1 Rĩm-dãmbã 13 - WẼNNAAM SEBRE 2014

B kãaba Betɛll tẽn-kugrã wẽnga

¹ Wakat ninga a Zeroboaam sẽn wa n be Betɛll n yas n yõogd wisd tẽn-kugrã zugã, Wẽnnaam dao a yembr n yi Zʋʋda n wa ne Sẽn-Ka-Saab koɛɛga.

² Wẽnnaam daoã kãaba tẽn-kugrã wẽng wa Sẽn-Ka-Saab sẽn wilgã n yeele: «Tẽn-kugri! Tẽn-kugri! Ade, Sẽn-Ka-Saab yeelame tɩ bi-ribl n na n dog a Davɩɩd buudã pʋgẽ, la b na n pʋd-a a yʋʋr t'a Zoziyaase. La maoong kʋʋb zĩisẽ maan-kʋʋdb nins sẽn yõogd wisd fo zugã, bi-kãng na n kʋ-b-la fo zugu, la b na n yõoga ninsaalb kõab fo zugu.»

³ Badaar bala, Wẽnnaam daoã wilga a Zeroboaam bũmb ning sẽn na n maanã n yeele: «Ad bãnd ning sẽn wilgd tɩ yaa Sẽn-Ka-Saab n gome. Tẽn-kugrã na n wãame tɩ tompeglmã sẽn be a zugã sãeege.»

⁴ Wakat-kãnga, rĩm a Zeroboaam sẽn wʋm kãabg ning Wẽnnaam daoã sẽn kãab tẽn-kugrã, a tẽega a nug n zʋʋg tẽn-kugrã n tees Wẽnnaam daoã n yeel tɩ b yõk-a. La nug ning rĩm a Zeroboaam sẽn dɩk n tees Wẽnnaam daoã kʋɩɩme n tɩre, n ka leb n tõe n sik ye.

⁵ La Wẽnnaam daoã sẽn dag n wilg bãnd ningã Sẽn-Ka-Saab sẽn yeelã paama pidsgu. Tẽn-kugrã sɩd wãame tɩ tompeglmã sẽn dag n be a zugã sãeege.

⁶ Rĩmã zẽka a koɛɛg n yeel Wẽnnaam daoã yaa: «M kot-y lame tɩ y kos Sẽn-Ka-Saab sẽn yaa fo Wẽnnaamã, la f pʋʋs m yĩng tɩ m nugã tõe n leb n wa a zĩigẽ.» Dẽ, Wẽnnaam daoã pʋʋs n kosa Sẽn-Ka-Saabo, la rĩmã nugã leb n wa a zĩigẽ.

⁷ Rĩm a Zeroboaam yeela Wẽnnaam daoã yaa: «Wa tũ maam n kuili, tɩ m tɩ kõ-f rɩɩb tɩ f rɩ, la m bao kũun n kõ-fo.»

⁸ Wẽnnaam daoã leoka rĩmã yaa: «Baa yãmb sã n dɩk y zakã pʋɩ-sʋk n kõ maam, mam kõn tũ yãmb n kuil ye. Mam ka na n lemb y rɩɩbo, mam kõn yũ y koom me ye.

⁹ Bala, Sẽn-Ka-Saab yeela maam tɩ m da rɩ rɩɩbo, la m da yũ koom, la m da leb n tũ sor ning m sẽn tũ n wa wã n kuil ye.»

¹⁰ Dẽ, Wẽnnaam daoã rɩka sor a to n kuiisẽ, n ka leb n tũ sor ning yẽnda sẽn dag n tũ n wa Betɛllã ye.

Wẽnnaam daoã kɩɩsgo

¹¹ Wẽnnaam no-rɛɛs-kʋdr a ye n dag n be Betɛlle. Yẽnda biig a yembr n wa n togs-a bũmb nins fãa Wẽnnaam daoã sẽn maan Betɛll badaarã, la goam nins Wẽnnaam daoã sẽn togs rĩmã. Kambã sẽn togs b ba wã rẽ fãa n sɛ,

¹² b ba wã sok-b lame yaa: «Wẽnnaam daoã rɩka so-bʋgo?» La kambã wilga b ba wã Zʋʋda raoã sẽn dɩk sor ningã.

¹³ Dẽ, b ba wã yeel-b lame tɩ b ning a bõangã yolgo. La b maana woto n kõ-a t'a zombe.

¹⁴ Wẽnnaam no-rɛɛs-kʋdrã tɩ paam-a Wẽnnaam daoã sẽn yit Zʋʋda wã t'a zĩ tɩɩg tẽngre, t'a sok-a yaa: «Yaa foom la Wẽnnaam no-rɛɛs ning sẽn yi Zʋʋda n wa wã bɩ?» T'a leok tɩ: «N-yẽe! Yaa maam!»

¹⁵ Dẽ, Wẽnnaam no-rɛɛs-kʋdrã yeela yẽnda yaa: «Yik n wa tũ maam tɩ d kuil n tɩ rɩ.»

¹⁶ La Wẽnnaam daoã yeelame yaa: «Mam ka tõe n tũ yãmb n kuil ye! Mam ka tog n lemb rɩɩbo, wall m yũ koom tẽn-kãngã ye!»

