1 Rĩm-dãmbã 12 - WẼNNAAM SEBRE 2014

Israyɛll nebã kɩɩsgo

¹ A Roboaam kẽnga Sɩkɛm, la Israyɛll nebã kẽnga beenẽ n na n tɩ kõ-a naam.

² A Nebat biig a Zeroboaam wʋma bõn-kãnga, la rẽ tɩ yẽnda ket n bee Ezɩpt tẽnga, bala, yẽnda dag n zoe n kẽnga beenẽ n na n paam n põs rĩm a Salmo.

³ B tʋmame tɩ b tɩ bool-a. La a Zeroboaam ne a Israyɛll nebã tũu taab n wa, la b goma ne a Roboaam n yeel-a yaa:

⁴ «Yãmb ba wã dag n namsda tõnd wʋsgo, dẽ, tõnd kot-y lame tɩ y yols tõnd ne namsg ning y ba sẽn dag n namsd tõndã, woto, d na n yɩɩ yãmb tʋmtʋmdba.»

⁵ Rĩm a Roboaam yeel-b lame tɩ b kuil la b lebg n wa ra-yɩt-n-daare. La nebã kuilame.

⁶ Woto, rĩm a Roboaam soka nin-kẽemb nins sẽn dag n zĩnd ne yẽnda ba a Salmo wã yaa: «Ne yãmba, y sagenda maam tɩ m maan a wãna?»

⁷ Nin-kẽembã yeela a Roboaam yaa: «Yãmb sã n sak n maan nin-bãmbã sẽn datã, la y gom ne-b gom-noodo, b na n yɩɩ yãmb tʋmtʋmdba.»

⁸ La rĩm a Roboaam ka geelg nin-kẽembã saglsã ye. A bas n kẽng n tɩ kosa kom-bɩɩs nins sẽn be ne yẽnda n dag n yaa yẽnda reed-n-taasã saglse.

⁹ Rĩm a Roboaam soka kom-bɩɩsã yaa: «Nin-bãmbã sẽn kot maam bũmb ningã, yãmb sagenda maam tɩ m leok-b tɩ bõe? B yeela maam tɩ m yols-b ne zɩɩb ning m ba sẽn dag n zɩlg-bã.»

¹⁰ Kom-bɩɩsã sẽn yaa a Roboaam reed-n-taasã yeela a Roboaam yaa: Ad yãmb sẽn na n yeel-b bũmb ningã la woto: « ‹Y ba zɩlga tõnd wʋsgo, la yãmba, yols-y-do.› Yeel-y-b tɩ yãmb nug-bi-kɛmblã yɩɩda y ba wã kanga.

¹¹ La sẽn paase, y ba sã n dag namsa bãmba, yãmb na n paasa bãmb namsgã tɩ yɩɩd rẽ. Yeel-y-b tɩ y ba sã n dag n sɩbga bãmb ne kalwaase, yãmb na n sɩbg-b-la ne kalwaas sẽn tar gõose.»

¹² Rasem a tãabã daar sẽn ta, a Zeroboaam ne Israyɛll nebã fãa lebg n waa rĩm a Roboaam nengẽ, wa yẽnda sẽn dag n yeelã.

¹³ Dẽ, a Roboaam basa nin-kẽembã sẽn sagl yẽnda wã, n leok nebã ne mo-beedo.

¹⁴ A Roboaam reega a kom-bɩɩsã sẽn yaa yẽnda reed-n-taasã sagls n yeele: «M ba rag n namsa yãmba, la mam na n paasa yãmb namsgã n yɩɩda, m ba dag n sɩbga yãmb ne kalwaase, la mam na n sɩbga yãmb ne kalwaas sẽn tar gõose.»

¹⁵ Woto, rĩmã ka kelg nin-buiidã ye. Bala, yaa Sẽn-Ka-Saab n dag n dat tɩ yɩ a woto, tɩ bũmb ning bãmb sẽn dag n kɩt tɩ Sɩlo rao a Akiya togs a Nebat biig a Zeroboaamã tõe n paam pidsgu.

Israyɛll soolmã welga a yiibu

¹⁶ La Israyɛll neb nins sẽn be ne a Zeroboaamã fãa sẽn yã tɩ rĩmã ka kelg bãmbã, b yeelame: «Tõnd toog ka leb n be ne a Davɩɩd buudã neb ye. Tõnd ka leb n tar lagem-n-taar ne a Izayi biigã ye. Israyɛll nebã, d lebg n kuili! Moasã wã, bɩ a Davɩɩd yagensã tall b roogo!» Dẽ, Israyɛll nebã lebg n kuilame.

¹⁷ Dẽ, yaa Israyɛll neb nins sẽn dag n be Zʋʋda tẽmsẽ wã bal n dag n get a Roboaam wa b rĩmã.

