka a Omri sẽn yaa tãb-biisã naabã n kɩt t'a lebg Israyɛll rĩmã.

¹⁷ A Omri ne Israyɛll tãb-biisã fãa yii Gibetõ n kẽng n tɩ gũbg Tɩrsa tẽngã n zab ne-a n na n deeg-a.

¹⁸ A Zimri sẽn mik tɩ b tõog n deega tẽngã, a wudgame n kẽ na-yirã roog ning sẽn tar pãngã pʋgẽ, n bas n ning roogã bugum. La bugmã rɩ-a lame t'a ki.

¹⁹ La rẽ fãa yaa a Zimri sẽn maan sẽn yaa wẽng Sẽn-Ka-Saab nifẽ wã yĩnga. Yẽnda rɩka a Zeroboaam naoor n maan yel-wẽn nins a Zeroboaam sẽn dag n maane, n kɩt tɩ Israyɛll nebã lʋɩ kongr pʋgẽ wã.

²⁰ A Zimri tʋʋm a taabã ne a sẽn dag n baood n na n kʋ a Ela wã gʋlsa Israyɛll rĩm-dãmbã kibay sebr pʋga.

Israyɛll rĩm a Omri rĩungu

²¹ A Zimri kũumã zugẽ, Israyɛll nebã welga taab zĩis a yiibu. Israyɛll neb kẽer dag n datame t'a Ginat biig a Tibni lebg Israyɛll rĩmã, tɩ kẽer me rat t'a Omri yɩ rĩmã.

²² Neb nins sẽn be a Omri poorẽ wã pãng yɩɩga a Ginat biig a Tibni poorẽ dãmbã, la b kʋ a Tibni t'a Omri lebg Israyɛll rĩmã.

²³ Zʋʋda rĩm a Aaza sẽn deeg a naamã tɩ yʋʋm pis-tã la a yembre, la a Omri lebg Israyɛll rĩmã, n dɩ naamã yʋʋm piig la a yiibu. A Omri rɩ a naamã yʋʋm a yoob Tɩrsa tẽngã.

²⁴ Dẽ poore, a Omri raa tãngã, wanzuri wakɩ-koeems tus a yoobe, rao a yembr yʋʋr sẽn boond t'a Semeer nengẽ, n me tẽng tãngã zugu, n pʋd tẽngã yʋʋr tɩ Samaari, wa sẽn dag n so-a tãngã yʋʋrã sẽn yaa a Semeerã.

²⁵ A Omri maana sẽn yaa wẽng Sẽn-Ka-Saab nifẽ. Yẽnda maana wẽng n yɩɩd rĩm-dãmb nins fãa sẽn deng-b yẽnda n zĩndã.

²⁶ Yẽnda manesmã kell n yɩɩ wa a Nebat biig a Zeroboaam sẽn dag n maan n kɩt tɩ Israyɛll nebã lʋɩ kongr pʋgẽ, tɩ Sẽn-Ka-Saab sẽn yaa Israyɛll Wẽnnaamã sũur yik ne-bã. Bala, bãmb pʋʋsa wẽn-naandse.

²⁷ A Omri tʋʋm a taabã ne bũmb nins fãa a sẽn maanã, la a gãndaalmã gʋlsa Israyɛll rĩm-dãmbã kibay sebr pʋga.

²⁸ Rĩm a Omri saka a saam-dãmba, la b mum-a-la Samaari. La yẽnda biig a Akaab leda yẽnda zĩigẽ n dɩ naamã.

Israyɛll rĩm a Akaab rĩungu

²⁹ Zʋʋda rĩm a Aaza sẽn deeg a naamã tɩ yʋʋm pis-tã la a nii, la a Omri biig a Akaab lebg Israyɛll rĩmã. La a Omri biig a Akaab zĩnda Samaari n dɩ Israyɛll naamã yʋʋm pisi la a yiibu.

³⁰ A Omri biig a Akaab maana sẽn yaa wẽng Sẽn-Ka-Saab nifẽ n yɩɩd rĩm-dãmb nins fãa sẽn deng-b yẽnda n zĩndã.

³¹ A Akaab rɩka a Nebat biig a Zeroboaam naoor n maan sẽn yaa wẽnga. La sẽn yaa wẽng n yɩɩd fãa, a kẽng n tɩ rɩka Sɩdõ nebã rĩm a Ɛtball bi-pugl a Zezabɛll n maan a paga, n sak n wõgemd wẽn-naandg a Baall taoor n waoog-a.

³² A Akaab mee roog a Baall yĩng Samaari, la a me tẽn-kugr zĩ-kãng a yĩnga.

³³ A Akaab peesa ra-lugdg wẽn-poak a Aseera yĩnga. A Akaab maana yɛl a taab sẽn yaa wẽng n yɩɩd Israyɛll rĩm-dãmb nins fãa sẽn deng-b yẽnda n zĩndã. Rẽ kɩtame tɩ Sẽn-Ka-Saab sẽn yaa Israyɛll Wẽnnaamã sũur yiki.

³⁴ Yaa rĩm a Akaab zamaanẽ, la Betɛll rao a Iyɛll lebs n me Zeeriko tẽngã. A Iyɛll sẽn zĩnig tẽngã yẽbgrã, a bi-kãseng a Abiram kiime. A sẽn me n sɛ n lugl tẽngã kʋɩlemsã, a bi-yao a Seguub kiime. Rẽ kell n yɩɩ wa Sẽn-Ka-Saab sẽn dag n kɩt t'a Nun biig a Zozoe gomã.