¹⁷ Bala, Sẽn-Ka-Saab yeela maam tɩ m da lemb tẽn-kãngã rɩɩbo, wall m yũ a koom, la m da leb n tũ sor ning m sẽn tũ n wa wã me n lebg n kuil ye.

¹⁸ Wẽnnaam no-rɛɛs-kʋdrã yeela yẽnda yaa: «Mam me yaa Wẽnnaam no-rɛɛs wa foom. La malɛɛk n wa n togs maam Zu-soabã koɛɛg n yeele: Kẽng n tɩ peeg Wẽnnaam daoã n kuil f yir t'a tɩ rɩ la a yũ.» Wẽnnaam no-rɛɛs-kʋdrã yaool n dag n yagda zĩrẽ.

¹⁹ Dẽ, Wẽnnaam daoã lebg n tũu yẽnda n kuil a yirã n na n tɩ rɩ la a yũ.

²⁰ La b sẽn ket n zĩ n dɩtẽ, Sẽn-Ka-Saab goma ne Wẽnnaam no-rɛɛs-kʋdrã sẽn yit Betɛllã.

²¹ Dẽ, a zẽka a koɛɛg n yeel Wẽnnaam daoã sẽn yit Zʋʋda wã yaa: «Ad Sẽn-Ka-Saab koɛɛga: Fo kɩɩsa Sẽn-Ka-Saab noorã n ka sak bãmb tõogã bãmb sẽn dag n wilg foomã ye.

²² Fo sẽn lebg n wa rɩ la f yũ tẽn-kãngã wã, tɩ b yaool n dag n yeela foom tɩ f ra rɩ tẽn-kãngã rɩɩbo, la f ra yũ a koomã, fo na n kiime, la b ka na n mum fo kũumã f saam-dãmbã yaadẽ ye.»

²³ B sẽn dɩ la b yũ n sɛ, Wẽnnaam no-rɛɛs-kʋdrã ninga bõang yolg n kõ Wẽnnaam daoã yẽnda sẽn tɩ peeg n wa wã

²⁴ t'a zomb n looge. La Wẽnnaam daoã sẽn be sorẽ, gɩgemd n tek n yõk-a n kʋ n dɩgl sorã zugu. La yẽnda bõangã ne gɩgemdã ra ket n yas n yega a kũumã.

²⁵ La so-loaadb n wa n loogd be n yãnd kũumã sẽn dɩg sorã zugã, tɩ gɩgemdã yas kũumã sɛɛgẽ. So-loaadbã sẽn ta Betɛll sẽn yaa tẽng ning Wẽnnaam no-rɛɛs-kʋdrã sẽn beẽ wã, b goma bõn-kãng yelle.

²⁶ Wẽnnaam no-rɛɛs-kʋdrã sẽn wʋm woto, a yeelame: «Yaa Wẽnnaam no-rɛɛs ning sẽn kɩɩs-a Wẽnnaam noorã, la Wẽnnaam bas tɩ gɩgemd yõk n kʋ, wa bãmb sẽn dag n yeel yẽnda wã.»

²⁷ Wẽnnaam no-rɛɛs-kʋdrã yeela a kambã tɩ b ning a bõangã yolgo, la b ninga a bõangã yolgo.

²⁸ Wẽnnaam no-rɛɛs-kʋdrã kẽngame n tɩ mik tɩ kũumã rɩga, tɩ bõangã ne gɩgemdã yas n yeg kũumã. La gɩgemdã ka wãb kũumã, la a ka yõk bõangã me ye.

²⁹ Dẽ, Wẽnnaam no-rɛɛs-kʋdrã rɩka kũumã n palg bõangã n tall n kuili. Nin-kẽemã talla kũumã n kuil Betɛll n na n tɩ yãb a kʋʋrã la a mum-a.

³⁰ Yẽnda muma Zʋʋda raoã kũumã a meng yaoogẽ, la a yãb n wiis n yeele: «Kayto! M saam-biiga.»

³¹ A sẽn mum kũumã n sɛ, a yeela a kambã yaa: «Mam sã n wa n ki, bɩ y mum maam n naag Wẽnnaam no-rɛɛsã. Gãneg-y maam n yegl a kõabã.

³² Bala mam mii hakɩɩka, tɩ kãabd nins fãa Sẽn-Ka-Saab sẽn kɩt t'a kãab Betɛll tẽn-kugrã, ne a sẽn gom maoong kʋʋb zĩisẽ pʋʋsg rotã fãa sẽn be Samaari tẽmsẽ wã wɛɛngẽ wã na n paama pidsgu.»

³³ Bõn-kãensã fãa zugẽ, a Zeroboaam kell n ka wẽnemd n bas wẽngã maaneg ye. Yẽnda leb n yãka nin-zaals Israyɛll nebã sʋka, n kɩt tɩ b lebg maan-kʋʋdb maoong kʋʋb zĩisẽ wã. Ned ning fãa sẽn dag n dat-a n yɩ maan-kʋʋda, yẽnda yãkd-a lame n kɩt t'a lebg maan-kʋʋda.

³⁴ Manesem-kãng kẽesa a Zeroboaam ne a yirã rãmb kongr pʋga. Yaa rẽ n kɩte, tɩ b sãam a Zeroboaam yirã zãnga, n menes-b dũniyã zugu.