¹⁸ Baoosgo, rĩm a Roboaam tʋma a Adoram sẽn dag n get tʋʋm-wɛglã yellã Israyɛll nebã nengẽ. La Israyɛll nebã fãa naaga taab n lob a Adoram kug t'a ki. Dẽ, yɩɩ tɩlɛ ne rĩm a Roboaam t'a kẽ saar pʋg n zoe n kẽng Zeruzalɛm.

¹⁹ Yɩɩ woto tɩ Israyɛll kell n welg ne a Davɩɩd doogã neb hal tɩ ta rũndã.

²⁰ Israyɛll nebã fãa sẽn wʋm t'a Zeroboaam lebg n waame, b tigma taab n kɩt tɩ b bool-a t'a wa, la b kɩtame t'a lebg Israyɛll nebã fãa rĩmã. La rag n yaa Zʋʋda buudã neb bal n kell n pa a Davɩɩd ne a roogã poorẽ.

²¹ A Roboaam sẽn lebg n ta Zeruzalɛm, a tigma Zʋʋda buudã fãa ne Benzame buudã tãb-biis tus koabg la pis-nii sẽn mi zabr sõama, tɩ b na n tɩ zab ne Israyɛll buud a taabã neb n deeg soolmã n lebs a Salmo biig a Roboaam.

²² La Wẽnnaam goma ne b no-rɛɛs a Semaya n yeel-a yaa:

²³ «Yeel a Salmo biig a Roboaam sẽn yaa Zʋʋda rĩmã ne Zʋʋda buudã ne Benzame buudã fãa ne neb a taabã sẽn ketã,

²⁴ tɩ Sẽn-Ka-Saab yeelame yaa: Bɩ y ra kẽng n tɩ zab ne y saam-biisã sẽn yaa Israyɛll nebã ye! Bɩ ned kam fãa lebg n kuil a yiri, bala, yaa maam n kɩt tɩ yellã yɩ a woto.» Bãmb saka Sẽn-Ka-Saab koɛɛgã n maan wa b sẽn yeelã n lebg n kuili.

A Zeroboaam beegre

²⁵ A Zeroboaam kɩtame tɩ b me lals n gũbg Sɩkɛm sẽn be Efrayiim tãmsã sʋkã t'a kẽ be. Yẽnda zĩnda be n yi n tɩ me lals n gũbg Penuwɛll tẽngã.

²⁶ A Zeroboaam tagsa a sũurẽ a woto: «Yellã sẽn lebg to-to wã, naamã tõe n wa lebg n leba a Davɩɩd doogã neb nugẽ.

²⁷ Dẽ wã, nebã sã n ket n kẽnd Zeruzalɛm n maand maoong Sẽn-Ka-Saab roogã pʋga, b tõe n wa teka yam n wẽnemd n bas maam, n tɩ kẽ Zʋʋda rĩm a Roboaam sẽn dag n yaa b soaalã. Woto, b na n kʋʋ maam n lebg n kẽ yẽnda.»

²⁸ A Zeroboaam kõo a meng yam n maan sãnem nag-bi a yiibu, n yeel Israyɛll nebã yaa: «Israyɛll nebã, yãmb sẽn kẽnd Zeruzalɛmã yaa wʋsgo. Moasã, wẽn-naands nins sẽn yiis yãmb Ezɩpt yembdã pʋgẽ wã la woto.»

²⁹ A Zeroboaam rɩka nag-bil a yembr n tɩ ning Betɛlle, la a rɩk a yembrã n tɩ ning Dan.

³⁰ A Zeroboaam manesem-kãng kẽesa nebã beegr pʋga. La nebã rag n kẽnda hal Dan n waoogd nag-bil ning sẽn be-a be wã.

³¹ A Zeroboaam kɩtame tɩ b me rot maoong kʋʋb zĩisẽ wã, la a basa Leevi buudã sẽn yaa maan-kʋʋdbã, n yãk nin-zaals n kɩt tɩ b lebg maan-kʋʋdba.

³² A Zeroboaam yãka kiuug a nii soabã rasem piig la a nu wã daare, tɩ yaa tigr daare. La tig-kãng kell n zemsda ne Zʋʋda tigrã daare. La yẽnda meng n yik n maan maand tẽn-kugrã zugu. A Zeroboaam maana a woto Betɛll n maand maand n kõt nag-bi nins yẽnda sẽn maanã. Yẽnda zĩniga maan-kʋʋdb maoong kʋʋb zĩisẽ wã Betɛlle.

³³ Kiuug a nii soabã rasem piig la a nu wã daare, a Zeroboaam maana tigr Israyɛll nebã yĩnga, wa sẽn zems daar ning yẽnda sẽn dag n yãkã. Badaare, yẽnda yõoga wisd tẽn-kugr ning yẽnda sẽn me Betɛllã zugu.